LECTURAS DEL VIERNES 1º TIEMPO ORDINARIO

LECTURAS DEL VIERNES 1º TIEMPO ORDINARIO

Ko’ágã ñahendúta Tupã Ñandejára ñe’ẽ Samuel arandukápe oĩ háicha 8, 4-7. 10-22a

Oñemboaty hikuái Israel moakãhára ha oho Samuel rendápe Ramáme, he’i haguã ichupe: “Nde tujáma ha nde ra’y kuéra ndoikói nde reiko haguéicha.

Upévare emoĩ oréve ore ruvicha guasurã, ta ore sãmbyhy, ojejapo háicha opa tetã rupi.” Samuel ipochy he’i haguére hikuái ichupe: “Emoĩ oréve peteĩ mburuvicha guasu ore sãmbyhy haguã”, ha oñembo’e Tupã Ñandejárape. Ñandejára he’i ichupe: “Ejapo katu ha’ekuéra oipotáva. Nandévei ko hína, chévente nda che potavéi huvicha ramo.

Samuel omombe’u tetãgua ojerurévape peteĩ mburuvicha guasu, upe he’iukáva Tupã Ñandejára. Ha he’i ichupekuéra: Péichata hína upe mburuvicha guasu pene sãmbyhýtava: Ohenóita ñorairõrã pende ra’ykuérape; ichuguikuéra oĩ omoĩtava kárro ñorairõrã arigua ramo, oĩ omoĩtava kavaju arigua ramo; ha ambue oñangareko haguã hese; oĩ omoĩtava 1.000 ñorairõhára ruvicha ramo, oĩ omoĩtava 50 ruvicha ramo.

Oĩ peĩva omoĩtava omba’apo haguã ikokuépe, oñemitỹha omono’õvo, térã ojapo haguã tembiporu ñorairõrã, térã kárro ñorairõrãme guarã. Oiporavóta avei pende rajykuéra apytégui hembiguairã, omohyakuã porã haguã ichupe, hembi’u ombojy haguã ha ojapo haguã ipan.

Oñemomba’éta pende yvy, pende parralty ha pende olivoty iporãvévare, ha ome’ẽta hembiguái kuérape. Oñemomba’éta avei upe 10gui peteĩre opa pene rymbakuéragui ha ome’ẽta hembijokuái hóga guasu guápe. Oipe’áta avei pende hegui pene rembiguái kuimba’e ha kuña, pene rymba guéi ha pene rymba vúrro iporãvéva ha omomba’apóta ijupe guarã.

Ogueraháta avei imba’erã 10gui peteĩ pene rymba kuéragui ha peẽme voi pene momba’apóta hembiguái ramo. Ha ágä peñe’ẽ ngururu ramo upe mburuvicha guasu peiporavo va’ekuére, Tupä Ñandejára nopena mo’ãi pende rehe.

Umi tetãgua katu ndoikuaaséi mba’eve ha he’i Samuélpe: Marãve ndoikói. Roipota ore ruvicha guasurã, roiko haguã umi tetã ambuéicha, ore sãmbyhy ha ore moakã haguã ñorairõháme. Samuel ohendu rire ha’ekuéra he’íva, omombe’u Ñandejárape, ha Ñandejára he’i ichupe: Ehendu iñe’ẽ ha emoĩ ichupekuéra huvicha guasurã. Upérõ Samuel he’i Israel guápe oho jevy haguã hóga kuérape.

Tupã Ñandejára Ñe’ẽ.

SALMO ÑEMBOHOVÁI (88, 16-19)

Opavave: Tupã Ñandejára, agueropurahéine opa ite ára nde pokatu

Ovy’aite va’erãpa pe tetã torypápe ne momba’e kuaáva,
ha oguatáva nde resa renondépe, nde Rérape ovy’a opa ára,
ha nde reko joja omokyre’ỹ ichupekuéra. O.

Nde remombarete ha rembotuicha ichupe,
ha remombareteve katu ne py’a porãgui hendive.
Ore Jára, nde remoĩ oñangareko va’erã ore rehe,
remoĩ ore ruvicharã ha’égui Israelgua imarangatúva. O.

ALELUIA Lc 7, 16

Aleluia.
Peteï maranduhára nde tuicháva osẽ kuri ñande apytégui
ha Tupä Ñandejára ou ohechávo hetäguápe.
Aleluia.

EVANGELIO
Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha 2, 1-12

Upe ramo Jesús oike jevy Cafarnaúmpe. Ojekuaávo ha’e oĩha hógape, heta eterei umi oñemboatýva ha ndaijavéi upe okẽ renondépe, ha ha’e oñe’ẽ ichupekuéra.

Upérõ irundy kuimba’e ogueru peteĩ ijapávape. Ha ndaikatúigui oguahẽ Jesús rendápe hetágui umi upépe oĩva, ombokua hikuái pe óga ape ha’e oĩháme, ha upe rupi omboguejy hikuái pe hasývape, hupápe. Jesús ohechávo mba’éicha itépa ha’e kuéra ojerovia hese, he’i pe hasývape: Che ra’y, ojeheja reíma ndéve ne angaipa.

Upépe, umi Moisés rembiapoukapy mbo’eha oguapyva hína upépe, he’i ipy’apýpe: “Mba’ére piko kóva péicha oñe’ẽ? Ojahéi niko Tupã Ñandejárare, ku hendaguépe oĩrõ guáicha. Tupã Ñandejára añónte niko ikatu oheja rei ñandéve ñane angaipa.” Ha Jesús pya’e ohecha kuaa mba’épa he’i hína hikuái ipy’apýpe, ha oporandu ichupekuéra: Mba’érepa pejepy’a mongeta péicha? Mba’épa ndahasyive, ja’e ko ijapávape: “Ojeheja reíma ndéve ne angaipa”, térãpa “Epu’ã. Ehupi nde rupa ha eguata”?

Néi, ahechaukáta peẽme che, yvypóraicha aju va’ekue, ikatuha aipysyrõ oimeraẽvape ko yvy ári. Ha upévo he’i pe ijapávape: Ndéve ha’e: ‘Epu’ã. Ehupi nde rupa ha tereho nde rógape.’

Upépe, pe ijapáva opu’ã, ohupi hupa ha osẽ upégui opavave renondépe. Upévare opavave ohecha ramo, ha omomba’e guasu Tupã Ñandejárape he’ívo: Péichagua mba’e ndajahecháiva araka’eve.

Ñandejára Jesucristo Ñe’ẽ