LECTURAS DOMINGO DECIMOCUARTA SEMANA

LECTURAS DOMINGO DECIMOCUARTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 66, 10-14

“Pevy’a Jerusalén ndive, tapende py’a renyhẽ torýgui opa pehayhúva ichupe. Pemoirũ ichupe vy’ápe opa pejahe’o va’ekue hese. Ha ha’e peteĩ sýicha pene mongarúta vy’ápe pene ryguãtã meve.

Che, opa mba’e Jára, ha’égui: Che rupi py’aguapy oúta hi’ári ysyrýicha, ha mba’e repyeta, tetãnguéra oguerútava, y osyry hatã vaicha oúta. Ha’e pene mongarúta, pende reraháta ijyva ári, pene mokunu’ũta hapypa’ũme. Peteĩ sy omokunu’ũ háicha imembýpe, che pomokunu’ũta, ha pevy’a jevýta Jerusalénpe”.

Pehechávo ko’ã mba’e pende py’a rorýta, pende rete kapi’ícha hoky pyahúta. Ñandejára oikuaaukáta ipokatu hembiguáikuérape, ha ipochy rendy, hese ija’e’ỹvape.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 65, 1-3a. 4-7a. 16. 20
Opavave: Mayma yvy ape rehe peikóva, vy’a pópe pepurahéi Tupãme.

Mayma yvy ape rehe peikóva, vy’a pópe pepurahéi Tupãme.
Héra peropurahéi, ha peje ichupe:
“Tuichaite mba’e niko ne rembiapokue. O.

Opavave ne momba’e guasu ha oñesü ne renondépe.
Peju pehecha Tupã rembiapokue,
umi mba’e hechapyrãva ñande rehehápe ojapóva. O.

Yguasu niko mbyte rupi omboja’o,
ha ñande ru ypykuéra upe rupi oguatahápe ohasa.
Ha upéva heta ñane mbovy’a.
Ipu’akágui, opa mba’e oguereko ipo guýpe. O.

Peẽ Tupãme pemomba’éva,
peju ta mombe’u peẽme mba’épa ha’e ojapo che rehe.
Ñandejára hovasapy! Ha’e che ñembo’e ohendu,
ha akóinte che rayhu. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ Pablo ohai va’ekue Galacia guápe 6, 14-18

Che pehẽnguekuéra: Che katu, ndajejaposéi, Ñandejára Jesucrísto kurusu rehénte. Cristo kurusu rupi niko, ko yvy omano chéve guarã, ha che amano ko yvýpe guarã. Mba’evéko ndaha’éi pe ñañesirkunsida térã nahániri. Pe añetehápe iporãva niko, pe jaikove pyahu.

Umi péicha oikóva katu taipy’aguapy ha tojeporiahuvereko, ha upéicha avei umi Tupã reheguáva. Ko’águi rire ndaipota véima avave omoĩ che rapépe mba’e vai, umi pere arekóva che rete rehe ohechauka cheha Jesús rembiguái.

Che pehẽnguekuéra, Ñandejára Jesucristo toñohẽ ipytyvõ pende ári. Amén.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Col 3, 15a. 16a
Aleluia.
Cristo py’aguapy tomyenyhẽ pende py’a.
Pe Cristo marandu toĩ pende pype opa ára, iporãngue hetaháicha.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 10, 1-12. 17-20 [Versión breve: 10, 1-9]

Opavave: Romomba’e guasu ndéve, Ñandejára.

Upérõ Jesús oiporavove 72 idisipulorã ha umívape omondo henonderã, mokõi-mokõi, puebloha rupi hamba’e, umi ha’e ohasataha rupi. He’i chupekuéra: “Ajépa heta pe kokue ñemitỹngue, omono’õ vaerãnte mbovy.

Upévare, pejerure pe kóga járape tombou omono’õ va’erãva. Tapeho peẽ. Peikuaáke pomondoha hína ku ovecháicha jaguaretekuápe. Ani peraha pláta térã pende avíorã térã pende py rehegua ave. Ani avavépe pemomaitei tapére. Oimérõ pene

moguãhẽva hógape, pya’ete pemomaitei pejévo “Ñandejára rérape ta peime porãmba, ha py’a guapy toĩ pene ndive”. Ha oiko ramo hikuái py’a guapýpe, pene ñembo’e ohovasáne chupe kuéra. Nahánirirõ katu, peẽme jeýnte opytáne.

Ani peiko peva-peva peteĩ ógagui ambuépe. Pepyta upe peguãhẽháme ha pe’u upe oñeme’ẽva peẽme. Omba’apóvape niko ija ohupyty hembiapo repykue.

Peike ramo peteĩ puéblope ha pene moguãhẽ porã ramo hikuái, pe’u umi mba’e oñeme’ẽva peẽme. Pemonguera opa hasýva ha peje chupe kuéra Ñandejára Rréino hi’aguĩmaha. [ Peike ramo peteĩ puéblope katu, ha na pene moguãhẽ porãi, pesẽ okápe ha peje, “Yvytĩmbo pende pueblopegua roityvyro hína ore pýgui peikuaa haguã mba’épa pene ra’arõ. Peikuaáke kóva, Ñandejára Rréino
hi’aguĩma pendehegui.”

Che ha’e peẽme, ágã ára pahápe, Ñandejára oinupã rasyvéta chupekuéra umi Sodómape oiko va’ekuégui.

Umi 72 disípulo ou jeývo, tuicha ovy’a hikuái. He’i Jesúspe:— Mbo’ehára, nde rérape roñe’ẽ ramo chupe kuéra, umi demóño jepe ojapo
ro’éva.

Jesús he’i chupekuéra:— Ahecha niko Sataná ho’a ramo yvágagui ku aratirícha. Ame’ẽ vaekue niko peẽme pu’aka pepyrũ haguã mbói ha alakran rehe. Ha avei pende pu’aka haguã umi pende rehe ija’e’ỹvare. Mba’evéko ndojehu mo’ãi peẽme. Anínte pevy’a umi demóño ojapo haguére pejéva chupekuéra. Pevy’a uvei pende réra ojehaíma haguére yvágape.]

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.