LECTURAS DOMINGO TRIGÉSIMA PRIMERA SEMANA

LECTURAS DOMINGO TRIGÉSIMA PRIMERA SEMANA

Ko’ágã ñahendúta Tupã Ñandejára ñe’ẽ Sabiduría arandukápe oĩ háicha 11, 22-12, 2

Ñandejára, opa mba’e oĩva ivevúi peteĩ yvy ra’ỹicha ne renondépe, peteĩ ysapy resáicha ho’áva yvy ári. Opavavépe reiporiahuvereko, ikatúgui rejapo opa mba’e, remboty nde resa yvypóra rembiapo vai renondépe, jahechapa ndojevýi heko añágui.

Nde niko rehayhu opa mba’e, ha opa rejapo va’ekuégui neremboykéi mba’eve, rehayhu’ỹta rire, nderejapói va’erã mo’ã. Mba’e nga’u piko opytáta ndereipotái ramo nde? Mba’éicha piko oikovéta nerehenói ramo nde?

Nde reiporiahuvereko maymáva, ne mba’égui opa mba’e, ha opa mba’e rehayhúgui. Pe nde espíritu omano’ỹva oĩgui opa mba’épe, umi ho’a va’ekuépe, reja’o mimi ha reipytyvõ, remomandu’a ichupekuéra umi iñangaipa rehe, osẽ haguã tape vaígui ha ojevy pe reimeháme, ha ojerovia nde rehe ore Jára.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 144, 1-2. 8-11. 13c-14
Opavave: Amomba’e guasúta Ñandejárape opa ára ha oparupiete.

Tupã che Jára, ndéve romomba’e guasuta che ruvicha guasu.
Nde réra amomba’éta opa árape.
Ára ko’ẽ rehe romomba’e guasúta,
ha nde réra amomba’éne opa ára. O.

Ñandejára imba’e porã ha oporo poriahuvereko.
Ha’e oporohayhu ha hasýpe ipochy,
opavavépe ha’e ohecha kuaa,
ha ohecha ramo opa hembiapokue. O.

Opa ne rembiapokue ta ne momba’e guasu, Ñandejára,
opa nde rehe ojeroviáva ta ne momba’e guasu.
Ha’ekuéra tomoherakuã tuichaha upe ne retã,
Ha’ekuéra toikuaauka nde nembareteha. O.

Ñandejára nopyrũiva iñe’ẽ rehe,
Ha’e ipy’a porã opa mba’épe.
Ñandejára ojoko umi ho’ávape,
ikangývape omopu’ã jevy. O.

LECTURA MOKÕIHA:
Ko’ágã ñahendúta kuatia ñe’ẽ mokõiha San Pablo ohai va’ekue Tesalónica guápe 1, 11-2,2

Che pehẽnguekuéra: Roñembo’e opa ára pende rehe Ñandejárape, pene renói va’ekue peiko haguã ha’e oipota háicha, ha ipokatu rupi oiko haguã peẽme opa mba’e porã pejaposéva, ha opa umi tembiapo pemongu’éva pejerovia rupi.

Upéicha ramo, Ñandejára Jesús réra ojererohorýta pende rehe ae, ha ha’e pende rerohorýta, Tupã Ñandejára ha Jesucrísto ipy’a porãitéva oipota háicha.

Ko’ágã, che pehẽnguekuéra, Ñandejára Jesucristo ou jevy haguã rehegua, ha ñande joaju hendivére niko rojerure peẽme, ani peheja avave pene mbotavy térã pene mondyise he’ívo peẽme oguahẽma hague Ñandejára ouha ára. Ikatúne oime oimo’ãva ore ro’e hague upéva Espíritu rupi, roñemoñe’ẽháme térã kuatia ñe’ẽme.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Jn 3, 16
Ñandejára ohayhu etereígui opa yvypórape, ome’ẽ va’ekue Ta’ýra peteĩete, ani haguã omano umi hese ojeroviáva, oikove haguã uvei opa ára.

EVANGELIO
Marandu porã Ñandejára Jesucristo rekove ha hemimbo’e San Lucas omombe’u háicha 19, 1-10
Opavave: Romomba’e guasu ndéve, Ñandejára.

Upérõ Jesús og̃uahẽ Jericópe, ha ohasa ohóvo pe puéblo rupi. Upépe oiko peteĩ kuimba’e irríkova hérava Zaqueo. Ha’e niko hína umi impuésto okovráva ruvicha. Zaqueo niko ohechase Jesúspe. Ha ndaikatúi ohecha chupe, hetágui umi hénte Jesús jerére oĩva, ha upéi ave, Zaqueo ikarape voi. Odipara upémarõ Jesús renonderã ha oho ojupi peteĩ yvyra mátare.

Upégui ohecháta hína Jesúspe ohasávo upe rupi. Ha ohasávo ohóvo Jesús, omaña yvatévo ha he’i Zaquéope: — Zaqueo, nde pya’e eguejy upégui. Nde rógape apytase hína.

Pya’ete oguejy Zaqueo, ha torypápe omog̃uahẽ Jesúspe hógape. Ha umi hénte ohechávo upéva, oñepyrũ oñe’ẽ Jesús rehe. He’i hikuái, “Mba’éicha piko aipo ohóta opyta peteĩ pekador rógape.”

Okarupa rire, Zaqueo opu’ã ha he’i Jesúspe: — Opa arekóva amboja’óta mbyte rupi ha ame’ẽta hénte mboriahúpe. Ha oime rire che rapichápe ambotavy ra’e, amyengoviáta chupe 4 vése hetave.

Jesús he’i chupe: — Ko árape nde ha opa nde rogaygua pejesalva, ndégui hína Abraham ñemoñare añetete. Che niko aju aheka ha asalva hag̃ua opa umi oñehundítavape.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.