LECTURAS JUEVES VIGÉSIMO SEGUNDO SEMANA

LECTURAS JUEVES VIGÉSIMO SEGUNDO SEMANA

Ñahendúta Tupã Ñandejára Ñe’ẽ San Pablo ohai va’ekue Corintos guápe 3, 18-23

Che pehẽnguekuéra: Aníke avave oñembotavy. Oimérõ pende apytépe oimo’ãva iñaranduha ko yvy arigua arandúpe, toiko jevy itavýva ramo, ikatu haguã iñarandu añete. Arandu ko yvy arigua niko, výro reiete Tupã Ñandejárape guarã. Tupã Ñandejára Ñe’ẽ voi niko he’i: “Tupã Ñandejára omoñuhã iñarandúvape, pe iñarandúpe voi”.

Ha he’i avei: “Tupã Ñandejára oikuaa opa iñarandúva remiandu výro reiha.” Upévare, avave ndojejapói va’erã yvypóra ikatúva ojapóre. Opa mba’e niko pene mba’e: Pablo, Apolo, Cefas, ko yvy, jeikove, ñemano, Ko’ágãgua ha tenondevegua. Opa mba’e pene mba’e ha, peẽ niko hína Cristo mba’e, ha Cristo katu Tupã Ñandejára mba’e.

Tupã Ñandejára Ñe’ẽ.

SALMO ÑEMBOHOVÁI 23, 1-4b. 5-6

Opavave: Ko yvy niko Ñandejára mba’e, opa mba’e ipype oĩva.

Ko yvy niko Ñandejára mba’e, opa mba’e ipype oĩva,
ha opa mba’e ipype oikóva,
Ha’e upe yvy omopyenda va’ekue,
yguasu ha ysyry ári omboguapy. O.

Mávapa ojupíne Tupã Ñandejára yvytýpe?
Mávapa opytáne itupao marangatúpe?
Umi ipo ha ipy’a ipotĩva ha ojeíva opa mba’e vaígui,
ta’ãnga omomba’e’ỹva térã Tupã réra oiporu rei rei’ỹva. O.

Umívape ohovasa Tupã Ñandejára,
ha oguenohẽ ichupekuéra jejopy vaígui.
Upéichako umi Tupã Ñandejárare ojeroviáva,
umi Jacob Tupã rendápe oguahẽva. O.

ALELUIA Mt 4, 19

Aleluia.
Ñandejára Jesucristo he’i: “Peju ha che moirü, pombo’éta penohẽ haguã pende rapichápe tape vaígui”.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese? 5, 1-11

Peteĩ jevy, Jesús oĩ jave yguasu Genesaret rembe’ýpe, oñandu ojopypaha ichupe umi távagua ohenduséva Tupã Ñandejára Ñe’ẽ. Jesús ohecha mokõi kanóa pe y rembe’ýpe. Umi pira renohẽha oguejy ra’e hikuái ojohéi haguã ipyahakuéra. Jesús ojupi peteĩvape, Simón mba’éva, ha ojerure ohomive haguã hyepývo pe y rembe’ýgui. Upéi oguapy pe kanóape, ha upe guive oñepyrũ ombo’e opavavépe. Oñe’ẽmbávo, he’i Simónpe: Eraha ko’ã kanóa pe y hypyvehápe, ha peity upépe pende pyaha penohë haguã pira.

Simón katu he’i: Mbo’ehára, pyhare pukukue romba’apo hína kuri ha noroguenohẽi mba’eve; ko’ágã nde erégui, aitýta umi pyaha.
Ojapo upéicha, ha heta iterei pira ho’a ha umi pyaha oñepyrũ osoro. Aipórõ ojepoity hikuái iñirũ nguéra ambue kanóa peguápe, oho haguã oipytyvõ ichupe kuéra. Ha’e kuéra oho, ha mokõive kanóa omoenyhẽtégui haimete oyguy.

Ohechávo upéva, Simón Pedro oñesũ Jesús renondépe ha he’i ichupe: Ani eja che rehe, che Jára, che niko peteĩ mba’e vai apoha!
Simón ha iñirũ nguéra niko tuicha iterei oñemondýi pe pira ho’a heta ite va’ekuére. Upéicha avei Santiago ha Juan, Zebedeo ra’y kuéra, omoirúva Simónpe. Jesús katu he’i Simónpe: Ani rekyhyje. Ko’águi rire rombo’éta renohẽ haguã nde rapichápe tape vaígui.
Aipórõ, omboja hikuái y rembe’ýpe ikanóa kuéra, oheja opa mba’e ha oho Jesús ndive.

Ñandejára Jesucristo Ñe’ẽ