LECTURAS DEL SÁBADO SEGUNDO DE ADVIENTO

LECTURAS DEL SÁBADO SEGUNDO DE ADVIENTO

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 48, 1-4. 9-11

Opu’ã maranduhára Elías tatáicha, iñe’ẽ ohapy tata rendýicha.

Ha’e ogueru hi’ári kuéra ñembyahýi, ha ipochýgui omombovy ichupekuéra.

Iñe’ẽ rupi Tupä Ñandejára nomongyvéi, ha mbohapy jevy omboguejy tata yvágagui. Ajépa nde tuicha ite va’ekue, Elías, ne rembiapópe! Mávapa ikatúta he’i ne mbojoja hague?

Yvytu ratã tata guiguáva nde reraha yvate kárro tatápe.

Nde rehe ojehai va’ekue reimeha reju jevy haguãicha rembovevyivévo Tupã  Ñandejára pochykue, oguahẽ mboyve hi’ára, remoingo porã haguã túva ha ta’ýra oñondive remyatyrõ jevy haguã Israel retã. Ovy’a ite va’erãpa umi nde recháva omano mboyve ha ko’yteve nde, reikovéva!

Tupã Ñandejára Ñe’ẽ.

SALMO ÑEMBOHOVÁI     79, 2ac. 3b. 15-16. 18-19

Opavave: Tupã Ñandejára nde pu’akapáva, eju jevy ore rendápe

Israel rerekua ore rendu kena.

Nde reguapýva umi tekove ipepóva ári,

ehechauka nde pokatu.

ehechauka oréve ne mbareteha. O.

Tupã Ñandejára nde pu’akapáva, eju jevy ore rendápe.

Amo yvága guive emaña ore rehe.

Eju ehecha parralty, nde po rupi ete reñotỹ va’ekue

ha nde voi remongakuaa va’ekue. O.

Nde po toĩ nde akatúa pegua ári,

upe ne rembiporavo remombarete va’ekue.

Upéicha ramo ndorojeréi chéne nde hegui.

Eheja to roikove ha to romomba’e nde réra. O.

ALELUIA

Aleluia.

Pembosako’i Tupã Ñandejárape haperã.

Maymave yvypóra ohecháta Ñandejára Pysyrõ.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha    17, 10-13

Upe ramo hemimbo’e kuéra oporandu Jesúspe: Mba’ére piko umi Moisés rembiapoukapy mbo’eha he’i Elías ou raẽ va’erãha?

Jesús he’i ichupekuéra: Añete niko Elías raẽ ou va’erãha, ha ha’e omoĩmba porã va’erã opaite mba’e hekópe. Ha che ha’e peẽme, Elías oúma hague ha avave ndoikuaái hague ichupe. Upévare ojapo hikuái hese opa ojaposéva.

Péicha avei che, yvypóraicha aju va’ekue, ahasa asýta ipópe kuéra.

Upépe ae, hemimbo’ekuéra ohecha kuaa Jesús oñe’ẽ hague ichupe kuéra Juan Bautista rehe.

Ñandejára Jesucristo Ñe’ẽ.