LECTURAS DEL MARTES 2º TIEMPO ORDINARIO

LECTURAS DEL MARTES 2º TIEMPO ORDINARIO

Ko’ágã ñahendúta Tupã Ñandejára ñe’ẽ Samuel arandukápe oĩ háicha   16, 1-13

Tupã Ñandejára he’i Samuélpe: Araka’e pevépa rerombyasýta Saúlpe? Ndaipotavéima ha’e oiko Israel mburuvicha guasúrõ. Emoenyhẽ ñandyrýgui ne ñandy ryru ha tereho Jesé Belengua rógape. Aiporavóma Israel ruvicha guasurã peteĩ kuimba’e ita’ýrakuéra apytépe.

Samuel he’i ichupe: Mba’éichapa ajapóta? Saúl oikuaa ramo che jukáta.

Tupã Ñandejára he’i ichupe: Eraha peteĩ vakílla ha ere reikuave’ẽtaha chéve mymbajuka. Ere Isaípe toho mymbajuka hápe ha che ha’éta ndéve upe rejapo va’erã. Emboyke chéve mburuvicha guasurã upe che ha’étava ndéve.

Samuel ojapo upe Tupã Ñandejára he’i va’ekue ichupe. Oguahẽvo Belénpe, moakãhára  upe táva pegua osẽ huguãitĩvo tuicha kyhyje reheve ha oporandu hikuái ichupe: Rerúpa py’aguapy rejúvo karai marangatu?

Samuel he’i ichupekuéra: Ani pekyhyje, aju amymbajukávo Tupä Ñandejárape. Peñemopotĩ ha pe che moirũ mymbajuka hápe.

Upéi Samuel omopotĩ Jesé ha ita’ýrakuérape ha he’i ichupekuéra ou haguã mymbajuka hápe. Ha’ekuéra oguahẽvo Samuel ohecha upe héravape Eliab ha he’i ipype: “Katu ete kóva hína upe kuimba’e Tupã Ñandejára oiporavóva mburuvicha guasurã”.

Tupã Ñandejára katu he’i ichupe: “Ani rema’ẽ hova rehe térã ijyvatekuére. Che ndaipotái ichupe. Che nama’ẽi péicha. Peẽ pema’ë upe kuimba’e rováre, che katu ama’ẽ ipy’apýre.”

Upérõ Jesé ohenói Aminadábpe ha ombohasa Samuel rendápe; Samuel katu he’i: Kóvape ndoiporavói avei Tupã Ñandejára.

Upéi Jesé ogueru Samápe. Samuel katu he’i: Kóvape ndoiporavói avei.

Jesé ohechauka 7 ita’ýra Samuélpe, ha Samuel he’i ichupe avavépe ndoiporavoiha Tupä Ñandejára. Ipahápe oporandu ichupe: Ndaiporivéipa nde ra’y?

Jesé he’i: Oĩ gueteri upe michĩvéva oñangarekóva hína ovecháre. Samuel he’i: Ehenoiuka ichupe. Ha’e ou rire jaguapýta jakaru. Jesé ohenoika ichupe: upe mitã rusu hova pytã, hesa porã ha ijuky.

Tupã Ñandejára he’i Samuélpe: Kóva ha’e! Epu’ã emoingo ichupe mburuvicha guasúrõ.

Upépe voi Samuel oguenohẽ iñandyry ryru ha ityke’ýrakuéra renondépe omoingo Israel ruvicha guasúrõ upe mitã rusúpe hérava David. Upe guive Tupã Ñandejára espíritu oñemomba’e David rehe. Upéi Samuel oho jevy Ramáme.

Tupã Ñandejára Ñe’ẽ.

SALMO ÑEMBOHOVÁI  88, 20-22. 27-28

Opavave: Ajuhu Davidpe, che rembiguái

Yma rejechauka va’ekue umi nde rehe ojeroviávape ha ere va’ekue:

“Kuimba’e ikatupyrývape aipytyvõ, iporavo pyrévape ahupi. O.

Che rembiguái Davídpe ajuhu ha añohẽvo iñakãre ñandy ryku marangatu

amoingo mburuvicha guasúrõ.

Ichupe opa ára aipytyvõne ha amombareténe. O.

He’íne chéve ha’e: ‘Nde hína che ru, Tupã Ñandejára che renohẽva jejopy vaígui

ha reñangarekóva che rehe.’ Ajapóta ichupe che ra’y ypykue, mburuvicha guasu tuichavéva yvy ári. O.

ALELUIA Cf. Ef  1, 17-18

Aleluia.

Ñandejára Jesucristo Túva to moesakä ñane korasõ, ikatu haguáicha ñamomba’e ha’arömby

ipype ñañe renói va’ekuépe.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha    2, 23-28

Upe ramo Jesús ohasa ohóvo kokue rupi peteĩ pytu’uha árape, hemimbo’ekuéra oñepyrũ oipo’o trígo ha ho’u. Umi fariséo he’i ichupe: Ema’ẽmi, neremimbo’ekuéra niko ojapo, ojejapo’ỹ arã pytu’uha árape ave.

Ha’e katu he’i ichupekuéra: Ndapeikuaái nga’u piko mba’épa Tupã Ñandejára Ñe’ẽme he’i, David ojapóvo iñembyahýi ramo guare, iñirũnguéra ndive? Oike hikuái Tupaópe, Abiatar pa’i guasúrõ guare, ha ho’u umi panpe Tupã Ñandejárape oñemboyke va’ekue ha pa’ínteva ikatúva ho’u, ha ome’ẽ avei iñirũ nguérape.

He’i avei ichupekuéra: Pytu’uha árako ojejapo va’ekue yvypórape guarã, ndaha’éi yvypóra pytu’uha árape guarã. Upévare che, yvypóraicha aju va’ekue, areko che pópe ha’évo mba’e mba’épa ikatu ojejapo pytu’uha árape.

Ñandejára Jesucristo Ñe’ẽ