LECTURAS DEL MARTES 7º TIEMPO ORDINARIO

LECTURAS DEL MARTES 7º TIEMPO ORDINARIO

Ñahendúta Tupã Ñandejára Ñe’ẽ Santiago ohai va’ekue  4, 1-10

Che pehẽnguekuéra: Mamógui piko ou umi ñorairõ ha joavy pende apytépe? Ou pene rembipota vaígui, pene moñorairõ mantéva. Peipota pe ikatu’ỹva pereko, ha upévare peporojuka.

Pene renyhẽ mba’e potágui pehupity’ỹre mba’eve, ha upévare peñorairõ ha pekaguai ojuehe. Ndapehupytýi peipotáva nda pejeruréigui Tupã Ñandejárape. Ha pejerure ramo, noñeme’ẽi peẽme pejerurégui hekope’ỹ. Peipota niko pende vy’arã rei.

Háa tekove jeroviaha’ỹ! Ndapeikuaái piko ohayhúva yvypóra reko ndohayhuiha Tupã Ñandejárape? Oimeraẽva oñemboykéva yvypóra reko gotyo, oñemoĩ hína Tupã Ñandejárare. Peimo’ã piko he’i reiha Ñandejára Ñe’ẽ: “Tupã hakate’ỹ pe espíritu ñande pype omoĩ va’ekuére?” Tupã Ñandejára katu ñane pytyvõve imba’e porãme, he’i niko iñe’ẽme: “Tupã Ñandejára oñemohatã umi ojejapóvape, ha ipy’a porã umi ojejapo’ỹva ndive.”

Peñemoĩ aipórõ Tupã Ñandejára poguýpe, pembohovái Añáme ha ha’e ombopo’íta. Peñemboja Tupã Ñandejárare ha ha’e oñembojáta pende rehe.

Umi mba’e vai apoha kuéra to mopotĩ ipo. Umi hova mokõiva to mopotĩ ipy’apy. To ñembyasy, ta hasẽ ha to jahe’o hikuái! Opuka rangue tojahe’o ha ovy’a rangue to ñembyasy. To ñesü Tupä  Ñandejára renondépe, ha ha’e omopu’ãne ichupe kuéra.

Tupã Ñandejára Ñe’ẽ.

SALMO ÑEMBOHOVÁI  54, 7-11a 23

Opavave: Tupã Ñandejára oñangarekóta nde rehe.

Ha’e che py’a pýpe: “Pykasúicha nga’u che pepo ra’e, mombyry aveve, pytu’u aheka.”

Mombyry upéicha ramo akañýne, yvy ojeiko’ỹha rupi aikóne. O.

Emokañy iñe’ë nguéra, eipe’e ojuehegui ahecháre teko aña meme.

Yvytu ratã ha ama guasúgui, pya’e ajuhúne añemo’ã haguã. O.

Ñandejára pópe emoĩ nde rekove ha’e oñangarekóta nde rehe.

Ha’e ndoheja mo’ãi oñehundi umi hekojojáva. O.

ALELUIA Gál 6, 14

Aleluia.

Che Ñandejára Jesucristo kurusu añóre ajeroviáta heseve yvypóra oñemongurusu avei,

che aime háicha yvypórape guarã.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Marcos omombe’u háicha   9, 30-37

Upe ramo Jesús ohóvo upégui ohasa hikuái Galiléa rupi. Jesús katu ndoipotái avave oikuaa, ombo’égui hína hemimbo’ekuérape. He’i ichupekuéra: Che, yvypóraicha aju va’ekue, ha’áta hína yvypórakuéra pópe. Ha’e kuéra che jukáta. Ha mbohapy ára amano haguépe katu, aikove jevýta.

Ichupe kuéra nahesakãi pe ha’e he’íva, ha okyhyje hikuái oporandu haguã ichupe.

Oguahẽ hikuái Cafarnaúmpe. Oĩ marõ hikuái hógape, Jesús oporandu ichupekuéra: Mba’ére piko peñoñe’ẽ api pejúvo tapére?

Ha’ekuéra katu okirirĩ. Tapére niko oñoñe’ẽ api ra’e, mávapa upe mba’e guasuvéva ijapytépekuéra. Ha Jesús oguapy, ohenói umi 12, ha he’i ichupekuéra: Oĩrõ mba’e guasuséva, oiko va’erã tapykue pegua ha opavave rembiguái ramo.

Upéi omoĩ peteĩ mitãme ijapytépe kuéra, ha ohupívo ijyva ári he’i ichupe kuéra: Oimeraẽva, che rérape oguerohorýva peteĩ mitã koichagua, chéve che rerohory. Ha upe chéve che rerohorýva, nda chéve añói che rerohory, upe che mbouharépe ave.

Ñandejára Jesucristo Ñe’ẽ.