SÁBADO SEXTO PASKUA
15 mayo, 2021LUNES 7º PÁSKUA
17 mayo, 2021LECTURA PETEÎHA:
Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha
1, 1-11
Che kuatiañe’ẽ tenonde guápe, nde Teófilo rejererohory etéva, añe’ẽ va’ekue opa mba’e Jesús ojapo ha ombo’e va’ekue rehe iñepyrũha guive, yvágape ojehupi hague ára peve.
Oho mboyve, Espíritu Santo rupi oheko mbo’e hembiaporãre umi apóstol ha’e oiporavo va’ekuépe. Ha omano rire ojechauka va’ekue ha’ete voi, ohechauka porãvo oikoveha, 40 ára aja ojechauka ichupe kuéra ha oñe’ẽ ichupekuéra Ñandejára Rréino rehe.
Oiko aja gueteri ijapóstolkuéra ndive, Jesús he’i ichupekuéra ani haguã oho Jerusaléngui. He’i chupekuéra: Peha’arõ toiko raẽ upe che Ru he’i va’ekue, che añe’ẽ hague peẽme. Añete, Juan oporo mongarai va’ekue ýpe, mbovy ára riremínte katu peẽ peñe mongaraíta Espíritu Sántope.
Umi oñemboaty va’ekue Jesús ndive oporandu ichupe: Ore Jára, ko’ágãpa remopu’ã jevýta tetã Israel?
Jesús he’i chupekuéra: peëme ndaijái peikuaávo, mba’e árape térã araka’etépa oikóta umi mba’e che Ru oheja va’ekue ipoguýpe. Espíritu Santo oúvo pende ári katu perekóta pokatu ha pesẽta pe che myerakuãvo Jerusalénpe ha opa Judea ha Samaría pýre ha opa ko yvy jerekuévo.
Upéva he’ipávo, ha’ekuéra oma’ẽ aja hese, Jesús ojehupi ha peteĩ arai ojaho’i ha ndohechavéi hikuái ichupe. Ha ha’ekuéra oma’ẽ aja yvága rehe, ohechávo mba’éichapa Jesús oho mombyry, mokõi kuimba’e ijao morotĩva ojechauka ijyke rehekuéra, ha he’i chupekuéra: Peẽ Galileagua, mba’e rehe piko pepyta pema’ẽ yvága rehe? Upe Jesús voi oĩ va’ekue pene ndive ha ojehupi va’ekue yvágape, ou jevýta pehecha haguéicha oho.
Tupã Ñandejára Ñe’ẽ.
Opavave: Romomba’e guasu ndéve, Ñandejára.
SALMO ÑEMBOHOVÁI 46, 2-3. 6-9
Opavave: Ñandejára ojupi iguapyhápe, sapukái ha turupúpe.
O bien: Aleluia.
Opa tetãnguéra pejepopete, vy’a pópe pero sapukái Ñandejárape.
Ñandejára yvateteguágui pekyhyje va’erã, ha’e hína mburuvicha guasu. O.
Ñandejára ojupi iguapyhápe, sapukái ha turupúpe.
Pepurahéi! Pepurahéike Ñandejárape!
Pepurahéi! Pepurahéike ñande ruvicha guasúpe! O.
Ñandejára hína tetã nguéra ruvicha guasu, pero purahéike ichupe.
Ñandejára oisãmbyhy tetãnguéra,
Ñandejára oĩ iguapyha marangatúpe. O.
LECTURA MOKÔIHA:
Ñahendúta Tupã Ñandejára Ñe’ẽ San Pablo ohai va’ekue Éfeso guápe 1, 17-23
Che pehenguekuéra: Ajerure Ñandejára Jesucrísto Tupãme, Túva tuichaitéva, ome’ẽ haguã peẽme pe Espíritu, pene moarandu ha oikuaauka haguã peẽme mba’eichaguápa Ñandejára, ha añetehápe peikuaa haguã ichupe.
Ajerure Ñandejárape omyesakã haguã peẽme pene akãme perekóva, peikuaa porã haguã mba’e peha’arõ haguãpa ha’e pene renói raka’e, ha mba’eichaitépa ha’e tuicha ohovasa opa mba’épe, umi imba’évape, ha mba’eicha itépa tuicha ha ijojaha’ỹva pe ipokatu ñane pytyvõva, ñande Cristo rehe jajeroviápe.
Ko ipokatu ñane pytyvõva niko hína pe pokatu Ñandejára ohechauka mbarete va’ekue, omopu’ã jevy ramo Crístope, ha omboguapy ichupe ijakatúape, yvágape.
Ñandejára omoĩ ichupe opaichagua yvategua ruvicha ári, ha opaite mba’e oĩva ári, ko’agãgua ha oútava. Ha’e omoĩ opa ite mba’e Cristo py guýpe, ha omoĩ Crístope voi iglésia akãrõ. Cristo iglésia niko Cristo rete hína, Cristo rupi oĩmba porãva, Cristo rupi hína opa ite mba’e oĩ porãmba.
Tupã Ñandejára Ñe’ẽ.
Opavave: Romomba’e guasu ndéve, Ñandejára.
ALELUIA Mt 28, 19a. 20b
Aleluia.
Ta peho opa tetã rupi pe porombo’e ha pejapo ichupekuéra che remimbo’e.
Che aimetaha pene ndive opa ára ko yvy opaha peve.
Aleluia.
EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 16, 15-20
Opavave: Romomba’e guasu ndéve, Ñandejára.
Upérõ Jesús ojechauka umi 11 apóstol kuérape, ha he’i chupekuéra: Tapeho opa rupi ko yvy apére ha pehenduka opavavépe ko marandu porã. Umi ogueroviáva ha oñemongaraíva ojesalváta. Umi oguerovia’ỹva katu oñehundíta.
Umi che rehe ojeroviáva heta milágro ojapóne. Che rérape omosẽne hikuái demóño ha oñe’ẽne ñe’ẽ oñeñe’ẽ’ỹvape ha ipyahúva chupe kuéra. Ipópe ojagarráne mbói térã ho’u ramo venéno ndojehúi chéne chupe kuéra mba’eve.
Omoĩne ipo hasývare ha umíva okueráne.
Jesús oñe’ẽmba rire idisípulokuéra ndive, Tupã ohupi chupe yvágape. Upépe oguapy ha’e Tupã ykére. Idisípulokuéra katu osẽ omombe’u pe ohasa va’ekue oparupiete. Ha Ñandejára oipytyvõ manté chupekuéra. Umi milágro ojapóva rupi ojehecha añeteha umi mba’e ha’e kuéra he’íva.
Ñandejára Jesucrísto Ñe’ẽ.
Opavave: Romomba’e guasu ndéve, Ñandejára Hesukrísto.