LECTURAS MARTES DÉCIMO TERCERO

LECTURAS MARTES DÉCIMO TERCERO

LECTURA PETEÎHA:

Ko’ágã ñahendúta Tupã Ñandejára ñe’ẽ Amós arandukápe oĩ háicha   3, 1-8; 4, 11-12

Pehendúke ko Ñe’ẽ Tupã Ñandejára he’íva pende rehe, opa ite ha’e oguenohẽ va’ekue Egíptogui: “Peẽme ño ite poiporavo va’ekue opa tetã yvy arigua apytégui. Upévare, poinupã rasýta opa pene rembiapo vaikuére”.

“Oĩpa oguatáva oñondive, oñemoĩ’ÿre oñoñe’ẽme?

Leónpa okororõva ka’aguýpe, ndoguerekói ramo tymba ojuka va’ekue?

León ra’ýpa ongururúva ikehápe, ndoguerekói ramo upe ho’u va’erã?

Guyrápa ho’áva yvýpe, ndaipóri ramo upépe ijapiha?

Ñuhãpa opóva, noĩri ramo ho’áva ipype?

Turu ipu ramo upe távape, noñemondýi piko opavave?

Upe távape ivaíva ojehu ramo, ndaha’éi piko Tupä Ñandejára ijapoha?

Tupã Ñandejára ndojapóiva mba’eve, he’i’ỹre umi maranduhárape ha’e oiporavóva hembijokuairã.

León okororõma.

Máva piko ndokyhyje mo’ãi?

Tupã Ñandejára he’íma iñe’ẽ.

Máva piko nomomarandu mo’ãi?”

“Pohundi va’ekue ñehundi guasúpe, Sodoma ha Gomorra rehe ajapo haguéicha, peẽ katu pepyta va’ekue tata’ýicha

tata guasúgui oñerenohẽva, ha ndapejeréi che rape rupi peguata jevy haguã!”

Tupã Ñandejára he’i péicha!

“Upévare Israel, kóicha ajapóta nde rehe, ha ajapótagui, eñemoĩke rejotopa haguã Tupã nde Jára ndive!”

Tupã Ñandejára Ñe’ẽ.

SALMO ÑEMBOHOVÁI     5, 5-8

Opavave: Che sambyhy kena Tupã Ñandejára

Oñembotuicháva noñembo’ýi chéne ne renondépe,

nde na nde a’éigui hembiapo vaívare, ha rehundi umi ijapúvape.

Oporojuka ha heko vaívape, Tupã ndohecha ramói. O.

Tembiapo vai ne mbojeguaru, heko ky’áva ndaha’éi ne mbohupa.

Oñembo tuicháva noñembo’ýi chéne ne renondépe,

nde na nde a’éigui hembiapo vaívare. O.

Che ne mborayhu tuichágui ore ndive, aike kuaa nde tupao peve,

añesũne nde tupao renondépe kyhyje pópe ha py’a mirïme. O.

ALELUIA Sal 129, 5

Aleluia.

Aha’arõ Tupã Ñandejárape ha arovia Iñe’ẽ.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha   8, 23-27

Upe ramo Jesús ojupi peteĩ kanóape ha hemimbo’ekuéra oho hendive. Ha péicha háguinte, oipeju pe yguasúpe peteĩ yvytu ne ratãva, ha pe y pochy oikepa pe kanóape. Jesús katu oke hína.

Upépe hemimbo’ekuéra omombáy Jesúspe ha he’i ichupe: Ore Jára, ore pytyvõ mína. Ja’yguy niko ñaína. Jesús katu he’i ichupekuéra: Mba’ére piko péichaite peve pekyhyje? Pejerovia’i eterei niko Tupãre.

Upépe Jesús opu’ã ha oñembo’y. Oja’o pochy pe yvytu ha pe ýpe, ha opi pe yvytu ha oguapy pe y. Hemimbo’e kuéra katu oñemondyipa ha oporandu ojupe: Mávatepa kóva, ko yvytu ha yguasu jepe iñe’ẽ  rendúva ichupe?

Ñandejára Jesucristo Ñe’ẽ