LECTURAS DEL DOMINGO 3º TIEMPO ORDINARIO

LECTURAS DEL DOMINGO 3º TIEMPO ORDINARIO

LECTURA PETEÎHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 8, 23 – 9,3

Iñepyrũrã Ñandejára oheja vai Zabulón ha Neftalí yvy, oĩva tetãnguéra ypýpe, ha upéi omoakã rapu’ã jevy. Umi yvy ojepyso Jordán mboypýri guive, yguasu rembe’y peve.

Tetãgua oikóva pytũmbýpe, ohecha peteĩ mba’e rendy tuicháva; umi pytũmbýpe oikóva ári, ohesape upe mba’e rendy. Remongakuaa tory, ha heta ojevy’a.

Opavave ovy’a ne renondépe, kóga ñemono’õme ramo guáicha, ovy’a háicha umi oñomboja’óva opa mba’e ñorairõme guare rehe. Mba’e pohýi ijati’ýre oĩva, mba’e pohýi ijape rehe oguapýva, inupãhára po pegua yvyra, remoangu’ipa, Madiánpe ramo guaréicha.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 26, 1. 4. 13-14
Opavave: Ñandejára upe che rekove ohesapéva, ha upe che pytyvõva.
Ñandejára upe che rekove ohesapéva,
ha upe che pytyvõva. Mávagui piko akyhyjéta?
Ñandejára oñangareko che rehe,
Máva piko che mongyhyjéta? O.

Peteĩ mba’énte Ñandejárape ajerure, peteĩ mba’énte aipota.
Tupaópe aikose aikove aja pukukue, hese ajepy’a mongeta haguã,
ha’e che mbopy’a rory haguã,
ichupe amomba’e guasu haguã. O.

Aikuaa Ñandejára imba’e porãtaha che ndive aikove aja pukukue.
Perovia Tupã Ñandejárape,
pende py’a guasúke ha ani pene ate’ỹ.
Añetehápe ha’e peẽme, pejerovia Ñandejára rehe. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩhápe Corinto guápe 1, 10-14. 16-17

Che pehẽnguekuéra, Ñandejára Jesucrísto rérape ajerure peẽme maymáva peiko haguã jekupytýpe ha ani pejoavypa oñondive. Peiko porã oñondive, pejepy’a mongeta ha peñeñandu peteĩcha. Ha’e peẽme péicha, che pehẽnguekuéra, aikuaágui Cloe rogagua rupi, oĩha jeiko vai pende apytépe.

Ha’ese, oimeha he’íva: “Che Pablo rehegua”, ambue katu “Che Apolo rehegua”, ambue “Che Cefas rehegua”, ha oimeve he’íva “Che Cristo rehegua”.

¿Cristo nga’u piko oñemboja’opa? ¿Pablo nga’u piko ojehupi kurusu rehe pende rehehápe? Térã piko peñe mongarai ra’e Pablo rérape? Ame’ẽ che aguyje Ñandejárape mavave peẽme namongaraíri hague rehe, Crispo ha Gayo rire!

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Mt 4, 23

Jesús oiko yvy Galilea rupi, ha oporombo’e umi judíokuéra tupao rupi.
Ha’e omoherakuã marandu porã Ñandejára Reino rehegua.
Hetápe avei omonguera opaichagua mba’asy ha mba’e vaígui.

EVANGELIO
Marandu porã Ñandejára Jesucristo rekove ha hemimbo’e San Mateo omombe’u háicha 4, 12-23
Opavave: Romomba’e guasu ndéve, Ñandejára.

Upe ramo Jesús ohendúvo Juan ho’a hague préso, oho jey Galiléape. Osẽ Nazarétgui ha oho Cafarnaúmpe, opytáva Lágo Galiléa rembe’ýpe.

Upépe niko oiko va’ekue yma Zabulón ha Neftalí ñemoñarekuéra. Péicha ou ojehu ku Isaías he’i va’ekue: Pehendu peẽ Zabulón ha Neftaligua peikóva lágo jerére, ha Jordán mboypýri. Ehendu nde, Galiléa, rembyatýva pytagua.

Peẽ peikóva pytũmbýpe, ko’ágã pehecháta tesape tuicháva. Peẽ peikóva ku pemanórõ guáicha ko’ágã peikovéta.

Upe guive Jesús oñepyrũ oñemoñe’ẽ. He’i: — Pejevy Tupã gotyo. Hi’aguĩma hína Ñandejára Reino.

Jesús oguata jave oikóvo lágo Galiléa rembe’ýre, ohecha Simón Pedro ha Andréspe. Ko’ãva niko ojoryvy, ha piráre ojeheka hikuái. Oity hína irréd ýpe. Jesús he’i chupekuéra: — Peju che moirũ.

Che ahechaukáta peẽme mba’éichapa peguerúta che rendápe che irũrã. Upepete voi oheja hikuái irréd, ha oho hendive. Ha ohomívo upégui, Jesús ojotopa Santiágo ha Juan ndive, ojoryvýva avei, Zebedeo ra’y mokõivéva. Oĩ itúva ndive hína hikuái, ha omyatyrõ irréd kanóape. Jesús ohenói chupekuéra, ha oguejy hikuái ikanóagui, oheja itúvape, ha oho Jesús ndive.

Jesús heta oiko Galiléa rupi. Oikémiva ombo’e tupaópe ha omoherakuã ñe’ẽ porã Ñandejára Reino rehegua. Hetápe omonguera opáichagua mba’asy vaígui.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.