DOMINGO SEGUNDO DE ADVIENTO

LECTURA PETEÎHA:

Ko’ágã ñahendúta Tupã Ñandejára ñe’ẽ Baruc arandukápe oĩ háicha 5, 1-9

Eipe’a, Jerusalén, umi nde ao remonde va’ekue reñembyasy haguã, ha eheja Tupã ta ne monde heko mimbipápe opa árape guarã.
Ahojáicha Tupã reko joja ta ne ñuã, ha ne akã ári to guapy Tupã, opa ára oikovéva, reko mimbipa.

Tupã ohechaukáta opavavépe mba’eicha itépa ne porã. Tupã omoĩta ndéve nde rerarã opa árape guarã he’iséva: “Py’a guapy oúva teko jojágui” ha “Mba’e tuicha oúva oñemomba’égui Tupãme”.

Epu’ã Jerusalén, ha ejupi amo yvate, emaña mombyry kuarahy resẽ gotyo, ha ehecha ne membykuéra oñembyatýva kuarahy resẽ ha kuarahy reike guio, Tupã Marangatu oipotágui. Vy’a pópe ou hikuái, Tupã imandu’águi hesekuéra. Yvy rupi ogueraha va’ekue umi
ohayhu’ỹva ichupekuéra, ha ko’ágã Tupã ogueru jevy ndéve mburuvicha guasu ojereru háicha iguapyhápe.

Tupã he’íma yvytykuéra ipe haguã, ha ipyko’ẽha henyhẽ haguã, to joja porã yvy, Israel upe rupi ohasa haguã. Tupã reko mimbipa oisãmbyhy ichupekuéra. Yvyrakuéra hyakuã porãva opu’ãne avei omokuarahy’ã Israélpe, Tupã upéicha oipotágui.

Tupã omyakãta Israélpe ha ha’ekuéra ovy’áta heko mimbipa resapépe, ha oikuaáta Tupã mborayhu ha heko joja.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 125, 1-6
Opavave: Ñandejára ojapo tuicha mba’e ñande rehe
O bien:

Ñandejára ojapo va’ekue ijojaha’ỹva. Aleluia
Ore Jára ore reraha jevy ramo guare Siónpe
iñapytĩmby rojerereko haguégui tetã mombyrýpe,
ha’ete vaicha ku ore képe rohecha va’ekue
Upe ramo ropuka reípa vy’águi ha rosapukái joa va’ekue. O.

Ambue tetã rupi oje’e ore rehe:
“Tuichaite mba’e niko Ñandejára ojapo hesekuéra”.
Tuicha mba’e Ñandejára ojapo va’ekue ore rehe.
Ha tuicha rovy’a va’ekue upe ramo. O.

¡Ore Jara! Eme’ẽ jevy oréve umi mba’eta roguereko va’ekue,
ku ama omyenyhẽ háicha umi ysyry.
Umi tesaýpe oñemitỹ va’ekue
vy’a pópe omono’õne ikoga’a. O.

Upe tesaýpe osẽva
mba’e ra’ỹi ipo renyhẽ oñotỹ haguã
vy’a pópe ou jevýne
koga’a apesã ipópe. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ San Pablo ohai va’ekue Filipos guápe 1, 4-11

Che pehenguekuéra: Che mandu’a vove pende rehe ame’ẽ che aguyje Tupã che Járape, ha añembo’évo, katu ete ajerure vy’apópe pende rehe, ñamba’apo va’ekue niko oñondive marandu porã ñemoerakuãme, iñepyrũha guive ko’ágãite peve. Aikuaa porã Tupã, omoñepyrũ va’ekue hembiapo pende pype, omoguahẽtaha hu’ãme Jesucrísto ou jevyha ára peve.

Hekopete aha’arõ upéicha pende hegui, poguerekógui che py’a ruguaitépe, ha peẽ pehupity hague rehe che ndive pe py’a porã Tupã ohechauka va’ekue chéve, ta ha’e aimérõ kárselpe térã mburuvichakuéra renondépe añe’ẽ haguã marandu porã rehehápe.

Tupã oikuaa mba’eichaitépa pohechaga’u opavavépe, Cristo Jesús niko omoĩ che pype pohayhu haguã che py’aite guive. Añembo’érõ ajerure imborayhu tokakuaave ohóvo, ha Tupã tome’ẽ peẽme mba’e kuaa ha arandu, peiporavo tapia haguã pe iporãvéva.

Upéicha ikatúta pende reko potĩ ha peguata tenonde peñepysãnga’ỹre. Cristo ou jevyha ára peve. Peẽ niko peraháta pende po renyhẽte tembiapo porã, Jesucrísto rupi, Tupã ojererohory ha oñemomba’e guasu haguã.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Lc 3, 4. 6
Aleluia.
Pembosako’i Ñandejárape háperã pejapo ichupe tape ikarẽ’ỹva
Opavave ohechane Tupã oporopysyrõha”.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 3, 1-6

Mburuvicha guasu Tiberio 15 áño omanda haguépe Rómape, Poncio Pilato omanda upe jave Judéape. Herodes oisãmbyhy Galilea ha Filipo, ityke’ýra anga katu, Iturea ha Traconítide. Lisanias katu mburuvicha Abilénepe. Anás ha Caifás, mokõivéva pa’i guasu va’ekue upérõ.

Umíva umi árape, Tupã oñe’ẽ Juán, Zacarías ra’ýpe, desiértope, ha opa rupi rrío Jordán rembe’y rupi, Juan oiko he’i opavavépe oñemboja vaerãha Tupãre ha oñemongaraika va’erãha, Tupã oheja rei haguã chupe kuéra hembiapo vaikue. Kóva ojehu oĩ háicha proféta Isaías kuatiápe: Oĩ osapukáiva desiértope: “Pembosako’i Ñandejárape haperã, pejapo chupe tape ikarẽ’ỹva.

Umi ñu ipyko’ẽha henyhẽmba va’erã, sérro ha lóma oñembojoja va’erã, umi tape ikarẽva naikarẽvéima va’erã, ha umi ivaíva toñemyatyrõ.
Opavave ohecháne Tupã oporosalvaha.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.