LECTURAS SÁBADO TRIGÉSIMA SEMANA

LECTURAS SÁBADO TRIGÉSIMA SEMANA

Ñahendúta Tupã Ñandejára Ñe’ẽ San Pablo ohai va’ekue Filipos guápe 1, 15. 18b-26

Che pehẽnguekuéra: Marãve ndoikói. Ta ha’e py’a porãme térã tova mokõime, Cristo oñemoerakuãma guive, upéva che mbovy’a.
Ha avy’avétante hína, aikuaa niko opa ko’ã mba’e ou porãtaha chéve asẽ haguã sã’ỹme, peẽ peñe mbo’e rupi che rehe, ha Cristo Espíritu che pytyvõ rupi. Aikuaa porãeterei Tupã Ñandejára nda che reja vai mo’ãiha, jepiguáicha uvei ohechaukataha che rupi opavave rovake Cristo tuichaha, taha’e aikove ramo, taha’e amano ramo.

Chéve guarã niko che rekove hína Cristo, ha amanórõ katu aime porãvéta. Opáichavo, iporãvétarõ aikove Tupã Ñandejára rembiapópe guarã, ndaikuaái mba’épa aiporavóta, Hasy aiporavo haguã. Amanose aiko haguã Cristo ndive, upéva niko iporãvéta chéve guarã. Pende rehehápe katu iporãve aikove ramo.

Upévare aikuaa apytavetaha pene ndive poipytyvõve haguã, pekakuaave ha pevy’ave haguã pende jeroviápe. Upéicha pe che rereko jevýta pene ndive, ha che rupi pevy’avéta Cristo mba’égui peẽ.

Tupã Ñandejára Ñe’ẽ.

SALMO ÑEMBOHOVÁI 41, 2-3. 5bcd

Opavave: Che ãnga nde hegui henyhẽse, Tupã Ñandejára reikovéva.

Ku guasu yuhéi ijuku’a háicha
ojeheka ysyry porãre,
upéicha che ánga henyhése
nde hegui, Tupã Ñandejára. O.

Che ángänte hegui henyhẽse,
Tupã Ñandejára reikovéva.
Araka’épa ijáne chéve, ne rendápe aguahẽ
ha romomba’e guasu? O.

Che mandu’ávo umi ára ohasa va’ekuére,
techaga’u che aho’i.
Che mandu’a aha ramo maymáva renondépe,
ha roguahẽ tupaópe purahéi ha vy’a pópe. O.

ALELUIA Mt 11, 2ab

Aleluia.
Ñandejára Jesucristo he’i: “Pemoĩ pende apére che mba’e pohýi ha peikuaa che hegui, che chepy’aguapy ha korasõ oñemo michĩ.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 14, 1. 7-11

Upe ramo peteĩ pytu’uha árape, Jesús oho okarúvo peteĩ fariséo ruvicha rógape. Ha okáguio umi fariséo oma’ẽ ñemi hese. Jesús ohechávo, umi ohóva okarúvo oiporavoha oguapy haguã umi oñembojeroviavéva oguapyhápe, oñemoñe’ẽ ichupekuéra kóicha:
Reñehenóirõ peteĩ ñemenda karu guasuhápe, ani reguapy pe iñakãme.

Cháke ikatu oguahẽ peteĩ mba’e guasuvéva nde hegui, ha pe óga jára pene renói va’ekue mokõivépe, ikatu ou he’i ndéve: ‘Eme’ẽ ne renda amóvape’. Aipórõ rehóne ñemotĩme reguapy pe ipahaitépe. Reñehenóirõ karuhápe eguapy uvei pe ipahaitépe, ikatu haguã pe ne renói va’ekue ou he’i ndéve: ‘Che irũ, ehasa peteĩ iporãvehápe.’ Upéicharõ, oñemoengoviáta ndéve umi oguapýva ne ndive mesápe, ne renondépe. Pe oñembotuicháva oñemomichĩta, ha pe oñemomichĩvape oñembotuicháta.

Ñandejára Jesucristo Ñe’ẽ.