LECTURAS VIERNES DECIMOSEXTA SEMANA
22 julio, 2022LECTURAS DOMINGO DECIMOSÉPTIMA SEMANA
24 julio, 2022LECTURAS SÁBADO DECIMOSEXTA SEMANA
Ko’ágã ñahendúta Tupã Ñandejára ñe’ẽ Jeremías arandukápe oĩ háicha 7, 1-11
Tupã Ñandejára he’i Jeremíaspe: “Eñemoĩ tupao rokẽme ha emomarandu upépe ko ha’éva ndéve: Mayma Judagua peikéva ko’ã okẽ rupi pemomba’e guasúvo Tupã Ñandejárape, pehendu ko he’ikáva Tupã Israel Jára ipu’akapáva: ‘Pemoporãve ramo pende rekove ha pene rembiapokue, pohejáta peikove ko yvýpe. Aníke perovia umi pene mbotavývape he’ívo: Ápe oĩ Tupã Ñandejára tupao! Ápe oĩ Tupã Ñandejára tupao!
Pemoporãve ramo pende rekove ha pene rembiapo ha pende rekojoja ramo oñondive, ndapejopýi ramo mombyrygua, tyre’ỹ ha kuña iména manóva ndive, ndapejukái ramo ko’ápe tapicha hembiapo vai’ỹvape, napemomba’e guasúi ramo tupã ambuekuérape ivaíva mante peẽme oguerúva, pohejáta peikove ko yvy ame’ẽ va’ekue opa árapeve guarã pende ru kuéra ypykuépe.
‘Peẽ pejerovia ñe’ë japu ha výro reíre. Pemonda, pejuka, peiko kuña pene mba’e’ỹva ndive, peme’ẽ japu pene ñe’ẽ, peikuave’ẽ insiénso Baálpe, pemomba’e guasu tupã mombyrygua peikuaa’ỹvape, Ha upéi peju ko tupao che mba’évape peñemoĩvo che renondépe.
Peimo’ã ko’ápe peimetaha kyhyje’ỹre. Peimo’ã ikatuha akóinte pejapo umi mba’e che mbopochýva. Peimo’ã piko ko tupao, chéve oñemopu’ã va’ekue , ha’eha mondaha kuára? Che ahecha opa ko’ã mba’e. Che, opa mba’e Jára, upéicha ha’e.
Tupã Ñandejára Ñe’ẽ.
SALMO ÑEMBOHOVÁI 83, 3-6a. 8a. 11
Opavave: Tupã Ñandejára, javy’aite piko nde rógape.
Che py’a ite guive che ãho
nde tupao róga guýre.
Che py’aite guive hi’ãnte
chéve apurahéi Tupã Ñandejára oikovévape. O.
Guyra’i jepe ojuhu hogarã,
ha mbyju’i ojaitypo haguã, nde altar
ypy rupi oja haguãme hupi’a,
Tupã, opa mba’e jára, Tupã, che ruvicha guasu. O.
Ovy’aite va’erãpa umi nde rógape oikóva
ha opa ára nde reropurahéiva!
Ovy’a ite va’erãpa umi nde pype ojuhúva pytyvõ
oñepyrũvo oguata nde rape rupi. O.
Aikoseteve peteĩ árante jepe nde róga guýpe,
aiko rangue mil ára oimehápe rei.
Aikoseve nde róga rokẽ rerekuárõ,
aiko rangue iñañáva róga guýpe. O.
ALELUIA Sant 1, 21bc
Aleluia.
Pejapyhýke py’a porãme pe Ñe’ẽ oñeñotÿva pende pype, ikatúva pene pysyrõ.
Aleluia.
EVANGELIO
Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 13, 24-30
Upe ramo Jesús omombe’u jevy opavavépe ambue ñe’ẽ mbojoja. Ha he’i ichupe kuéra: “Tupã Ñandejára sambyhy yvágagui oúva niko ojogua peteĩ oñotỹ va’ekuépe mba’e ra’ỹi iporãva ikokuépe.
Peteĩ pyharépe katu, ojekepa jave hína, oike ikokuépe peteĩ hese ija’e’ỹva ha oñotỹ ñana pe trígo apytépe, ha upéi oho. Pe trígo ty oñepyrũ opu’ã. Ha hi’ávo katu opu’ã avei umi ñana ijapytépe. Pe kokue jára rembiguái kuéra oho hendápe ha he’i ichupe: ‘Karai, pe mba’e ra’ỹi reñotỹ va’ekue nde kokuépe niko iporã va’ekue.
Mba’éicha piko péicharõ osë ko’ã ñana ijapytépe?’ Pe kokue jára he’i ichupekuéra: ‘Oime va’erã niko peteĩ che rayhu’ỹva ojapo ra’e.’
Upépe umi hembiguái he’i ichupe: ‘Rohótapa romondóro umi ñana?’ Ha’e katu he’i ichupe kuéra: ‘Nahániri, ani ágä pemondorokuévo umi ñana, pemondoro avei umi trígo. Iporãve jahejánte okakuaa oñondive oguahẽ meve ñemono’õha ára. Upe ñemono’õha árape, ha’éta umi omba’apóvape omondoro raẽ haguã umi ñana, ha ojokua aty atýpe ojehapy haguã. Upe rire omboatýne hikuái pe trígo, ha omoĩ oñeñongatu haguãme.”
Ñandejára Jesucristo Ñe’ẽ