LECTURAS MIÉRCOLES VIGÉSIMO

LECTURAS MIÉRCOLES VIGÉSIMO

LECTURA PETEÎHA:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha   34, 1-11

Tupã Ñandejára he’i chéve: “Nde kuimba’e, eñe’ẽ che rérape ha ehova api umi ovecha rerekua Israel guápe, ha ere ichupe kuéra: ‘Kóicha he’i Tupã Ñandejára: Aichejáranga umi ovecha rerekua Israelgua, oñangarekóva ijehénte!

Oñangareko rangue ijovecha kuérare. Peẽ pemboy’u pe kamby, pejapo pende aorã haguekuégui ha pejuka umi ovecha ikyravéva, ha napeñangarekói pende ovecha atýrare.

Peẽ napeipytyvõi pende ovecha ikangyvévare ha napemonguerái umi hasýva, ndapejokuamíri umi hetyma opẽ va’ekuépe, ndaperu jeýi umi hape avy va’ekuépe, ndapehekái umi okañývape, pereko vai uvei katu. Che ovecha kuéra opyta iñangarekoha’ỹre ha isarambipa ha umi tymba ñarõ ho’upa ichupekuéra. Isarambipa umi ka’aguy ha yvytykuéra rupi, hape avypa yvy tuichakue, ha ndaipóri avave ojepy’apýva hesekuéra ha oho oheka.

Aipórõ, peẽ ovecha rerekua, pehendu porãke che ñe’ẽ: Che, Tupã Ñandejára, ha’e che rekovére: Tymba ñarõ opaichagua omonda ha ho’upa che ovechakuéra ndaherekuáigui. Umi che ovecha ñangarekohakuéra ndohói oheka umi che ovechápe. Ha’ekuéra oñangareko ijehénte ha noñangareko che ovecha atýre.

Upévare, peẽ ovecha rerekua, pehendu ko ñe’ẽ: Che, Tupã Ñandejára, ha’éva peẽme: Peẽ, ovecha rerekua: Aikuaauka peẽme che pende rayhu’ỹha, ha aipe’áta pende pógui che ovechakuéra ha ndaheja mo’ã véima peñangareko hesekuéra. Upéicha ramo, peẽ ovecha ñangarekoha ndapeiko mo’ãvéima peñangareko pende jehénte. Aipe’áta pende hegui che ovechakuéra ha araka’evéma ndapeiko mo’ãvéi pe’upa rei peikóvo.”

Che, Tupã Ñandejára, ha’e: Péina ápe aime! Chete aháta aheka ha añangareko che ovecha kuérare.

Tupã Ñandejára Ñe’ẽ.

SALMO ÑEMBOHOVÁI  22, 1-6

Opavave: Tupã Ñandejára che rerekua, mba’eve naikotevẽi.

Tupä Ñandejára che rerekua, mba’eve naikotevẽi.

Ñu rovyũ asýpe che mombytu’u, y satĩ ypýpe che moguahẽ.

Che mombarete jevy, ha tape hekópe guáre che reraha héra rehehápe. O.

Che mombarete jevy, ha tape hekópe guáre che reraha héra rehehápe.

Ahasa ramo jepe ka’aguy ypytũ rupi, ndakyhyjéi chéne, nde, che Jára, reimégui che ndive.

Nde yvyra jekoha, nde rehe che mbojerovia. O.

Karu guasu chéve rejapo umi che rayhu’ỹva rovake.

Che akãre reñohẽ mba’e ryakuã asy, ha upe hay’uha remoenyhẽ chovi.

Ne mborayhu ha ne mba’e recha kuaa,

rehechauka chéve aikove aja pukukue,

ha nde rógape Tupã Ñandejára, aikóne opa árape. O.

ALELUIA Heb 4, 12

Aleluia.

Tupã Ñandejára Ñe’ẽ hekove ha ikatupyry; oiporavo umi ivai ha iporãva ha opa mba’e

oïva ñane korasõme.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha   19, 30 – 20, 16

Upe ramo Jesús he’i hemimbo’ekuérape: Ñesãmbyhy yvágagui oúva niko ojogua ku kokue járape osẽva pyharevete ohekávo omba’apo va’erã ichupe iparraltýpe. Ha oguahẽ rire peteĩ ñe’ẽme ome’ẽvo ichupekuéra pe viru oñeme’ẽva voínte peteĩ ára oñemba’apo va’ekuére, omondo ichupekuéra iparraltýpe. Upéi asajeve, osẽ oho oñeñemuháme ha upépe ojuhu hetã hembiapo’ỹvape.

He’i ichupe kuéra: “Tapeho peẽ avei pemba’apo che parraltýpe, ha hekoitépe ame’ẽta peẽme viru”. Ha oho hikuái. Pe óga jára osẽ jevy asajepyte, ha upéi katu ka’aru asaje rupi, péicha jevy ojapo. Ha ka’aru ete, osẽ oho jevy upe oñeñemuháme ha ojuhu jevy upépe hembiapo’ỹvape. Ha he’i ichupe kuéra: “Mba’ére piko peẽ peime rei peína ko’ápe ára pukukue pemba’apo’ỹre?”

He’i hikuái ichupe: “Avave niko na ore nomba’apói.” Upérõ he’i ichupekuéra: “Tapeho pemba’apo peẽ avei che yvýpe, ha ame’ẽta peẽme viru heko itépe.” Ka’aru pytũvo pe óga jára he’i pe iparralty ñangarekohárape: “Ehenói umi omba’apóvape ha eme’ẽ ichupekuéra pe hembiapokue repy. Eñepyrũ umi itapykueve oguahẽ va’ekuégui ha ipahávo eme’ẽ umi oike tenondeve va’ekuépe.” Ha oguahẽ umi ka’aru ete oike va’ekue, ha ichupe kuéra oñeme’ẽ viru omba’apórõ guáicha peteĩ ára pukukue.

Upéi, oguahẽvo umi tenondete oike va’ekue, oimo’ã ichupe kuéra oñeme’ẽ hetavetaha. Ichupekuéra katu oñeme’ẽ umi ambuépe oñeme’ẽ haguéichante. Oñeme’ẽvo ichupekuéra hembiapokue repy, oñepyrũ ipochy pe óga jára ndive.

He’i ichupe: “Umi tapykue oike va’ekue  niko, sapy’amínte omba’apo ha reme’ẽ ichupekuéra oréve reme’ẽ háicha, jepe ore ára pukukue romba’apo pe kuarahy akúpe.” Pe óga jára katu he’i ichupe kuéra: “Che irũ, ndajapói niko nde rehe mba’eve hendape’ỹva. Ndajapytái nga’u piko ra’e remba’apotaha chéve virúre oñeme’ẽva peteĩ ára oñemba’apóvare?

Erekóma niko ne rembiapo repykue, tereho nde rógape. Che ame’ẽse ramo pe tapykuete oike va’ekuépe ndéve ame’ẽ háicha, piko máva he’íta chéve mba’eve, ajapo haguére ajaposéva viru arekóvagui? Nde pochynga’u piko che ndive, che mba’e porã haguére?”

Upéi he’i Jesús: “Ha péicha, umi itenondéva itapykuéta, ha umi itapykuéva itenondéta.”

Ñandejára Jesucristo Ñe’ẽ