LECTURAS DEL SÁBADO V DE CUARESMA

LECTURAS DEL SÁBADO V DE CUARESMA

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha   37, 21-28

Kóicha he’i Tupã Ñandejára: Anohẽta Israelguakuérape umi tetã ambue oho haguépe opyta; opa guio amboatypáta ha arojevýta ijyvýpe. Ajapóta ichugui kuéra peteĩ tetãnte umi yvyty Israel peguápe, ha peteĩnte huvicha guasúta. Na pene mombyry mo’ã véima ojuehegui mokõi tetãme, na pende ruvicha guasu mokõi mo’ãvéima.

Na pe ñemongy’a mo’ã véima avei pemomorã haguére tupã gua’u ta’ãnga rei imbojeguarupýva, ha ndapeiko mo’ã véima peñe mboheko ky’a. Che poipe’áta pende reko jeroviaha’ỹgui, ha pomopotĩta pende reko ky’águi. Ha’ekuérata che retãgua ha che Ijára.

Che rembiguái David año itéta huvicha guasu ha herekuakuéra, ha ha’ekuéra che Ñe’ẽ rendúta ha ojapóta che rembiapoukapy. Oikóta hikuái pe tetã ame’ẽ va’ekuépe che rembiguái Jacóbpe, oiko haguépe avei ijypy kuerakue.

Upépe oikóta ha’ekuéra, ta’ýrakuéra ha Iñemoñarekuéra opa ára guarãma; ha che rembiguái David ha’éta opa ára huvichakuéra.

Roñemoĩta peteĩ ñe’ẽme, rome’ẽta ojupe oñoñe’ẽ, añete haguã ichupekuéra oikove joa py’a guapýpe. Kóvata ñe’ẽ ñome’ẽ opa ára guarãma. Ahejáta heta oñemuña ha opa ára guarãma amoĩta che tupao marangatu ijapytépe kuéra. Aikóta hendivekuéra, ha chéta Ijárakuéra, ha ha’ekuéra katu che retãgua.

Che tupao marangatu oĩma ramo ijapytepe kuéra, umi ambue tetã ohecha kuaáne, che aiporavo hague Israélpe che mba’e marangatu ramo.

Tupã Ñandejára Ñe’ẽ.

SALMO ÑEMBOHOVÁI     Jer 31, 10-12ab. 13

Opavave: Tetãnguéra, pehendu Tupä Ñandejára Ñe’ẽ

Tetãnguéra, pehendu Tupã Ñandejára Ñe’ẽ

ha tetã mombyry rupi pemyerakuã:

‘Ñandejára omosarambi va’ekue Israélpe, omboaty

ha oñangarekóta hese oñangareko háicha ijovecháre’. R.

Tupä Ñandejára oguenohẽ haguére hetãgua Jacob,

oipe’a tetã imbaretevéva poguýgui.

Oúta ha vy’águi opurahéita yvyty Siónpe,

Tupä Ñandejára remime’ẽgui henyhẽta. R.

Kuñataĩnguéra ojerokýta vy’a pópe,

ha upéicha avei mitã rusu ha tujami ovy’áta;

Che ojahe’ohágui ambovy’a jevýta ichupekuéra

ambovy’a jevýta, tuichavéta ivy’a imba’e mbyasy kuégui. R.

VERSÍCULO ANTES DEL EVANGELIO      Ez 18, 31

Pe mombo pende jehegui opaichagua ñe’ẽrendu’ÿ

ha pejapo korasõ ipyahúva ha peteĩ espíritu pyahu.

EVANGELIO

Ñahendúta Ñandejára Jesucristo rekove ha hemimbo’e San Juan omombe’u háicha  11, 45-57

Upe ramo heta umi ou va’ekue María andúvo, ha ohechávo Jesús omoingove jevyha Lázarope, ou ojerovia hese. Oĩ katu ohóva umi fariséo rendápe, ha omombe’u ichupekuéra pe ojehu va’ekue.

Upépe fariséo ha pa’i ruvichakuéra oñemboaty umi moakãhárakuérape, ha oporandu hikuái: Mba’épa jajapóta? Ko kuimba’e niko ojapo hína heta mba’e hechapyrãva. Jaheja rei ramo ichupe, opavave ojeroviáta hese, ha mburuvichakuéra Romagua oúta ohundi ñande Tupao ha ñane retã.

Peteĩva katu hérava Caifás, pa’i guasúrõ ojupi va’ekue upéva pe añorã, he’i:  Peẽ ndapeikuaái mba’eve. Ndapehechakuaái piko iporãvetaha peẽme peteĩnte omano ramo opavavére, ko tetã tuichakue oñehundi rangue?

Caifás katu nde’íri péicha ijehegui reínte. Ojupi haguére pa’i guasúrõ pe áñope, ha’e he’i umi mba’e ojehútáva ojehu mboyve. He’i hína Jesús omanotaha judíokuérare, ha ndaha’éi hesekuéra añónte, ombyatýta avei opa Tupã Ñandejára ra’ykuérape opa rupi isarambíva.

Upéva pe árape voi umi judio moakãhárakuéra oñemoĩ peteĩ ñe’ẽme ojuka haguã Jesúspe.

Upévare Jesús ndoiko véima Judea rupi opavave ohecha haguãicha ichupe. Osẽ katu upégui ha oho peteĩ távape hérava Efraín, opytáva yvy ojeiko’ỹha rembe’ýpe. Upépe opyta hemimbo’ekuéra ndive.

Hi’aguĩma Páskua judíokuéra omboaretéva, ha opa guio heta umi ohóva Jerusalénpe oñemopotĩ haguã Páskua oguahẽ mboyve. Umíva oiko oheka Jesúspe, ha pe Tupãóre oporandu joa hikuái: Mba’épa peẽ peje? Oúnepa ko areterã térãpa nahániri?

Umi fariséo ha pa’i ruvichakuéra he’i, oũ ramo oimeraẽ oikuaáva moõpa oĩ Jesús omombe’u haguã ichupekuéra omyakãsã haguã ichupe.

Ñandejára Jesucristo Ñe’ẽ.