LECTURAS LUNES TRIGÉSIMA SEMANA

LECTURAS LUNES TRIGÉSIMA SEMANA

Ñahendúta Tupã Ñandejára Ñe’ẽ San Pablo ohai va’ekue Éfeso guápe 4, 32-5, 8

Che pehẽnguekuéra: Pende py’a porã uvei ojupe, ha pejo poriahuvereko. Peheja rei ojupe mba’e vai pejapóva ojuehe, Tupã Ñandejára oheja rei haguéicha peẽme pene rembiapo vaikue Cristo rupi.

Peẽ niko Tupã Ñandejára ra’y ha’e ohayhuetéva, peñeha’ã pende py’a porã ha’éicha. Peiko joayhupápe Cristo ñande rayhu haguéicha, ha ome’ẽ haguéicha hekove ñande rehehápe Tupã Ñandejárape mba’e kuave’ẽ hyakuã asývaicha.

Peẽ niko Tupã Ñandejára mba’e ha kóicha peiko va’erã: Ani peñe’ẽ mba’eveichagua joguereko ky’áre, térã oimeraẽichagua teko ky’a ha mba’e pota reíre. Ani pene tie’ỹ, pene ñe’ẽ rei téra pene ñe’ẽ guasu. Ko’ã mba’e niko naiporãi pende rehe.

Umíva rangue pemomba’e guasu uvei Tupã Ñandejárape. Peikuaa porãke opa ojoguereko ky’áva, térã heko ky’áva, térã ipira pire rakate’ỹva rei, ndoike mo’ãi Cristo ha Tupã Ñandejára sãmbyhýpe. Pira pire rakate’ỹ niko jareko ramo guáicha ambue Tupã.

Ani peheja avave pene mbotavy ñe’ẽ reípe. Ko’ã mba’ére voi Tupã Ñandejára oinupã pochy umi ichupe iñe’ẽ rendu’ỹvape. Ani pejehe’a umívare. Peẽ niko yma peiko va’ekue  pytũmbýpe. Ko’ágä  katu, pejoaju rupi Ñandejára ndive, peiko tesapehápe. Peiko aipo ramo umi tesapépe oiko háicha.

Tupã Ñandejára Ñe’ẽ.

SALMO ÑEMBOHOVÁI   1, 1-4. 6

Opavave: Tupã Ñandejára rembiapoukapy ñande py’a ombohory.

Ovy’a ojapo’ỹva iñañáva ñe’ẽ, oiko’ỹva iñangaipáva ndive,

ojehe’a’ỹva umi Tupã Ñandejárare oñembohorýva ndive.

Tupã Ñandejára rembiapoukapy ipy’a ombohory,

ha hese ojepy’a mongeta ára ha pyhare. O.

Ojogua ku yvyra mátape oñeñotỹva y rembe’ýpe,

ome’ëva hi’a hi’árape, ha araka’eve ndahoguekúiva.

Opa mba’e ojapóva osẽ porã ichupe. O.

Ndaupéichai umi hembiapo vaíva,

kapi’i piru kuéicha umívape yvytu omboveve.

Hembiapo vaíva nosẽ porãi chéne Tupã ombojovakévo ichupe. O.

Iñangaipáva nahendái chéne imarangatúva apytépe.

Tupã Ñandejára oñangareko imarangatúva rapére.

Hembiapo vaíva rape katu opa vai. O.

ALELUIA Flp 3, 8-9

Aleluia.

Ñandejára Jesucristo he’i:

“Che ovecha kuéra ohendu che ñe’ë.

Che aikuaa ichupe kuéra ha ha’ekuéra oho che rapykuéri”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha 13, 10-17

Upe ramo peteĩ pytu’uha ára jave Jesús oñemoĩ oporombo’e peteĩ judíokuéra tupaópe. Ha oĩ hína upépe peteĩ kuña hasýva ojapóma 18 áño. Peteĩ mba’epochy omokarapã ra’e ichupe, ha ndaikatúi oñeakãupi.

Ohechávo upe kuña, Jesús ohenói ha he’i ichupe: Nde kuña, rekueráma ne mba’asýgui. Omoĩ ipo hese, ha upepete upe kuña oñeakãupi ha oñepyrũ oguerohory Tupã Ñandejárape. Pe judíokuéra tupao ruvicha katu ipochy, Jesús omonguera haguére upe kuñáme pytu’uha árape, ha he’i umi oĩvape: Oĩ niko 6 ára oñemba’apo haguã. Peju umi ára umívape peñe monguera haguã, ha ani pytu’uha árape.

Jesús he’i ichupe: Peẽ, tekove rova mokõi! Ndapejorái nga’u piko pene rymba guéi térã pene rymba vúrro pytu’uha ára jave, peraha haguã pemboy’úvo? Ko kuña peikuaa haguã, Abraham ñemoñaréva ha Satana oguereko va’ekue  iñapytĩmby ko mba’asýre ojapóma 18 áño, ndojejorái va’erãpa ra’e, taha’e jepe pytu’uha árape?

Jesús he’ívo péicha, umi hese ija’e’ỹva otĩ opytávo. Ha opavave katu ovy’a joa ohechávo umi mba’e guasu ha’e ojapóva.

Ñandejára Jesucristo Ñe’ẽ.