25 de julio: Santiago ára

Escucha el evangelio y la reflexión en: https://youtu.be/H2Jts6vSSBM

25 de julio. Santiago ára           

                                                      Mateo 20, 20 – 28.

Upérõ Santiágo ha Juan sy oñemboja Jesús rendápe, imemby mokõive ndive, ha oñesũ henondépe. Ojerurese hína ra’e chupe peteĩ mba’e. Jesús oporandu chupe:

—Mba’éiko reipota.

Ha’e he’i chupe: — Ágã reguapy vove ne Rréinope, aipota ko’ã che memby mokõi oguapy ojovái nde ykére.

Jesús he’i chupekuéra: — Ndapeikuaái ete mba’épa pejerure hína. Peime nga’u piko pehasa asy haguãicha umi mba’e che ahasa asýtava rupi.

Ha’e kuéra he’i: — Héẽ, roime.

Jesús he’i chupe kuéra: — Pehasa asýta añete che ahasa asytaháicha. Peguapy haguã che ykére katu, nda’ijái chéve ame’ẽ avavépe. Che ru upe he’ítava mávapa umi oguapy vaerãva che ykére.

Umi 10 disípulo ohendúvo upéva, ipochy Santiágo ha Juan ndive. Upémarõ Jesús ohenói chupe kuéra, ha he’i: — Peẽ niko peikuaa mba’éichapa umi mburuvicha oñembojára hetã guáre ha umi poguasu katu ipo pohýi hendive kuéra. Pende apytépe katu ndaupéichai va’erã.

Upéva rangue, pe tuichaséva pende apytépe toiko pene rembijokuái ramo. Ha pe itenondeséva pende apytépe, toiko pene rembiguái ramo. Che niko ndajúi ahekávo che rembiguáirã. Aiko haguã tembiguáirõ uvei, ha ame’ẽ haguã che rekove ojesalva haguã heta.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Ñaime porãse niko karai guasu kuéra ndive, ñaikotevẽ jave jajevale haguã hese kuéra, jahecha pype pya’eve oguahẽ karai comisario kavaju. Padrino ha recomendación oúva yvatégui hatã ombota ha heta okẽ oipe’a.

            Ha jahecha avei Hesu tiempo-pe Juan ha Santiago sy, ouha oñesũ voi Hesu renondépe, ojerure imemby kuéra ojupi haguã ijykére ágã ha’e omanda guasu vove. Ha umi ambue apóstol ipochy joa umi mokõi iñirũ nguéra ndive. Oiméneko ha’e kuéra ojupise avei omanda Hesu ykére mba’e, ha oñepyrũ jeýtama oiko vai hikuái ohecha haguã mávapa tuichave ijapytépe kuéra. Péicha jahecha oikoha heta hendápe, oiko vai lo mitã, ojoja’o ha ipochy oñondive opyta haguã hapicha akã ári, omanda guasúva ykére.

            Hesu he’i ichupe kuéra oikoséramo karai guasu térã kuña karai guasu, natekotevẽi oñesũ mburuvicha renondépe ohekávo recomendación terã paíno, oñemoĩ vaerãha ojejokuáiuka ha oñangareko hapicha oikotevẽva rehe, oiko hapicha rembiguáiramo, Hesu ojapo haguéicha. Ajépa che irũ ha che reindy ñaikotevẽte peichagua. Ko Santiago árape tamora’e ñande ave ñantende ko Hesu ombo’e vaekue ichupe.

Pa’i Alberto Luna.