LECTURAS DEL 22 DE DICIEMBRE: FERIA DE ADVIENTO

LECTURAS DEL 22 DE DICIEMBRE: FERIA DE ADVIENTO

Ko’ágã ñahendúta Tupã Ñandejára ñe’ẽ 1 Samuel arandukápe oĩ háicha  1, 19b-20. 24-28

Elcaná oñeno hembireko Ana ndive ha Tupã Ñandejára imandu’a Ana rembijerurére. Péicha Ana opyta hye guasu. Ha oñembotývo hi’ára, imemby peteĩ mitã kuimba’e ha ombohéra ichupe Samuel, ojerure haguére Tupã Ñandejárape.

Pe mitã nokambuvéi rire, ogueraha ichupe tupao Sílope. Ogueraha avei mbohapy tóro ra’y, 22 kílo trígo ha peteĩ vino ryru. Imemby imitã gueteri upérõ. Ojuka rire pe tóro ra’y ogueraha hikuái pe mitã pa’i Elípe. Ha Ana he’i ichupe: Nde karai, che niko pe kuña añembo’e va’ekue Tupä Ñandejárape nde ypýpe ko tupaópe. Ajerure va’ekueichupe ome’ẽ haguã chéve peteĩ mitã. Kóva ha’e. Upévare agueru ame’ẽ ichupe imba’erã, ha oikove aja oikóta hendive omba’apóvo ichupe itupaópe.

Upéi oñesũ hikuái Tupã Ñandejára renondépe.

Tupã Ñandejára Ñe’ẽ.

SALMO ÑEMBOHOVÁI 1 Sam 2, 1. 4-8abcd

Opavave: Tupã Ñandejára, che py’a ite guive roguerovy’a

“Tupã Ñandejára, che py’a ite guive roguerovy’a,

nde che mombarete pyahúgui.

Umi che rehe ija’e’ỹvare che yvytu,

nde che pytyvõ haguére avy’a rasa. O.

Ha’e omopẽ umi ipy’a guasuvéva hu’ykuéra,

ha umi ikangývape ha’e omombarete.

Umi hyvatã va’ekue, ko’ágã ochanga tembi’u rembyrére,

ha umi iñembyahýi va’ekue,  ko’ágã hyvatãmba. O.

Kuña ikatu’ỹ va’ekue imemby, ko’ágã 7 imemby,

ha pe imemby reta va’ekue, ko’ágã icha’ĩmba. O.

Tupä Ñandejára ome’ë mano ha tekove,

ñane mboguejy yvy kuápe, ha upégui ñane renohẽ jevy.

Tupã Ñandejára ome’ë momboriahu ha heta mba’e ñandéve;

ha’e ñande reity, ha ñane mopu’ã jevy. O.

Tupã Ñandejára omopu’ã mboriahúpe yvýgui,

ha yty apytégui mba’eve oguereko’ỹvape,

poguasu ykére ichupe omboguapy,

ha ijyvateve hápe ichupe omohenda. O.

ALELUIA

Aleluia.

Tetã Mburuvicha guasu ha Iglesia mopyendaha

eju ha eipysyrõ yvypóra nde rejapo va’ekue yvýgui.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha   1, 46-55

Upe ramo María he’i: Che ánga oguerohory Tupä Ñandejára ipu’akapávape; che espíritu hory Tupã Ñandejára, che pysyrõhára ndive. Tupã Ñandejára omoĩ hesa che, hembiguái míre, ha águi rire opa ára añehenóine ovy’áva; pe Ipu’akapáva ojapógui mba’e guasu ete che pype.

Héra marangatu!

Tupã Ñandejára oiporiahuvereko opa ára umi ichupe omomba’e guasúvape.

Ipokatu oipuru, ohundi umi ojejapóva rembiapo, omongúi iguapyhágui umi mburuvicha guasúpe, ha ohupi heko mirïvape.

Omoenyhë mba’e porãgui umi iñembyahýivape, ha po nandi omondo umi imba’e retávape. Oipytyvõ hembiguái Israélpe, ha ndahesaráiri oiporiahuvereko haguã, ha’e oñe’ẽ me’ẽ haguéicha ñande ru kuéra ypykue Abraham ha iñemoñarépe.

Ñandejára Jesucristo Ñe’ẽ.