DOMINGO DE PENTECOSTÉS

LECTURA PETEÎHA:
Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 2, 1-11

Oguahẽvo Pentecostés ára, opa ogueroviáva ijaty peteĩ hendápente. Upeicha háguinte oñehendu peteĩ tyapu guasu yvágagui oúva, yvytu hatã oipejú ramo guáicha. Ha omyenyhẽmba pe óga oĩháme hikuái. Ha ohecha hikuái ku tata rendýicha oguejýva peteĩ teĩ hi’árikuéra. Ha opavave henyhẽ Espíritu Sántogui, ha oñepyrũ oñe’ẽ ñe’ẽ ambuépe, Espíritu Santo omoñe’ẽ háicha ichupekuéra.

Oiko upe ramo Jerusalénpe heta Israel guáva ombojeroviáva Tupãme, ou va’ekue opa tetã guio. Opavave oñembyaty ohendúvo upe tyapu ha ndoikuaái mba’épa ojehu, peteĩ teĩ ohendúgui umi ogueroviávape oñe’ẽ ramo iñe’ẽ teépe.

Ohecha ramo etereígui he’i joa hikuái: Ndaha’éi piko Galileagua ko’ã oñe’ẽva? Mba’éicha rupi piko ñahendu oñe’ẽ
ramo ñane ñe’ẽ teépe? Ko’ápe ñaime Partia, Media, Elam, Mesopotamia, Judea, Capadocia, Ponto, Asia, Frigia ha Panfilia, Egipto ha Libia Cirene ypy pegua.

Oĩ avei Roma gua ko’ápe oikóva, oĩ judío ha umi ojeroviáva Tupã rehe ha’ekuéraicha. Oĩ avei Creta ha Arábiagui oúva. Ha ñahendu ñane ñe’ẽ teépe oguerohoryha hikuái Tupäme opa hembiapokue rehe.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 104, 1ab. 24ac. 29b-31.34
Opavave: Tupã embou nde Espíritu yvy ári taipyahu opa mba’e.
O bien:
Aleluia.
Amomba’e guasu Ñandejárape che py’aite guive.
Nde tuichaite niko Tupã che Jára,
Ore Jára, hetaite mba’e niko rejapo.
Ko yvy henyhẽ ne rembiapokuégui. O.

Ipytu rejoko ramo omanomba,
ha yvýpe jevýnte oho opa.
Nde pytúpe umíva rejapo,
ko yvy ári opa mba’e rembopyahu. O.

Ñandejára to mimbipa opa ára,
Tupã to vy’a hembiapokue rehe.
Iporã nga’u ra’e Ñandejárape umi mba’e che akãme arekóva.
Ha’e añoite ku hína upe che mbovy’áva. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 12, 3b-7. 12-13

Che pehenguekuéra: Avave ndaikatui he’ívo oñe’ẽ ramo hína Tupã Espíritu rupi “Añáme toho Jesús!”. Ha avave avei ndaikatúi he’ívo: “Jesús niko Ñandejára!” noñe’ẽi ramo hína Espíritu santo rupi.

Tupã reroviahakuéra apytépe heta oĩ Espíritu Santo ome’ẽ hague opaichagua mba’e kuaa. Ha umi mba’e umíva me’ẽha, peteĩ Espíritu añónte. Hetaichagua ijapopyrã oĩ, ha umi tembiapo umíva, peteĩ Tupã añónte ome’ẽ ojejapo haguã.

Pe pokatu niko ojechauka opáicha, ha upéicha ramo jepe, peteĩ Tupãnte pe ipokatu rupi, ojapóva opa mba’e opavavépe guarã. Espíritu Santo ojekuaauka peteĩ teĩ rupi, opavavépe iporã haguãicha.

Yvypóra rete niko, oiko ramo jepe heta mba’égui, peteĩnte. Upéicha avei Cristo. Ha upeichaite avei opavave ñande, judío térã judio’ỹva, tembiguái térã tembiguai’ỹva, ñañemongarai va’ekue jaiko haguã peteĩ tete ramo, peteĩ Espíritu año rupi. Ha oñeme’ẽ opa ñandéve jay’u haguã upéva upe Espíritugui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SECUENCIA
Eju, Espíritu Santo, embou yvágagui nde resape hesakã porãva.
Eju, ore Ru, eju eme’ẽ oréve neremikuave’ẽ, eju ore resape.

Angapyhyhára nemarangatuetéva, nde niko eñangareko ore ánga rehe, yvypórape remonguera.
Nde niko embopytu’u omba’apóvape, oreangapyhy ha orembovy’áva ore rasẽ ramo.

Eike nemba’e rendy marangatu rehe nde rehe ojeroviáva py’a mbytetépe.
Ne pytyvõ’ỹ rehe ndorekói yvypóra, mba’eve imarangutúva.

Emopotĩ ore angaipa, emyenyhẽ ore rekove ha emonguera ore mba’asy.
Orembopy’a marangatu, nde rupi ta ore py’a porã ha toroguata tape porãre.

Eipytyvõ nde rehe ojereviávape tohupity ne remime’ẽ marangatu.
Ehepyme’ẽ ore rekove porã, eipysyrõ ore ánga, ha eme’ẽ oreve vy’a opave’ỹva.

ALELUIA
Aleluia.
Eju Espíritu, emoenyhẽ nde rehe ojeroviáva rekove emokyre’ỹ ichupekuéra ne mborayhúpe.
Aleluia.

EVANGELIO
Marandu Ñandejára Jesucrísto rekove ha hemimbo’e San Juan omombe’u háicha 20, 19-23

Opavave: Romomba’e guasu ndéve, Ñandejára.

Upe árape voi, pe semana ñepyrũha ára pyharépe umi Jesús disípulo okyhyjégui hudíokuéra ruvichágui oñembyaty peteĩ koty ñembotypýpe. Ha upe Domíngo pyhare voi, Jesús ou sapy’a oñemoĩ mbytépe kuéra. Omomaitei chupekuéra he’ívo: — Ta pende py’aguapy joaitéke.

Upéva he’ipávo, ohechauka chupe kuéra umi ipo ha pe ijyke ojekutu hague. Tuicha ovy’a hikuái ohechávo Ñandejára Jesucrístope. Upéi katu Jesús omomaitei jey voi chupe kuéra: — Py’aguapy toĩ pene ndive. Che Ru che mbou haguéicha, che pomondo peẽme.

Upévo, oipeju hesekuéra ha he’i: — Ame’ẽ peẽme Espíritu Santo. Oimeraẽvape peẽ peperdonáva ipekádo, Ñandejára ave operdonáta chupe. Ha napeperdonái ramo katu, Ñandejára ave noperdona mo’ãi chupe.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.