DOMINGO VIGÉSIMO SÉPTIMO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha 2, 4b. 7a. 18-24

Ñandejára ojapo ramo guare opa mba’e, ndaipóri va’ekue gueteri mba’eveichagua yvyra ra’y ha naheñóiri mba’eve yvy ári, nomongýigui ha ndaipórigui avei avave omba’apóva yvy rehe. Yvy guýgui katu osẽ yvu omohe’õva yvy ape. Upéma ramo Ñandejára ojapo ñai’ũgui kuimba’e ha oipeju itĩnguápe ipytu oporo moingovéva.

Upéi Ñandejára he’i: “Kuimba’e naiporãi oiko ha’eño. Ajapóta ichupe iñirũrã, peteĩ oipytyvõ va’erã ichupe”. Upéma ramo Ñandejára ojapo ñai’ũgui opaichagua tymba ha guyra, ha ogueraha kuimba’e rendápe ha’e ombohéra haguã. Ha opa ite tymba opyta héra, ombohéra haguéicha kuimba’e. Kuimba’e ombohéra mymba, guyra ha tymba saite ha ijapytépekuéra ndojuhúi oipytyvõva ichupe ha’e oikotevẽháicha.

Upéma ramo Ñandejára omonge hatã kuimba’épe. Ha oke aja, oipe’a ichugui peteĩ kãngue ijyke pegua ha upéi omboty jevy upe ikãngue rendague. Upe ikãnguégui ojapo peteĩ kuña, ha ogueraha kuimba’épe. Ha ha’e ohechávo he’i: “Kóva katu che kãngue ha che ro’ógui osẽva, hérata ‘kuña’ osẽre kuimba’égui”.

Upéva rehe kuimba’e oheja itúva ha isýpe, ojoaju hembireko ndive, ha oiko mokõivégui peteĩ tekovénte.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 127, 1-6

Opavave: Ñandejára ta ñande rovasa opa ára jaikove aja

Revy’a va’erã Ñandejára rehe rejerovia ramo,
ha reiko ramo ha’e oipota háicha.
Nde ry’ái repykuégui rekarúne,
revy’áne, ha opa mba’épe resẽ porãne. O.

Nde róga pýpe ne rembireko ojoguáta
ku parral hi’a hetávape.
Ne mesa jere rehe katu nde ra’y ha nde rajy kuéra
ojoguáta umi yvyra roky pyahúpe. O.

Ñandejára ta nde rovasa Sión guive
reikove aja pukukue. Reikovéta rehecha haguã
mba’éichapa Jerusalén opu’ã. O.

Ha reikovéta rehecha haguã nde ra’y ra’yrépe.
Py’a guapy toĩ Israélpe. O.

LECTURA MOKÕIHA:
Ko’ágã ñahendúta kuatiañe’ẽ ojehai va’ekue Hebreoskuérape 2, 9-11

Che pehenguekuéra: Jahecha mba’éichapa Jesús, Tupã omomichĩmive va’ekue sapy’ami Ánhel kuéragui, yvate ohupi ha omomba’e guasu ichupe, pe omano haguéicha omano rupi. Tupã, ohechaukávo imborayhu ñande rehe, oheja omano ñande rehehápe.

Opa mba’e oĩ Tupãme guarã ha Tupã ojapógui, oipotáva opa ta’ýra oike heko mimbipápe. Upéva rehe Tupã, Jesucristo ohasa asy rupi, ojapo va’erã va’ekue ichugui peteĩ ivai’ỹva mba’evépe, oporopysyrõva. Opavave niko peteĩnte itúva, umi imarangatúva ha pe oporomo marangatúva. Upéva rehe, Tupã Ra’y notĩri he’i haguã hesekuéra ipehẽngueha.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 1Jn 4, 12b
Aleluia.
Jajoayhu ramo, Ñandejára oĩ ñande pype ha imborayhu oĩ hekopete ñande pype.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 10, 2-16

Upérõ oĩ mimi fariséo kuéra oñembojáva Jesús rendápe ombopakova pireségui chupe hikuái. Oporandu hikuái Jesúspe ikatúnepa ménakuéra opoi hembirekógui. Jesús he’i chupe kuéra: — Mba’éiko he’i Moises léipe.

Ha’ekuéra he’i chupe: — Moises léipe niko he’i ikatuha japoi ñane rembirekógui ñame’ẽma guive chupe kuatia. Upéva reheve ñamosẽ kuaáma ñande rógagui.

Ha Jesús he’i chupekuéra: — Pende py’a hatãguinte Moises oheja va’ekue peẽme upéva pe léi. Iñepyrũmbýpe niko Ñandejára ojapo va’ekue kuimba’e ha kuña. Upévare, kuimba’e oheja itúva ha isýpe, ha ojoaju hembireko ndive.

Mokõivéva oiko peteĩcha. Ndaha’e véima mokõi. Upévare, umi Ñandejára ombojoaju va’ekue ndaikatúi avave oipe’a ojuehegui.
Oguãhẽ rire hikuái hógape, idisípulo kuéra oporandu jey chupe ko’ã mba’ére.

Jesús he’i chupekuéra: — Oimeraẽva opoíva hembirekógui ha upéi omenda jeýva, omyakãratĩ hína hembirekópe. Ha peteĩ kuña opoírõ iménagui ha upéi omenda jey, ha’e ave omyakã ratĩ iménape.

Upe jave ogueraha hikuái mitã mimi Jesús rendápe opoko haguã hesekuéra.

Umi idisípulokuéra katu omongavaju umi mitã oguerúvape. Jesús ohechávo péva ipochy chupekuéra, ha he’i: — Peheja umi mitã tou che rendápe. Ani pejoko. Ñandejára Réino niko mitãme guarã ha umi mitãicha oikóvape guarã.

Añete ha’e peẽme, pe ndojeroviáiva Ñandejárare ko’ã mitãicha ndoike mo’ãi Ñandejára Réinope. Ha ohupi ijyva ári umi mitã. Omoĩ ipo hesekuéra ha ohovasa.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.