DOMINGO XVII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Reyes aranduka mokoĩhápe oĩ háicha 4, 42-44

Upéi oguahẽ peteĩ kuimba’e Baal Salisa pegua oguerúva Eliséope 20 pan cebada oñembojy ramova tatakuápe, ha trígo ku’i pyahu ivosápe. Upéma ramo Eliseo he’i hembiguáipe: Eme’ẽ umi héntepe to’u.

Hembiguái katu he’i ichupe: ¿Mba’éicha piko ame’ẽta kóva 100 tapichápe?
Ha Eliseo he’i: Eme’ẽ ichupekuéra to’u, Ñandejára he’ígui ho’úta ha hembypataha.

Pe tembiguái ome’ẽ ichupekuéra; ho’u hikuái ha hembypa, he’i haguéicha Ñandejára.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 144, 10-11. 15-18

Opavave: Nde pojera rupi ore renyhë mba’e porãitágui.

Opa ne rembiapokue ta ne momba’e guasu Ñandejára,
opa nde rehe ojeroviáva ta ne momba’e guasu.
Ha’ekuéra to myerakuã tuichaha upe ne retã,
ha’ekuéra toikuaauka nde ne mbareteha. O.

Opavave omoĩ nde rehe hesa nde remongaru haguã ichupekuéra hi’árape.
Reipe’a nde po, ha ne mba’e porãme
remohyvatã opaichagua oikovévape. O.

Ñandejára heko joja opa hapépe,
ha’e ipy’a porã opa mba’épe.
Ha’e oñemoaguĩ umi oñembo’éva rehe,
umi ipy’a ite guive ichupe oñembo’évape. O.

LECTURA MOKÕIHA:

Ko’ágã ñahendúta Tupã Ñandejára ñe’ẽ Pablo ohai va’ekue Éfeso guápe 4, 1-6

Che, añemoakãsã va’ekue ha aiméva préso Ñandejára rehehápe, ajerure peẽme peiko haguã umi Ñandejára ohenói va’ekuépe oiko va’erã háicha. Anítei pejejapo, pende rory uvei ojupe.

Anítei pende pochy rei, pejohecha kuaa uvei, joayhupópe. Ha pe py’a guapy rupi, pene mbojoajupáva oñondive, peñeha’ã peiko peteĩcha, Espíritu Santo ome’ẽháicha. Ñande niko opavave peteï tete añónte, ha peteĩnte avei pe Espíritu. Ha peteĩ mba’e peha’arõ haguãnte avei pene renói va’ekue Tupã.

Ñandejára niko peteĩnte, peteĩchante jajerovia Ñandejára rehe ha peteïchante ñañe mongarai va’ekue. Peteĩnte hína Ñandejára ha opavave Túva ha’e, oĩva opa mba’e ári, ojapóva hembipota opavave rupi ha oĩva opavavépe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Lc 7, 16
Aleluia.
Ohechávo upéva, maymáva okyhyje ha oñepyrũ omomba’e guasu hikuái Tupãme. He’i hikuái: Peteĩ maranduhára mba’e guasúva ou ñande apytépe.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Juan omombe’u háicha

6, 1- 15

Opavave: Romomba’e guasu ndéve, Ñandejára.

Upérõ Jesús ohasa Lágo Galiléa mboypýri, hérava avei Tiberias. Ha heta oĩ ohóva hapykuéri, ohechágui ha’e kuéra umi milágro ojapóva Jesús

omonguerávo hasývape. Jesús ojupi peteĩ sérro ru’ãme ha oguapy upépe idisípulokuéra ndive. Hi’aguĩma upérõ Páskua, judíokuéra arete.

Jesús ohechávo hetaha umi hapykuéri ou vaekue, osẽ he’i Felípepe:— Moõ piko jajuhúta tembi’u ñamongarupa haguã ko’ãvape.

Jesús he’i reínte péicha Felípepe, ohecha haguã mba’épa ha’e he’i. Jesús niko oikuaáma voi mba’épa ojapóta. Felipe he’i chupe:— Opavavépe jahupytykátarõ michĩmínte jepe niko ñaikotevẽ amo 1 áñope ñaganáva.

Upépe Andrés, Simón Pedro ryvy ha Jesús disípulo avei, he’i Jesúspe:— Oime niko árupi peteĩ mita’i oguerekóva 5 pan seváda ha mokõi pira.

Umíva jepe niko ndaha’éi mba’eve ko’ã genteta peguarã.

Kapi’ipe porã niko upépe, ha Jesús he’i idisípulo kuéra omboguapypa haguã opavavépe. Oĩ upépe amo 5.000 kuimba’e rupi. Upéi Jesús ojagarra umi pan, ha ome’ẽ rire grásia Ñandejárape, oipehe’ã ha ome’ẽ opa umi oguapývape.

Péicha avei ojapo umi pira reheve. Ha ome’ẽ chupe kuéra ho’useha peve. Hyvãtãmba rire, Jesús he’i idisípulokuérape:— Pembyaty pe hembýva, ani haguã oñehundi rei.

Ha ombyaty ha omyenyhẽ hikuái 12 ajaka renyhẽ umi 5 pan rembyrégui. Ha ohechávo hikuái ko milágro Jesús ojapóva he’i:— Kóva niko hína ku proféta ou vaerãva ko yvy ári.

Jesús ohecha kuaávo mbaretépe oguerahaseha chupe hikuái omoĩ haguã chupe irréykuéra ramo, ojupi chuguikuéra pe sérro ru’ãme ha’eño oĩ haguãme.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.