LECTURAS DOMINGO VIGÉSIMA SÉPTIMA SEMANA

LECTURAS DOMINGO VIGÉSIMA SÉPTIMA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Habacuc arandukápe oĩ háicha 1, 2-3;2, 2-4

¿Che Jára, araka’e peve piko asapukáita ndéve che pytyvõ haguã ha nacherendu mo’ãi?

Araka’e peve piko asapukáita oĩgui jejuka ha ndereju mo’ãi ore pe’a jejopy vaígui?

Maerã piko rehechauka chéve jeiko asy ha ñaña? Monda ha jejuka opa rupi ahecha, ñorairõ opaichagua opa rupi oiko. Ha he’i
chéve Tupã: “Tuju pehẽnguépe ehai ko ndéve ahechaukátava, ikatu haguã oñemoñe’ẽ syry. Noguahẽi gueteri ára oiko haguã ko rehechava, katuete oikóta ramo jepe. Hi’are ramo eha’arõnte, ágã hi’árape oguahẽta. Ehai umi heko añáva oñehunditaha, imarangatúva katu oikovéta ojerovia rupi Ñandejára rehe”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 94, 1-2. 6-9
Opavave: Pehendu Ñandejára ñe’ê. Ani pende py’a ratã.

Peju japurahéi Ñandejárape vy’a pópe.
Japurahéi upe jejopy vaígui ñane renohẽvape.
Ñaguahẽ hendápe ha ichupe ñamomba’e, ichupe japurahéi. O.

Peju ñañesũ ha ñamomba’e guasu ichupe.
Ñañesũ Ñandejára ñande apohare renondépe.
Ha’e hína Tupã, ñande katu hetãgua ha ijovecha ñu. O.

Pehendu nga’u ra’e he’i ramo: Ani pende py’a ratã
Meribápe guaréicha, Masápe pejapo haguéicha, yvy ojeiko’ỹháme.
Upe ramo pende rukuéra ypykue opu’ã va’ekue che rehe
ohecha ramo jepe umi mba’e ajapo va’ekue. O.

LECTURA MOKÕIHA:

Ko’ágã ñahendúta Tupã Ñandejára Ñe’ẽ San Pablo ohai va’ekue ikuatia mokõiháme Timotéope 1, 6-8. 13-14

Che ra’y rohayhuetéva: Ha’e ndéve, remombáy jevy haguã pe ne rembiaporã Ñandejára ome’ẽ va’ekue ndéve che rupi, amoĩ ramo guare che po nde rehe. Pe Espíritu Ñandejára ome’ẽva ñandéve niko ndaha’éi jakyhyje haguã avavégui, ñande py’a ñamombarete haguã katu, ha japorohayhu ha ñane akã guapy haguã.

Ani retĩ reñe’ẽ haguã Ñandejára Jesucrísto rehe, ha ani che rerotĩ añemo akãsã hague rehe Cristo rehehápe. Nde aveíkena ehasa asy remoherakuã hague rehe pe marandu porã. Ñandejára ne mombaretéta upéva reropu’aka haguã.

Eiko kena che rombo’e haguéicha, ha aheja haguéicha ndéve reiko haguã. Ani reheja pe jerovia ha mborayhu jarekóva Cristo Jesús ndive. Ha Espíritu Santo ñande pype oikóva rupikena, eñangareko porã umi mba’e nde pópe ojeheja va’ekue rehe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA 1Ped 1, 25

Tupã Ñandejára ñe’ẽ opa ára guarã opyta. Kóva ko ñe’ẽ hína pe marandu pyahu oñemoguahẽ va’ekue peẽme.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 17, 3b-10
Opavave: Romomba’e guasu ndéve, Ñandejára.

Upérõ Jesús he’i hemimbo’ekuérape: Nde rapicha ojapo ramo ivaíva, emongavaju. Ombyasy ramo, eheja rei chupe. Ha oimérõ py’ỹi etereíma hembiapo vai oikóvo ne ndive, ou ramo ombyasy nerenondépe, eheja rei chupe.

Umi apóstol he’i Ñandejára Jesúspe: — Emombaretevéna oréve ore jerovia. Jesús he’i chupekuéra: Oimérõ pende jerovia michĩ kytomi ramo jepe, mostása ra’ỹicha, peje kuaáta ko yvyra mátape: “Ejehapo’o ha tereho eñembo’y amo y mbytépe”, ha oikóta upe pejéva.

Ne rembiguái og̃uahẽvo oúvo ñúgui térã ne rymbakuérare oñangareko hágui, piko eréta chupe, “Eiképy jaguapy ha jakaru”. Nahániri. Eréta chupe, “Ejapóke chéve che karurã. Ha upéi emoĩ chéve mesápe ha’u hag̃ua. Ág̃a upe rire ekaru kuaáne”. Ha upéi ave, ndaipóri aipo jeguerohory ha mba’e chupekuéra upe hembiapo ojapo haguére.

Péicha va’erã avei peẽ. Ág̃a peikopa vove pene rembiapópe Ñandejára peg̃uarã, peje va’erã, “Tembiguái reimínte niko ore, ha
rojapo va’erãvante voi rojapo”.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.