LECTURAS DOMINGO I DE CUARESMA

LECTURA PETEÎHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 26, 1-2. 4-10

Peñemo henda ramo pe yvýpe Tupã ome’ẽtava peëme, peraha ichupe pende ajakápe pende koga’a tenondere upe ha’e oiporavo haguépe oñemomba’e guasu haguã ichupe. Pa’i toipyhy upe ajaka ichupe reme’ẽva ha Tupã altárpe toheja.

Upe ramo eréta Ñandejára renondépe ne ñe’ẽ: “Che rukuéra ypykue va’ekue mbovymi araméo ovaháre oikóva ha Egíptope oho opyta. Upépe oñemboheta ha oiko ichugui tetã mbarete. Egiptogua ojopy vai ore ndive ha ore hegui oiko tembiguái ijára ñarõva. Upéma ramo rojerure Tupã ore Járape ou haguã ore pytyvõ. Ha’e ohendu ore sapukái ha ohecha mba’éichapa rojejopy vai. Oiporu ipyapy mbarete, ojopypaite Egiptogua ndive opaichagua ñembyepoti pochy ha mba’e rechapyrã reheve, ha péicha ore renohẽ ipoguýgui, ha orereru
ko yvy porãme, ýicha osyryhápe kamby ha eíra. Upéva rehe aru ichupe che koga’a tenondere osẽva ko yvýgui Tupã ome’ẽ va’ekue chéve”.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 90, 1-2. 10-15
Opavave: Ñandejára, nde hína upe che mo’ãva, nde rehe ajerovia

Nde reikóva Yvatetegua ãme, ha eñemoĩva ipu’akapáva guýpe,
ere Ñandejárape: “Tupã, nde hína upe che mo’ãva, nde rehe ajerovia”. O.

Mba’eve ivaíva ndojehu mo’ãi ndéve, mba’asy noguahẽ mo’ãi nde rógape.
Tupã he’íta umi Ángelkuérape oñangareko haguã nde rehe mamo reikoha rupi. O.

Ha’ekuéra ipópe nde rerekóta ani haguã reñepysãnga mba’eveichagua itáre.
Jaguarete ha mbói apytérupi reguatáne, jaguarete ra’y rusu ha opaichagua mbóire repyrũmbáne. O.

“Ha’e oñemoĩgui che pópe anohẽta ichupe jejopy vaígui, ha’e che kuaágui añangarekóta hese.
Ajapysakáta chéve oñembo’évo, ojejopy vai ramo hendive aiméta.
Añangarekóta hese ha amoherakuã porãta. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Roma guápe 10, 5-13

Che pehenguekuéra: Tekojoja ipyendáva tembiapoukapy rehe, Moisés he’i va’ekue: “Opa iñe’ẽ rendúva umi mandamiéntope, oikovéta”. Ha pe tekojoja ipyendáva jeroviáre, oje’e: “Ani rejepy’a mongeta kóicha: ‘Máva piko ojupíta yvágape?’. Upéva hína, omboguejy haguã Jesucrísto, térã: ‘Mávapa oguejýta yvykua pypukúpe?’ Upéva hína, Jesucrísto ojupi haguã omanóva apytégui”.

Mba’e piko aipo ramo pe oje’éva? “Pe ñe’ẽ niko oĩ nde ypýpe, nde jurúpe, nde py’ápe”. Upéva hína pe jerovia rehegua marandu romosarambíva. Ere ramo Jesucrísto nde jaraha, ha nde py’ápe rerovia Tupã omoingove jevy hague ichupe, rejesalváta. Ñande py’ápe niko jarovia jahupyty haguã teko joja, ñande jurúpe ja’e jaroviaha Jesucrístope, jajesalva haguã.

Tupã Ñe’ẽ he’i: “Pe ojeroviáva hese ndopyta rei chéne”. Judío ha judio’ỹva ndojoavýi. Tupã niko opavave Jára, ha ome’ẽ heta mba’e umi ichupe oñembo’évape.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 4, 4b

Ojajaipa Jesucrísto Tupã ra’y ou va’ekue arapýpe. “Ndaha’éi tembi’u añónte oikotevẽva yvypóra oikove haguã, opa ñe’ẽ Tupã
jurúgui osẽva rehe avei oikotevẽ”. Ojajaipa Jesucrísto Tupã ra’y ou va’ekue arapýpe.

EVANGELIO

Marandu porã Ñandejára Jesucrísto rekove ha hemimbo’e San Lucas omombe’u háicha 4, 1-13
Opavave: Romomba’e guasu ndéve, Ñandejára.

Upe ramo Jesús oúvo río Jordángui, henyhẽ Espíritu Sántogui. Upéi katu pe Espíritu ogueraha chupe peteĩ desiértope. Upépe Aña oipy’a ra’ã chupe 40 ára pukukue, ha umíva umi árape ndo’úi mba’eve. Ohasa rire umi ára katu, oñandu iñembyahýi. Upépe Aña he’i chupe: — Nde ramo añete Ñandejára ra’y, ere ko’ã itápe toiko chugui pan.

Jesús katu osẽ he’i chupe: — Ñandejára Ñe’ẽme niko he’i: “Ndaha’éiko pan añónte oikotevẽva yvypóra oikove haguã”.

Upéi, Aña ohupi chupe peteĩ sérro ru’ãme. Ha upépe peteĩ tesa pirĩme ohechaukapa chupe tetã oĩmíva yvy arigua.

He’i Jesúspe: — Chéve niko ko’ãva oñeme’ẽmba va’ekue, ha ame’ẽ kuaa ame’ẽsévape. Ndéve ame’ẽta ne mba’erã, reñesũ ramo che renondépe ha che che momba’e guasu.

Jesús katu he’i chupe: — Ñandejára Ñe’ẽme niko he’i: “Tupãme añónte emomba’e guasu, ha chupe añoite eñakaity va’erã”.

Upéi katu Aña ogueraha Jesúspe, Jerusalénpe. Ohupi chupe pe tupao ári, pe ijyvatevehápe. He’i chupe: — Nde ramo añete Ñandejára ra’y, eñemombo yvýpe. Ñandejára Ñe’ẽme niko he’i: “Tupã he’íta hi’ángelkuérape oñangareko haguã nde rehe. Ijyva ári nde jokóta, ani haguã reñepysãnga.

Jesús katu he’i chupe: — Ñandejára Ñe’ẽme niko he’i avei: “Ani mo’ãke reipy’a ra’ã Tupãme”.

Aña ndojuhu véimarõ mba’éichapa oipy’a ra’ãvéta Jesúspe, oheja chupe upérõ, ágã ijávo ou jey haguã chupe.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.