LECTURAS DEL 6 ENERO: ÑANDEJÁRA JEHECHAUKA

LECTURAS DEL 5 ENERO: FERIA DE NAVIDAD

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha    60, 1-6

Epu’ã Jerusalén, mimbipápe ejaho’i, péina oguahẽma nde resapeha ha Tupã Ñandejára reko mimbipa hendy nde ári!

Pyhare ojaho’i yvy, ha tetãnguéra pytũme oñeñuã, Tupã Ñandejára katu nde ári ojajáita, ha heko mimbipa nde ári ojechaukáta.

Tetã nguéra oúta nde resapeha gotyo, ha mburuvicha guasukuéra ne ko’ẽju mimbi gotyo.

Ejesaupi ha ema’ẽ nde jere kuévo: opavave oñemboaty ha ou ne renda gotyo.

Ne memby kuimba’ekuéra oúta mombyrýgui, ne memby kuñanguéra ojererúta jyva ári.

Nde rehechavo ichupekuéra revy’a itereíta, nde py’a renyhẽta vy’águi.

Oguerúta hikuái ndéve mba’e repyeta tetã mombyrýgui.

Ome’ẽta hikuái ndéve heta mba’e tetãnguéragui oguerúva.

Kamélloita Efá ha Madiángui oúva nde aho’íta, Sabaygua ou joáta,

imbayrukuéra henyhẽ óro ha insiénsogui, omombe’u joávo imombe’upyrã Tupã Ñandejára ojapóva.

Tupã Ñandejára Ñe’ẽ.

SALMO ÑEMBOHOVÁI 72, 1-2. 7-8. 10-13

Opavave: Opavave tetãnguéra pemomba’eguasu Tupä Ñandejárape.

 Tupã Ñandejára, eme’ẽ mburuvicha guasúpe teko joja

ha mburuvicha guasu ra’ýpe teko potĩ,

ikatu haguãicha ne retã oisãmbyhy hekopete,

ha imboriahúvape ohecha kuaa. O.

  Nde rekovépe ta ipotyjera tekojoja

ha ta ne añua py’aguapy, jasy opaha ára peve.

toĩ ipo guýpe peteï ysyry guasu guive ambue peve,

ha ysyry guasu guive opaha peve arapy. O.

Mburuvicha guasu Tarsis ha tetã mombyrygua

to mba’e me’ẽ ichupe opa árape, mburuvicha guasu Sabá ha Sebá pegua

to me’ẽ ichupe hetã mba’e.

Opavave mburuvicha kuéra to ñemomichĩ henondépe.

Opavave tetãnguéra to ñemoĩ ipo guýpe. O.

Ha’e oguenohẽta imboriahúvape jejopy vaígui ojerure vove ichupe,

ha oikotevẽvape ndorekóiva mamo oho haguã.

Oiporiahuverekóne heko mirïva ha ojeheja reívape

ha ichupe oguenohẽne jejopy vaígui. O.

LECTURA MOKOÎHA:

Ñahendúta Tupã Ñandejára Ñe’ẽ San Pablo ohai va’ekue Éfeso guápe       3, 2-6

Che pehenguekuéra:

Pehendúmane ra’e Tupã Ñandejára imba’e porã rupi, ome’ẽ hague chéve amba’apo haguã pende apytépe. Tupä Ñandejára oikuaauka va’ekue chéve umi mba’e ha’énte oikuaáva ha ojaposéva, amombe’úma haguéicha peẽme mbykymi.

Upéva pehechávo, pehecha kuaáta che aikuaaha umi mba’e Tupã Ñandejárante oikuaáva Cristo rehegua, ha avavépe ndojekuaaukái va’ekue araka’eve. Ko’ágã katu, Tupã Ñandejára oikuaauka umi mba’e, ijapóstol ha imaranduhárakuéra marangatúpe Ijespíritu rupi.

Upe mba’e Tupã Ñandejára ndoikuaaukái va’ekue niko kóva: Marandu porã Cristo ogueru va’ekue rupi, Tupã Ñandejára ohenoiha opaichagua tetã guápe ha ohupityka ichupe kuéra umi ha’e ome’ẽ va’ekue imba’e teerã Israel guápe, peteïcha oiko haguã hikuái peteï tete rehegua ramo ha opavave ohupity haguã umi mba’e Tupã Ñandejára he’i va’ekue ome’ẽtaha.

Tupä Ñandejára Ñe’ẽ.

ALELUIA  Mt 2, 2

Aleluia.

Rohecha niko kuarahy resẽme mbyja ichupe omohenondéva,

ha roju romomba’e guasúvo ichupe.

Aleluia.

EVANGELIO

Ñahendúta Ñandejára Jesucrísto  rekove ha hemimbo’e San Mateo omombe’u háicha   2,1-12

Jesús onase va’ekue táva Belénpe, oĩva Judea yvýpe, mburuvicha guasu Herodes oikovépe ramo guare. Upéma ramo, oguahẽ Jerusalénpe, kuarahy resẽ guio, karai kuéra oikuaáva umi mba’e ojehútava mbyja kuéra rehe oma’ẽvo. Ha oporandu hikuái upépe:

Mamópa oime pe mitã ou va’ekue Israelgua kuéra ruvicha guasurã? Rohecha niko kuarahy resẽme mbyja ichupe omohenondéva, ha roju romomba’e guasúvo ichupe. Mburuvicha guasu Herodes oikuaávo upéva ipy’a tarova ite, ha Jerusalengua avei. Upéma ramo, mburuvicha guasu ohenoiuka pa’i ruvicha kuérape, Moisés rembiapoukapy mbo’eha kuérape, ha oporandu ichupe kuéra mamópa ou va’erã ra’e pe Mesías. Ha’e kuéra he’i ichupe: Táva Belénpe, oĩva Judea yvýpe. Maranduhára péicha omoĩ va’ekue kuatiápe he’i ramo guare:

“Ha nde Belén reiméva Judá yvýpe, na ne michĩvéi mba’eveichave ramo távakuéra apytépe upe tetã megua.

Nde hegui osẽta peteĩ mburuvicha guasu oisãmbyhýtava che retã Israel”.

Upéma ramo, Herodes ohenoiuka ha’eñoháme umi karai arandúpe. Ha oporandu ichupekuéra araka’etépa ohecha ra’e hikuái pe mbyja. Upéi omondo ichupe kuéra Belénpe he’ívo: Ta peho  ha peikuaa porã mamópa oime pe mitã. Pejuhu rire, peju che momarandu, che avei aha haguã amomba’e guasu ichupe. Mburuvicha guasu oñe’ẽmbami rire, umi karai oje’ói. Ha pe mbyja ohecha va’ekue hikuái kuarahy resẽvo, oho henonderã nguéra, opyta peve pe mitã oĩha ári.

Umi karai arandu tuicha ovy’a ohechávo pe mbyja. Ha oikévo pe óga ryepýpe, ohecha hikuái pe mitãme, isy María ndive. Oñesũ ha omomba’e guasu ichupe hikuái.

Upéi oguenohẽ ikarameguãgui ha ome’ẽ ichupe óro, insiénso ha mírra ryakuã porã. Ha Tupã omomarandu rire ichupekuéra iképe ani haguã oho Herodes rendápe, oje’ói hikuái hetãme ambue tape rupi.

Ñandejára Jesucrísto  Ñe’ẽ