LECTURAS DEL VIERNES PRIMERO DE ADVIENTO

LECTURAS DEL VIERNES PRIMERO DE ADVIENTO

Ko’ágã  ñahendúta Tupã Ñandejára ñe’ẽ Isaías arandukápe oĩ háicha     29, 17-24

Péicha he’i Tupã Ñandejára: Vokói eténte ka’aguýgui oikóta kokue, kokue katu ojoguáta ka’aguýpe.

Upe árape ijapysapéva ikatúta ohendu oĩ ramo ichupe kuéra omoñe’ẽva kuatia.

Ha hesatũva ikatúta ohecha, ndoiko mo’ãvéi pyhare ha pytũmbýpe.

Ojeapo’ívape ombovy’a jevýta  Tupã Ñandejára, horýta umi imboriahuvéva. Tupã Ñandejára Israelgua imarangatúva renondépe.

Opáta umi oporojopýva ha ndaipóri mo’ãvéi hova atãva, oporoapo’íva ha ojaposéva ivaívante voi.

Opáta oporomombe’u japúva, omoñuhãva mbojovakehárape, ha umi hekope’ỹ imarangatúvape ombojovakeukáva.

Upévare, Tupã Israel Jára, oguenohẽ va’ekue Abrahámpe jejopy vaígui, he’i: “Águive Jacob notĩ mo’ãvéi ha ndahova pytã mo’ãvéi, omombe’útagui che réra imarangatuha, ohechávo pe ajapóva ijapytépe kuéra, he’íta imarangatuha Israel pegua imarangatúva ha omomba’éta Tupã Israel Járape. Umi iñakã tavýva iñakã porãta ha oñe’ẽngururúva iñe’ẽ rendúta.”

Tupã Ñandejára Ñe’ẽ.

SALMO ÑEMBOHOVÁI   26, 1. 4. 13-14

Opavave: Tupã Ñandejára upe che rekove ohesapéva.

Tupã Ñandejára che resapéva ha che pytyvõva,

mávagui piko akyhyjéta?

Tupã Ñandejára oñangareko che rehe,

máva piko che mongyhyjéta? O.

Peteĩ mba’énte Tupã Ñandejárape ajerure ha aipota.

Tupaópe aikose aikove pukukue aja,

hese ajepy’a mongeta haguã, ha’e che mbopy’a rory haguã,

ichupe amomba’e guasu haguã. O.

Aikuaa Tupã Ñandejára imba’e porãtaha

che ndive aikove pukukue aja.

Pejerovia Tupã Ñandejára rehe.

Pende py’a guasúke pejerovia Ñandejára rehe. O.

ALELUIA

Aleluia.

Tupã Ñandejára oúta pu’aka reheve, ha ohesapéta umi hembiguái resa.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha   9, 27-31

Upe ramo Jesús osẽvo upégui oho haguã, osẽ hapykuéri mokõi ohecha’ỹva, osapukáiva ichupe: Ore poriahuvereko mína, nde David ra’y!

Ha oike rire Jesús hógape, oguahẽ hendápe umi ohecha’ỹva. Ha Jesús oporandu ichupe kuéra: Peroviápa che ikatuha pomonguera?

Ha’ekuéra he’i ichupe: Roguerovia, ore Jára.

Upévo Jesús opoko umi hesáre, ha he’i: Toiko upe peẽ perovia haguéicha. Ha okuera umi hesa ha ohecha porã jevy. Jesús he’i jevy jevy ichupekuéra: Aníke avave oikuaa kóva.

Ha’ekuéra katu, osẽmi vovénte upégui, opa rupi omombe’u upe Jesús ojapo va’ekue hesekuéra.

Ñandejára Jesucristo Ñe’ẽ.