LECTURAS DOMINGO DÉCIMO TERCERO

LECTURAS DOMINGO DÉCIMO TERCERO

LECTURA PETEÎHA:

Ko’ágã ñahendúta Tupã Ñandejára ñe’ẽ Reyes aranduka peteĩ háme oĩ háicha 19, 16b. 19-21

Tupã he’i Elíaspe: Eliseo Safat ra’y, Abel Mehola guápe, emoingo maranduhára ramo ne rendaguépe. Elías oho upégui ha ojuhu Eliséope yvy ombojeréva hína. Eliseo renondépe oĩ 12 júnta guéi ha ha’e omboguata pe tapykue pegua. Elías oho hendápe ha oity hi’ári ijahoja.

Upe vove Eliseo oheja hymba guéi kuéra, oho pya’e Elías rapykuéri ha he’i ichupe: Tahána tamombe’u che ru kuérape ha upéi taha ne ndive.

Ikatu reho, he’i ichupe Elías, ha ne mandu’áke upe nde rehe ajapo va’ekue. Eliseo oho ha ojuka mokõi guéi, oiporu pe júgo jepe’a ramo,
ombojy pe so’o ha omongaru igéntepe. Upéi oho Elías rapykuéri ha opyta hembiguái ramo.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 15, 1-2a. 5. 7-11
Opavave: Ñandejára, eñangareko kena che rehe.

Tupã, eñangareko che rehe, ne rendápe niko aguahẽ.
Ha’e ndéve: “Nde hína che Jára ndaipóri ne mbojojáva”.
nde hína opa mba’e chéve guarã.
Nde pópe oĩ che rekove. O.

Amomba’e guasúta Tupãme
che resape’áva, pyharekue jepe
Opa árape Ñandejára rehe che mandu’a
ha’e oĩ ramo che ypýpe nda’ái chéne. O.

Upéva rehe, che py’a rory,
ha py’a guapýpe aikóne.
Nda che rejái chéne amano.
Nde reheja mo’ãi ne irũme yvy kuápe ojeity. O.

Nde rehechaukáne chéve jeikove rape.
Ne rendápe aime ramo
vy’águi che myenyhẽne.
Nde ypýpe vy’a ndopáiva. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ Pablo ohai va’ekue ikuatia mokõiháme Galacia guápe 5, 1. 13-18

Che pehenguekuéra:Cristo rupi ñane sãsõ. Aipo ramo, peñemo hatãke upe sãsõme ha anive pe’a tembiguái reko júgo guýpe.

Peẽ niko, che pehẽnguekuéra peñehenói va’ekue peiko haguã sã’ỹme. Anínte peiporu pende rekosã’ỹ pejapo japove haguã pene mba’e pota.

Iporãve va’erã peñopytyvõ joayhúpe. Tembiapoukapy oĩmba peteĩ mba’épe: “Ehayhu nde rapichápe rejehayhu háicha nde”. Pejererekóke
peë, peikóva pejosu’u ha pekaru ojuehe, aníke, cháke peño hundíta peẽ voi.

Aipo ramo ha’e peẽme: Peiko Espíritu oipota háicha. Ha ani peiko pevy’a pene mba’e pota vaípente. Umi mba’e pota vai niko opu’ã Espíritu rehe, ha Espíritu ndojoguerahái umi mba’e pota vai ndive. Umíva oñokontrário voi, upéva rehe peẽ ndaikatúi pejapo umi mba’e porã pejaposéva. Espíritu pene sãmbyhy ramo katu, napeime mo’ã véima tembiapoukapy poguýpe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 1Sam 3, 9; Jn 6, 68c

Aleluia

Eñe’ẽ katu, ne rembiguái ne rendu!”
Ne ñe’ẽ niko umi oporomoingovéva opa árape guarã.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 9, 51-62
Opavave: Romomba’e guasu ndéve, Ñandejára.

Upe ramo oñemo’aguĩvo ára Jesús ojehupi haguã yvágape, osẽ oho Jerusalénpe. Omondo henonderã oho vaerãva ohecha chupe hendaguã Samariape.

Umi Samariagua katu ndoipotái Jesúspe ijapytépe kuéra, oikuaágui hikuái ohoha hína Jerusalénpe. Santiágo ha Juan oikuaávo upéva, osẽ he’i chupe: — Mbo’ehára, eipotápa roñembo’e Ñandejárape, ha toity ha’e tata yvágagui ohundipa haguã ko’ãvape.

Jesús katu ojere omongavaju chupe kuéra. Ha osẽ oho hikuái ambue puéblope.

Jesús ha umi hendive oĩva oguata jave ohóvo, osẽ peteĩ he’i Jesúspe: — Aháne nendive mamo rehohápe.
Ha Jesús he’i chupe: — Aguara’i niko oguereko ikeha, ha guyrakuéra hupa. Che katu ndarekói mamo ambojeko haguã che akã.
Upéi Jesús he’i ambuépe: — Eju che ndive.

Ha’e katu he’i: — Che ra’arõna tañotỹ raẽ che ru, ha upéi taju.

Jesús katu he’i upévape: — Eheja omanóva toñotỹ omanóvape. Nde tereho emyerakuã Ñandejára Rréino.

Oĩ katu he’iva Jesúspe: — Mbo’ehára, che niko ahase nendive. Che ra’arõna taha raẽ tamombe’u che rogaguápe, ha upéi taju nendive.
Jesús he’i chupe: — Arádo omoĩva ipópe ha oma’ẽ mantéva hapykuévo, péva na’iporãi Ñandejára Rréino peguarã.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.