LECTURAS DEL DOMINGO 3° DE ADVIENTO

LECTURAS DEL DOMINGO 3° DE ADVIENTO

LECTURA PETEÎHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 35, 1-6a.10

Ta hory yvy ojeiko’ỹha ha yvy iñapekãmbáva, to vy’a ha ta ipoty yvy perõ! Ta henyhẽ yvotýgui, ta hory, to sapukái vy’águi!

Ichupe oñeme’ẽ Líbano reko mimbi, Carmelo ha Sarón reko jegua. Ha’ekuéra ohechata Ñandejára omimbipávape, Tupã ojajaipávape ohecháta. Pemombarete ikangývape, pemokyre’ỹ ikane’õvape.

Peje ojepy’apývape: “Néike, ani pekyhyje!

Ápe oũ pene Tupã, ou omyengoviávo pende rehe ija’e’ỹvape ha’ete voi ou pende pe’ávo jejopy vaígui”.

Upe ramo umi ohecha’ỹva ohecháta, ha umi ohendu’ỹva ohendúta, paralítico guasúicha oñaníta ha iñe’ẽngúva vy’águi osapukáita.
Ou jevýta umi Ñandejára oipysyrõva; ha oikéta Siónpe sapukái ha vy’a pópe, ombojevygui ichupekuéra vy’a ijapyra’ỹva. Vy’a ha tory omoirũta ichupekuéra, ha mombyry opytáta pyahẽ ha vy’a’ỹ.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 146, 6-10
Opavave: Ñandejára, eju ore salva.

Ñandejára niko nopyrüi va’ekue iñe’ẽ rehe,
Oñemoĩ uvei ojejopy vaíva yke rehe,
omongaru iñembyahýivape.
Ñandejára opoiuka umi iñapytĩmbýpe ojeguerekóva. O.

Ñandejára omonguera umi ohecha’ỹvape ha ohecha jevy,
Ñandejára omopu’ã umi ikangývape,
Ñandejára ohayhu umi heko jojávape,
Ñandejára oñangareko umi mombyryguare. O.

Ityre’ỹ ha iména manóvape ha’e oipytyvõ.
Heko vaíva rape katu ombotyai.
Ñandejára niko mburuvicha guasu tapiaite guarã.
Oisãmbyhy Sión, nde Tupã opaite árape. O.

LECTURA MOKÕIHA:
Ñahendúta Tupã Ñandejára Ñe’ẽ Santiago kuatiañe’ẽme oĩ háicha 5, 7-10

Che pehẽnguekuéra, peha’arõ kuaa ou peve Ñandejára Jesucrísto. Pema’ẽmina mba’éichapa umi oñemitýva oha’arõ kuaa ama, upéi omono’õ haguã ikoga’a. Peẽke avei peha’arõ kuaa ha ani pene kangy, vokói eténte niko ou jevýta Ñandejára Jesucrísto.

Che pehẽnguekuéra, ani peñomoĩ vaítei, ani haguã avei peẽ penembojovake yvápe. Pejesarekóke Tupã oporombojovakeha ára niko hi’aguĩma hína. Che pehẽnguekuéra, pene mandu’áke umi maranduhára rehe oñe’ẽ va’ekue Ñandejára rérape, ha’ekuéra heta mba’e ogueropu’aka va’ekue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Is 61, 1
Ñandejára espíritu oĩ che pype,
Ha’e che mbou agueru haguã marandu pyahu mboriahukuérape.

EVANGELIO
Marandu porã Ñandejára Jesucrísto rekove ha hemimbo’e San Mateo omombe’u háicha 11, 2-11
Opavave: Romomba’e guasu ndéve, Ñandejára.

Juan Bautísta oĩva upérõ kárselpe, ohendu umi mba’e Cristo ojapóva. Upémarõ omondo idisípulokuéra apytégui Jesús rendápe. Ha’ekuéra oporandu chupe: – Nde piko hína pe Juan he’i va’ekue outaha, térãpa roha’arõ va’erã ambuépe.

Jesús he’i chupekuéra: – Tapeho peje Juánpe ko’ã mba’e peẽ pehecháva ha pehendúva peína.

Pemombe’u chupe ohecha’ỹva ohecha jeyha, paralítiko oguata porãha, lepróso okueraha, ohendu’ỹva ohendu jeyha, omanóva oikove jevyha ha imboriahúvape oñehendukaha marandu porã. Ha ovy’aiténe umi norrenegáiva che rehe che kuaa rire.

Juan remimbo’ekuéra ohokuévo, Jesús oñepyrũ oñe’ẽ hese opavavépe, ha he’i: – Peẽ pesẽ ramo guare peho desiértope, mba’e pehecha haguãpa peho ra’e. Pehechápa ra’e takuára yvytu ombovaváva.

Nahániri. Maerã aipo ramo peho. Pehópa pehecha peteĩ kuimba’e oñemonde jeguapávapa. Peẽ niko peikuaa porã umi oñemonde jeguáva oikoha mburuvicha guasu kuéra rógapente. Amo ipahápe, mba’e aipo ramo pesẽ pehecha. Peteĩ profétape, ajépa.

Upéicha añete. Ha pejuhu peteĩ mba’e guasuvéva profétagui katu. Juan rehe niko Ñandejára Ñe’ẽme he’i: “Che amondo che ñe’ẽ rerahaha ne renonderã, ombosako’i haguã ndéve nde raperã.”

Añetehápe ha’e peẽme, ndaipóri yvypórakuéra apytépe mba’e guasuvéva Juan Bautístagui. Opáichavo, pe michĩvéva Ñandejára Rréino pe, upéva mba’e guasuve chugui.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.