LECTURAS MARTES DECIMOQUINTA SEMANA

LECTURAS MARTES DECIMOQUINTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 7, 1-9

Siria ruvicha guasu Resín, ha Israel ruvicha guasu Pécah Remalías ra’y, ondyry Jerusalén rehe; oñemo mba’ese hese ha nda ikatúi. Kóva ojehu Ahaz Jotam ra’y ha Ozías remineno Judá ruvicha guasúrõ guare.

Upérõ oñemo marandu mburuvicha guasu Ahaz ha hóga guápe: “Síriokuéra oñomo irũ Efraín ndive.” Mburuvicha guasu ha maymáva hetãgua oñepyrũ oryrýi, yvyra roguéicha ka’aguýpe oipeju ramo yvytu.

Upérõ Tupã Ñandejára he’i Isaíaspe: “Eraha nde ra’y Sear-Jasub ha tereho ejotopa mburuvicha guasu Acab ndive y rape apýpe, y no’õ yvate guápe, pe tape ohóvape ao joheiha ñúme, ha ere ichupe: ‘Cháke, ani reñemondýi, ani rekyhyje térã ne py’a mirĩ, umi mokõi tata’y rendýre, Resín sírio kuéra reheve ha Remalías ra’y ipochy rendýva hína.

Sírio kuéra, ha Efraingua Remalías ra’y ndive, ojapose nde rehe ivaíva.’ He’i hikuái: ‘Ñandyry Judáre ha ñamongyhyje, ñañe momba’e hese, ha ñamoĩ huvicha guasúrõ Tabeel ra’ýpe.’ Tupä Ñandejára katu he’i: ‘Upéva ndojehu mo’ãi!

Damasco hína Siria táva guasu, ha Resín, Damasco ruvicha guasu. Samaría hína Efraín táva guasu, ha Remalías ra’y, Samaría ruvicha guasu; 75 áño haguépe katu, Efraín ndaha’e mo’ã véima tetã; ha peẽ ndapejerovia mbaretéirõ, nda pepyta mo’ãi avei ñembo’yhápe.”

Tupã Ñandejára Ñe’ẽ.

SALMO ÑEMBOHOVÁI 47, 2-8

Opavave: Tupãme jaropurahéi va’erã, itáva ha ijyvyty marangatúpe.

Ajépa tuichaite Tupã Ñandejára.
Tupãme jaropurahéi va’erã, itáva ha ijyvyty marangatúpe.
Ajépa iporã iteyvyty Sión, amo yvate gotyo opu’ãva.
Opa ko yvy niko ombovy’a. O.

Che ñembo’e ojupi ne renda peve Tupã Ñandejára.
Upépe oiko mburuvicha guasu tuichavéva.
Ajépa iporã iteyvyty Sión, amo yvate gotyo opu’ãva.
Opa ko yvy niko ombovy’a. O.

Tupã Ñandejára omo’ã opaite hendápe oguahẽvape,
Tupã Ñandejára, óga guasúpe oikóva, kóicha ojekuaauka.
Mburuvicha kuéra oñemoĩ peteĩ ñe’ẽme,
ha oñondive ou ichupe hikuái. O.

Upe táva ohechávo katu oñemondýi, upépema katu tuichave okyhyje hikuái, ha kuña imemby pota vaicha oryrýi osusũ,
oityvyro ha omboyguýva Tarsis pegua ygakuéra. O.

ALELUIA Cf. Sal 94, 8a. 7d
Aleluia.
Ani pemohatã pene korasõ, pehendu uvei Tupã Ñandejára ñe’ẽ.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 11, 20-24

Upe ramo Jesús oñepyrũ oñe’ẽ pochy umi távare hetave mba’e hechapyrãva ojapo haguépe. Umi upepegua niko nombyasýi iñangaipa. Ha Jesús he’i: Ejererekóke nde, táva Corazín! Ejererekóke nde, táva Betsaida! Táva Tiro ha Sidónpe ajapo rire umi mba’e hechapyrãva ajapo va’ekue pende pype, ymáma ojere va’erã mo’ã hikuái Tupã Ñandejárape, ha omonde va’erã mo’ã ao vosakue ha oguapy tanimbu ári, ohechauka haguã ombyasyha iñangaipa.

Upévare ha’e peẽme, Tupã Ñandejára oporo mbojovakeha árape, peẽ peñe nupã pohyivéta umi táva Tiro ha Sidón peguágui.

Ha nde, táva Cafarnaúm, reimo’ã piko reguahẽtaha yvágape? Tupã Ñandeajára uvei nde reitýta omanóva retãme. Sodómape ajapo rire umi mba’e hechapyrãva ajapo va’ekue nde pype, upe táva oĩ va’erã mo’ã gueteri ko’ágãite peve. Upévare ha’e peẽme, Tupã Ñandejára oporo mbojovakeha árape, peẽme peñe nupã pohyivétaha umi Sodoma peguágui.

Ñandejára Jesucristo Ñe’ẽ