LECTURAS DEL DOMINGO 7º TIEMPO ORDINARIO

LECTURAS DEL DOMINGO 7º TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Levítico arandukápe oĩ háicha 19,1-2.17-18

Upérõ Ñandejára he’i Moiséspe: Ere Israel guápe ko’ã mba’e ha’ekáva ichupekuéra: Ta pende reko marã’ỹ. Che hína opa mba’e Jára ha che reko marã’ỹ.

Ani pende py’aro pende rapicha ndive, ha oime ramo ojavy, peje ichupe upéva, ani oja pende rehe iñangaipa.

Ani pejapo ivaíva pene retãguare ojapo va’ekue ivaíva pende rehe, térã pende py’aro hendive. Pehayhu pende rapichápe pende jupéicha. Che hína pende Jára.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 102, 1-4. 8. 10. 12-13
Opavave: Amomba’e guasu Ñandejárape che py’aite guive

Amomba’e guasu Ñandejárape che py’aite guive,
nda che resarái chéne heta mba’e porã ome’ẽ hague chéve. O.

Ha’e oheja rei chéve che rembiapo vaikue ha che mongueráva opaichagua mba’asýgui.
Ha’e ndohejái apa yvy kuápe ha mborayhúpe che añuã ha che mokunu’ũ. O.

Ñandejára imba’e porã ha oporoporiahuvereko,
ndaipochy reíri ha oporohayhu.
Nomyengoviái ñandéve ñane angaipa,
ha ndojapói ñande rehe ojapo haguãicha. O.

Kuarahy resẽ mombyryháicha kuarahy reikégui,
upéicha omomombyry ñande hegui ñane angaipa.
Túva omokunu’ũháicha ita’ýrakuérape,
upéicha avei Ñandejára umi ichupe omomba’éva ndive. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩhápe Corinto guápe 3, 16-23

Che pehenguekuéra, ndapeikuaái nga’u piko peẽ Tupã rogaha, ha Tupã Espíritu oikoha pende pype? Oime ramo ohundíva Tupã róga, Tupã ohundíta ichupe, Tupã róga imarangatu ha upéva peẽ voi.

Aníke avave oñembotavy. Oime ramo pende apytépe oimo’ãva iñaranduha ko yvy arigua arandúpe, toiko jevy itavýva ramo, ikatu haguã iñarandu añete. Arandu ko yvy arigua niko, výro reiete Tupãme guarã. Ñandejára Ñe’ẽ voi niko he’i: “Tupã omoñuhã iñarandúvape, pe iñarandúpe voi”. Ha he’i avei: “Ñandejára oikuaa opa iñarandúva remiandu výro reiha”.

Upéva rehe, avave ndojejapói va’erã yvypóra ikatúva ojapo rehe. Opa mba’e niko pene mba’e: Pablo, Apolos, Cefas, ko yvy, jeikove, ñemano, ko’agãgua ha tenondevegua. Opa mba’e pene mba’e ha, peẽ niko hína Cristo mba’e, ha Cristo katu Tupã mba’e.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 1 Jn 2, 5
Aleluia.
Ojapo ramo iñe’ẽ katu, Tupã rayhu oĩ hekopete ipýpe ha ikatu jaikuaa ñane peteĩha hendive Aleluia.

EVANGELIO
Marandu porã Ñandejára Jesucristo rekove ha hemimbo’e San Mateo omombe’u háicha 5, 38-48
Opavave: Romomba’e guasu ndéve, Ñandejára.

Upérõ Jesús he’i idisípulokuérape: Peikuaa oje’e hague: “Oĩ ramo ohesa mombúva hapichápe, péva tojehesa mombu. Ohãi mopẽva hapichápe, péva toñehãi mopẽ.”

Che katu ha’e peẽme: “Ani pemyengovia pe ojapo vaívape pende rehe. Oĩ ramo nderova petéva, eheja tanderova pete jovái. Oĩ ramo nde rerahaséva karai juez renondépe oipe’aségui ndehegui nde ao, eheja togueraha nde ahoja ave. Ha oĩramo oguerojaukaséva ndéve peteĩ mba’e pohýi una légua, eraha chupe mokõi. Oĩ ramo omba’e jeruréva ndéve, eme’ẽ chupe. Oĩ ramo omba’e poruséva, eiporuka chupe.”

Peikuaa avei oje’eha: “Ehayhu nde rayhúvape, ha nde rayhu’ỹvape katu nahániri.” Che katu ha’e peẽme: “Pehayhu umi pende rayhu’ỹvape, ha pene mbohasa asývape. Peñembo’e hesekuéra. Péicharõ, pehechaukáta hína pejapoha upe pende Ru yvagapegua oipotáva. Ha’e niko oheja kuarahy ojope iñañávape ha ipy’a porãvape. Ha’e hína pe oguerúva ama umi hembiapo porãvape ha umi hembiapo vaívape. Pehayhúrõ pende rayhúvape año, piko mba’éicha Ñandejára omyengoviáta peẽme pene rembiapo.

Pláta mbyatyha jepe niko péicha avei ojapo. Ha pemomaitei ha peñakãity ramo umi peikuaáva añópente, piko mba’e iporãva oĩ upévape. Umi Ñandejárare ojerovia’ỹva jepe niko péicha ojapo. Peẽ katu pende py’a porã va’erã pende Ru yvága pegua ipy’a porãháicha.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.