LECTURAS MARTES DECIMOOCTAVA SEMANA

LECTURAS MARTES DECIMOOCTAVA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 30, 1-2. 4. 12-15. 18-22

Kóva hína upe ñe’ẽ Tupã Ñandejára he’i va’ekue Jeremíaspe. “Tupã Israel Jára he’i: Ehai kuatiápe opa mba’e ha’e va’ekue ndéve, Tupä Ñandejára he’i: “Nde jekutukue ndaikatuvéi okuera, nde mba’asy naipohãvéi. Ndaipóri nde rehe ojepy’apýva.

Ndaipóri nde ai oipohanóva, ha na ne pohãi voi. Ne ñembokihakue hesaraipáma nde hegui, ndojepy’apy véima nde rehe. Che niko roikutu va’ekue ñande kutu háicha ñande rayhu’ỹva, roinupã pochy va’ekue ne rembiapo vaiku eta ha heta ite ne añanguére.

Mba’ére piko nde pochy rejekutu haguére? Ne mba’asy naipohãi. Hetaite ne añangue ha heta ne rembiapo vai haguére ajapo va’ekue nde rehe upéicha.

Tupã Ñandejára he’i: Amoambue jevýta Jacob retã rekove, hetã aiporiahuverekóta. Itávakuéra oñemopu’ã jevýta itapere kuépe, ha hóga guasu kuéra henda guépe.

Umívagui osẽta purahéi aguyje ha puka rory. Naimbovy mo’ãi, che ambohetáta ichupekuéra. Ndojeapo’i mo’ãi, che arohorýta ichupekuéra. Israelgua ha’éta yma guaréicha; hetãgua oĩ hatãta che renondépe, ha hendive ojopývape ainupãta. Ijapytégui anohẽta huvicharã: Peteĩ oporosãmbyhýva osẽta upégui voi. Amoñembojáta che rendápe.

Upéicha’ỹ ramo piko máva oñembojaséta che rendápe? Ha’ekuérata che retãgua, che katu ha’éta Itupã.
Che, opa mba’e Jára, upéicha ha’e.”

Tupã Ñandejára Ñe’ẽ.

SALMO ÑEMBOHOVÁI 101, 16-21. 29. 22-23

Opavave: Tupã Ñandejára ojechaukáta Siónpe heko mimbipápe

Tupä Ñandejára, tetã nguéra nde réragui okyhyjéne,
mburuvicha guasu kuéra ne momba’éne.
Tupä Ñandejára omopu’ã jevy vove Sión,
ha ojechaukávo heko mimbipápe,
ohendúne imboriahúva ñembo’e
ha nomboykéi chéne imba’e jerure. O.

Ne rembiguái ra’y kuérare reñangarekóne,
ha iñemoñare kuéra oiko porãne nde rupi.
Tupã Ñandejára réra ojererohorýne Siónpe,
héra oñemomba’éne Jerusalénpe, ágã tetã nguéra
oñemboatývo oñondive
omomba’e guasu joa haguã ichupe. O.

Ne rembiguái ra’y kuérare reñangarekóne,
ha iñemoñare kuéra oiko porãne nde rupi
Tupã Ñandejára réra ojererohorýne Siónpe,
héra oñemomba’éne Jerusalénpe,
ágã tetã nguéra oñembyatývo oñondive
omomba’e guasu joa haguã Tupã Ñandejárape. O.

ALELUIA Jn 1, 49b

Aleluia.
Mbo’ehára, nde ningo Tupã Ñandejára Ra’y. Nde hína Mburuvicha guasu Israelpe guarã.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha14, 22-36

Upe ramo Jesús he’i hemimbo’ekuérape ojupi haguã peteĩ kanóape ha ohasa haguã henonderã y mboypýri. Upe aja ha’e he’íta opavavépe oho haguã hógape. Omondopa rire opavavépe hógape, Jesús ojupi peteĩ yvytýpe oñembo’e haguã ha’eñoháme. Pyhare oguahẽvo, Jesús oĩ gueteri upépe ha’eño.

Pe kanóa katu ohupitýma pe y mbyte rupi. Pe y pochy katu oñenupã pe kanóa tĩre, ohuguãitĩgui ohóvo hikuái yvytu. Ha ko’ẽ mbotávo, Jesús oñemboja hendápe kuéra oguatahápe pe y apére. Hemimbo’ekuéra katu ohechávo ichupe oguatáva ohóvo y apére, tuicha oñemondýi ha okyhyjégui osapukái: Póra niko upéva!

Jesús katu oñe’ẽ ichupe kuéra, ha he’i: Chénteko! Ani pekyhyje.

Upépe Pedro oñe’ẽ ichupe, ha he’i: Che Jára, nde ramo añete, eheja chéve taha ne rendápe y apére.

Jesús he’i ichupe: Eju.

Upévo Pedro oguejy pe kanóagui ha oñepyrũ oguata pe y apére, ohóvo Jesús rendápe. Oñandúvo pe yvytu ratã katu okyhyje ha oñepyrũ oyguy. Upépe hatã osapukái: Che Jára, che pytyvõke!

Upévo Jesús ipojái ipóre, ha he’i ichupe: Rejerovia’i eterei ra’e! Mba’ére piko nde py’a mokõi reguata haguã? Ha’ekuéra ojupívo pe kanóape, opi pe yvytu. Ha umi oĩ va’ekue pe kanóape oñesũmba Jesús renondépe, ha he’i ichupe: Nde niko añete Tupã Ra’y.

Ohasa hikuái pe y mboypýri ha oguahẽ Genesarétpe. Ha umi upepegua oikuaávo Jesús oguahẽ hague, opa rupi ojekuaa, ha ogueru hikuái hendápe opaichagua hasýva. Ojerure ichupe hikuái opokomínte haguã ijao rembe’ýrente jepe, ha opokóva guive hese, okuera.

Ñandejára Jesucristo Ñe’ẽ