DOMINGO VIGÉSIMO NOVENO DURANTE EL AÑO

LECTURA PETEÎHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 53, 10-11

Jeiko asýpe, Ñandejára ojopyse va’ekue ichupe. Ha oñeme’ẽ hague rehe jeiko asýpe tembiapo vaikue rehe, oikove pukúta ha ohecháta iñemoñare. Ñandejára rembipota oikóta ha’e rupi.

Hetaite oiko asy rire, ohechata ára sakã, ha ovy’áta oikuaávo. Ñandejára rembiguái marangatu oipe’áta ivaívagui hetápe, oguerahátagui ijape rehe umíva reko vaikue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 32, 4-5. 18-20. 22
Opavave: Ñandejára, ne mborayhu ta ore añuãmba

Upe Ñandejára he’íva niko añete, ha opa mba’e ojapo teko jeroviápe.
Ha’e ohecha ramo teko joja ha opa mba’e hendápe ojejapóva.
Yvy niko henyhẽ chovi imborayhúgui. O.

Ñandejára katu oñangareko umi ichupe omomba’évape
ha imborayhu rehe ojeroviávape.
Umívape ha’e ndo hejái omano.
Omoingove katu ichupekuéra ñembyahýi guasu ou jave. O.

Ñandejára ore mbopy’a rory ha héra marangatu rehe rojerovia.
Ñandejára, ne mborayhu ta ore añuãmba.
Upéva roha’arõ nde hegui. O.

LECTURA MOKÕIHA:
Ko’ágã ñahendúta kuatia ñe’ẽ ojehai va’ekue Hebreoskuérape 4, 14-16

Che pehenguekuéra: Jesús, Tupã Ra’y, hína ñande Pa’i Guasu oike va’ekue yvágape. Upéva rehe akói ñane mbarete va’erã ñande jeroviápe.

Jesús, ñande Pa’i Guasu, ikatu ñande poriahuvereko ñane kangyhápe, ha’e voi niko ojepy’a ra’ã va’ekue ñandéicha. Ha’e
ndoguerekóinte mba’eveichagua angaipa. Ñañe mboja, aipo ramo, jerovia reheve Ñandejára ñande rayhu etéva guapyhápe, ha’e ñande
poriahuvereko haguã ha ipy’a porãgui ha ñane pytyvõ haguã ñaikotevẽ jave.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mc 10, 45
Aleluia.
Che, yvypóraicha aju va’ekue, niko ndajúi che rembiguairã rekávo, aikóvo tembiguái ramo katu ha ame’ẽvo che rekove anohẽ haguã
hetápe ivaívagui.
Aleluia.

EVANGELIO
Marandu porã Ñandejára Jesucristo rekove ha hemimbo’e San Marcos omombe’u háicha 10, 35-45

Upérõ Santiágo ha Juan, Zebedeo ra’y mokõivéva, oñemboja Jesús rendápe, ha he’i chupe: — Mbo’ehára, romba’ejerurese niko ndéve.
Jesús oporandu chupe kuéra: — Mba’éiko peipota.

He’i hikuái chupe: — Ágã reguapývo ne rréinope, na eheja oréve toroguapy mokõive nde ykére.

Jesús he’i chupekuéra: — Ndapeikuaái ete mba’épa pejerure hína. Peime nga’u piko pehasa asy haguãicha, che ahasa asytaháicha.

Ha’ekuéra he’i: — Héẽ, roime.

Jesús he’i chupekuéra: — Añete ha’e peẽme, peẽ pehasa asy vaivéta hína che hegui. Peguapy haguã che ykére katu, nda’ijái chéve ame’ẽ avavépe. Che ru upéva ome’ẽta umi ha’e oiporavo vaekuépe.

Umi 10 idisípulo ohendúvo upéva, ipochypa Santiágo ha Juan ndive. Ha Jesús ohenói chupekuéra ha he’i: — Peẽ niko peikuaa umi rrománo kuéra, he’íva ijehe ñande ruvichaha, mba’éichapa ipo pohýi ñane ndive. Peikuaa avei mba’éichapa poguasukuéra ojopy umi ipo guýpe oĩva ndive. Pende apytépe katu ndaupéichai va’erã.

Upéva rangue, pe tuichaséva pende apytépe toiko pene rembijokuái ramo. Ha pe itenondeséva pende apytépe, toiko opavave

rembiguáirõ. Che niko ndajúi tembiguái rekávo. Aju aiko haguã tembiguáirõ ha ame’ẽ haguã che rekove ojesalva haguã heta.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.