LECTURAS DOMINGO DECIMOQUINTA SEMANA

LECTURAS DOMINGO DECIMOQUINTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 30, 9-14

Upérõ Moisés he’i umi israelíta kuérape: Ñandejára pende rovasáta opa mba’e pejapóvape, pende ra’y ha pene rymba hetáta, ha pende kokue koga’águi henyhẽta.

Ovy’áta pende rovasávo ovy’a haguéicha pende rukuéra ypykuépe ohovasávo. Peẽ katu pene ñe’ẽ rendu va’erã ichupe, pejapopaitévo hembiapoukapy ko ikuatiápe ojehaíva oĩháme ñehekombo’e ha’e ome’ẽva. Ha Tupã rape rupi peiko jevy va’erã pende py’aite guive.

Ko tembiapoukapy ame’ẽva peẽme ko’ágã, ndaha’éi peteĩ mba’e hasy etereíva térã ikatu’ỹva pehupity. Noĩri yvágape peje haguã: “Mávapa ohóne yvágape ogueru ñandéve ikatu haguã ñahendu he’íva ha jajapo?”

Noĩri avei mar mboypýri peje haguã: “Mávapa ohóne mar mboypýri ogueru ñandéve ikatu haguã ñahendu he’íva ha jajapo?”. Nahániri, hi’aguĩ eterei pende hegui: Oĩ pene ñe’ãme ha pende jurúpe. Pejapo katu!

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 68, 14. 17. 30-31. 36-37
Opavave: Peheka Tupãme ha peikovéta.

Tupã, ndéve niko añembo’e reju haguã che pytyvõ.
Ne mborayhu niko tuicha,
eju che nohẽ ajejopy vaihagui. O.

Ñandejára, ne mborayhu tuichágui ehendu che ñembo’e.
Nde che poriahuverekógui ejapysaka che rehe. O.

Tupã, che niko vaípe ajejopy.
Eju che pytyvõ ha che pe’a ko jejopy vaígui.
Ñandejára réra aropurahéine.
Amoherakuãne ha’e tuichaha. O.

Tupã oguenohẽne Siónpe upe ojejopy vaihagui,
ha táva kuéra Judápe oĩva omopu’ãmba jevýne. O.

Upépe oikóne hikuái ha oñemomba’éne upe yvy rehe.
Hembiguái ñemoñare kuérape opytáne,
ha upépe oikóne umi héra omomba’éva. O.

O bien:

18, 8-11
Opavave: Ñandejára rembiapoukapy ndaijojahai, ñane mbopy’a rory.

Ñandejára rembiapoukapy ijeroviaha, omoarandu oikuaa’ỹvape.
Ñandejára rembiapoukapy oĩ hekoitépe, ñane mbovy’a.
Tupã rembiapoukapy hesakã, ñande resape’a. O.

Tupã ñe’ẽ hesakã porã asy ha ndahekoviái.
Ñandejára rembiapoukapy ijeroviaha,
opavave oĩ heko itépe. O.

Iporãiteve óro ojajaipávagui,
he’ẽve eiretégui osyrýva káva raitýgui. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ Pablo ohai va’ekue Colosas guápe 1, 15-20

Che pehenguekuéra: Cristo Jesús rehe jahecha, Tupã ikatu’ỹva ojehecha. Ha’e hína ita’ýra ypykue, opa mba’e mboyve guare. Ha’e rupi, Ñandejára ojapo ypy opa mba’e oĩva yvágape ha yvýpe, ojehechava ha ojehecha’ỹva, ha avei umi espíritu yvategua opa mba’e oguerekóva ipoguýpe ha imbaretéva.

Opa mba’e ojejapo va’ekue ha’e rupi ha ichupe guarã. Cristo hína opa mba’e mboyve ha ha’e rupi opa mba’e oĩ hendápe.

Upéi ave, Cristo ha’e pe Ñandejára iglésia akã. Ha’e niko opa mba’e ñepyrũ ypy hague, ha’e raẽvete oikove jevy, itenonde haguã upéicha opa mba’e rehe.

Crístope niko Tupã omoĩmba va’ekue ipokatu. Ha ha’e rupi, Ñandejára omoingo porã jevy hendive opa mba’e oĩva ko yvy ári ha yvágape, Cristo ruguy rupi, oñohẽ va’ekue kurusu rehe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Jn 6, 63c. 68c
Aleluia.
Ne ñe’ẽ niko Ñandejára oremoingove opa ára guarã.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 10, 25-37
Opavave: Romomba’e guasu ndéve, Ñandejára.

Upérõ peteĩ Moisés léi ombo’éva oho oñe’ẽ Jesús ndive. Ombopakova pirese chupe. Oporandu Jesúspe: — Mbo’ehára, mba’éiko ajapo va’erã ahupyty haguã jeikove opave’ỹva.

Jesús he’i chupe: — Ha mba’éiko he’i umi mandamiéntope. Mba’e gua’u he’i ndéve.

Upe Moisés léi ombo’éva he’i: — Péicha niko he’i, “Ehayhu Ñandejárape nde py’aite guive, ne ánga rugua guive ha opa ne arandukue reheve. Ehayhu nde rapichápe rejehayhuháicha nde.

Jesús he’i chupe: — Péicha añete he’i. Ha péicha rejapórõ, reikovéta.

Pe mbo’ehára katu, opyta porãségui ha ohechauka haguã oikuaaha, osẽ he’i Jesúspe:— Ha mávaiko aipo “che rapicha”.

Upépe Jesús omombe’u chupe kóva ko káso: Peteĩ karia’y ndaje oguata ohóvo Jerusaléngui Jericópe. Tapére osẽ chupe mondaha atýra ha oipe’apa chugui opa oguerekóva. Ha heta ombyepoti rire chupe hikuái, oheja chupe omano vai-vai ha opívo.

Peichahágui rei, ohasa sapy’a upe rupi peteĩ pa’i. Ha ohechávo hapichápe yvýpe ojepysóva hína, oñemboykénte chugui ha ohasa meme ohóvo.

Upéi, ohasa avei upe rupi peteĩ pa’ípe oipytyvõva tupaópe. Ohechávo pe yvýpe oĩvape, oñemboykénte avei chugui ha ohasa oho. Tapykuetévo katu, ohasa avei upe rupi peteĩ Samariagua. Ohechávo pe yvýpe oĩvape hína, oiporiahuvereko chupe. Oguejy henda árigui ha oja hendápe. Ha oipohãnomba porã rire umi oñenupã hague hamba’e, ojokua porãmba.

Upéi, ohupi chupe henda ári, ha ogueraha mbohupa oguãhẽháme ha oñangareko hese upe pyhare. Ko’ẽmba rire, oheja plata’imi pe mbohupa róga járape. Ha he’i chupe, “Eñangareko porãmíkena chéve ko karia’ýre. Ha peichahágui ndohupytypáirõ ko ahejáva
ndéve, ágã aju jeývo ame’ẽmbáne ndéve”.

Jesús ojere he’i pe Moisés léi ombo’évape: — Néi, ndéverõ guarã, máva ko’ãva mbohapy apytégui hína pe oñenupãmba vaekue rapicha.
Upe Moisés léi ombo’éva he’i: — Ha upe oiporiahuvereko va’ekue chupe.

Jesús he’i chupe: — Néi, tereho ndave ejapo upéicha.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.