MIÉRCOLES XXI DEL TIEMPO ORDINARIO
24 agosto, 2021VIERNES XXII DEL TIEMPO ORDINARIO
3 septiembre, 2021LECTURA PETEÎHA:
Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 4, 1-2. 6-8
Moisés he’i Israel ñemoñarépe: Pejapo ramo opa ko’ã tembiapoukapy che amyesakãva peẽme, peikovéta ha peñe momba’éta pe yvy rehe, Ñandejára pende ru ypykue jára ome’ẽtava peẽme. Ani pemoĩ hetave térã peipe’a mba’eve pe che amoĩvagui. Pejapo Ñandejára rembiapoukapy che ame’ẽ va’ekue peẽme.
Pejapo oĩ háichaite, ikatu haguã umi tetã ambuegua ohecha pene akã guapyha. Ha’ekuéra ohendúvo ko’ã tembiapoukapy he’íta hikuái pende rehe: “Iñakã porã ha iñarandu etépa ko’ã tetãgua!” Ha peichaite hína: Máva piko pe tetã tuichaitéva, oguerekóva peteĩ Tupã hi’aguĩ etéva ichugui jarekoháicha ñande Tupã, ha’e ñane rendu haguã ñahenói vove ichupe ñaikotevẽ ramo hese, ha máva piko pe tetã tuichaite, oguerekóva tembiapoukapy peicha ite peve heko jojáva ko’ãicha che ahechaukáva peẽme ko’ágã?
Tupã Ñandejára Ñe’ẽ.
Opavave: Romomba’e guasu ndéve, Ñandejára.
SALMO ÑEMBOHOVÁI 14, 2-5
Opavave: Ñandejára, mávapa oguahẽta nde reikohápe?
Upe hembiapo porã ha heko jojáva, upe añete guánte he’íva ipy’aite guive,
upe oñe’ẽ vai’ỹva hapicha rehe. O.
Upe ojapo’ỹva ivaíva hapicha rehe,
upe oiko vai’ỹva hapicha ndive,
upe ndohecha ramoiva hembiapo vaívape,
umi Tupãre ojeroviávape omomba’éva. O.
Upe he’íva ojapóva ohasa asy ramo jepe,
pe plátare omoĩ vai’ỹva hapichápe.
Upe ojapóva ko’ã mba’e, ndo’ái chéne araka’eve. O.
LECTURA MOKÕIHA:
Ko’ágã ñahendúta Tupã Ñandejára ñe’ẽ Santiago kuatiañe’ẽpe oĩ háicha 1, 17-18. 21b-22. 27
Che pehenguekuéra: Opa mba’e porã ha hekopegua oñeme’ẽva ñandéve, ou yvatégui, Ñandejáragui, ojapo va’ekue mbyjaita yvága pegua. Ñandejára, heko peteĩnte opa ára, ha’e naiñambuéi ha naiñypytũi.
Ha’e, upéicha oipotágui, ñane moingove pyahu iñe’ẽ añete rupi. Ha upéicha oiko ñande hegui opa mba’e ha’e ojapo va’ekuégui, tenondegua. Ha perohory py’a porãme upe ñe’ẽ oñeñotỹ va’ekue pende py’ápe ha ikatúva pende pe’a angaipágui.
Pejapo Ñandejára ñe’ẽ he’íva ha ani pehendúnte, ani haguã peñe mbotavy pende jupe voi. Tupã mborayhu ipotĩ ha imarã’ỹva Ñandejára ñande Ru renondépe hína: Ñaipytyvõ umi ityre’ỹ ha viudakuérape opa hemikotevẽme, ha ñañe ñangareko yvy arigua teko ky’águi.
Tupã Ñandejára Ñe’ẽ.
Opavave: Romomba’e guasu ndéve, Ñandejára.
ALELUIA Sant 1, 18
Aleluia.
Ha’e, upéicha oipotágui, ñane moingove pyahu iñe’ẽ añete rupi. Ha upéicha oiko
ñande hegui opa mba’e ha’e ojapo va’ekuégui, tenondegua.
Aleluia.
EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 7, 1-8. 14-15. 21-23
Opavave: Romomba’e guasu ndéve, Ñandejára.
Upérõ oñemboja Jesús rendápe umi fariséo ha Moises léi ombo’éva. Ou hikuái Jerusaléngui Jesús rendápe. Ohecha hikuái oĩha Jesús disípulokuéra apytépe okarúva ojepohei’ỹre. Mayma hudíova niko ndokarúiva ojepohéi porã’ỹre.
Péicha oheja vaekue chupe kuéra ojapo haguã ijypy kuéra. Oho ramo oñemu katu ndo’úi hikuái mba’eve ojogua va’ekue ojohéi mboyve. Ha umíva apytépe avei, ojohéi térã omopotĩ mante vaerã umi hembiporu oiporúva okaru haguã téra hoy’u haguã.
Upévare fariséo ha Moises léi ombo’éva oporandu Jesúspe: —Mba’éreiko nde disípulokuéra ndojapói hekópe umi mba’e ñande ypykue oheja vaekue ñandéve. Okaru niko hikuái ojepohei’ỹre.
Jesús ojere he’i chupekuéra: — He’i porã vaekue voi proféta Isaías peẽichagua tova mokõire, ohai ramo guare: “Ko’ãva ijurúpente che momba’e, ipy’apýpe katu mombyry oĩ chehegui. Reíko che momba’e guasu hikuái, ha ombo’e ku che ahejárõ guáicha umi mba’e ha’e kuérante omoĩva ojejapo haguã.”
Peẽ niko pemboyke Ñandejára léi pejapo haguã umi mba’e peẽnte pejéva. Upéi Jesús ohenói opavavépe ha he’i chupekuéra: — Pe che rendúke opavave, jahecha nahesakãipa peẽme ko ha’étava.
Mba’eve ja’úva niko na ñane mongy’ái. Umi mba’e ñane korasõgui osẽvante pe ñane mongy’áva. Ñane korasõgui niko osẽ opa mba’e vai, jejuka, ñemyakãratĩ, teko vai, monda, japu, ha ñe’ẽ rei ñande rapicháre. Opa ko’ã mba’e vai osẽ ñane korasõgui ha ñane mongy’a.
Ñandejára Jesucrísto Ñe’ẽ.
Opavave: Romomba’e guasu ndéve, Ñandejára Hesukrísto.