LECTURAS SÁBADO VIGÉSIMO

LECTURAS SÁBADO VIGÉSIMO

LECTURA PETEÎHA:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha     43, 1-7a

Pe karia’y che reraha okẽ kuarahy resẽ gotyogua gotyo, ha ahecha ouha Tupã, Israel Jára, reko mimbipa upe kuarahy resẽguio, peteĩ tyapu nde tuicháva reheve, ha’ete umi y osyry hatãva ha yvy hesakãmba heko mimbikuépe. Pe mba’e ahecháva ha’ete ku ahecha va’ekue  avei, ou ramo guare Tupã Ñandejára ohundívo Jerusalén, ha ako aime ramo guare ysyry Quebar rembe’ýpe. Ajayvy ha amboja che syva yvýre. Tupã Ñandejára reko mimbipa oike tupaópe, okẽ kuarahy resẽ gotyogua rupi.

Tupã Ñandejára pokatu che rupi ha che reraha pe ogaguy hyepývo guápe ha ahecha mba’éichapa pe Tupã Ñandejára reko mimbipa omoenyhẽmba pe tupao. Ha ahendu peteĩ oñe’ẽva chéve tupao kotypy guive, pe karia’y oñembo’y aja che ykére.

Upe oñe’ẽva he’i chéve: ‘Nde kuimba’e, kóva ha’e che guapyha, mamo amoĩháme che py, ko’ápe aikóta Israelguakuéra pa’ũme opa ára guarãma. Israelguakuéra ha opa huvicha guasu nomongy’a mo’ã véima che réra, umi heko ky’akuépe ha huvicha guasukuéra re’õngue ha ityvy kuéra ñemopu’ãme.

Tupã Ñandejára Ñe’ẽ.

SALMO ÑEMBOHOVÁI 84, 9ab. 10-14

Opavave: Tupã Ñandejára he’i ome’ẽtaha py’aguapy

Amomarandúta Tupã Ñandejára he’íva.

Ha’e he’i ome’ẽtaha py’aguapy iñirü ha hese ojeroviávape

Hi’aguĩ ára oipysyrö haguã umi ichupe omomba’évape.

Tupã Ñandejára, nde reko mimbipa ojekuaáne ore yvýpe. O.

Mborayhu ha añete oñuguãitĩne, py’aguapy ha teko joja oñoañuãne.

Añete heñóine upe yvýgui, ha teko joja yvágagui oma’ẽne. O.

Tupä Ñandejára, ha’ete voi ome’ẽta ñandéve iporãva,

ha ko ñande yvy ome’ẽta hi’a.

Teko joja ohóne henonderã, ombosako’ívo ichupe haperã. O.

ALELUIA Mt 23, 9b. 10b.

Aleluia.

Peë niko peguereko peteï  túva añónte: Pe Túva  yvágapegua;

peguereko peteĩ pohanohára añónte, pe Mesías.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha   23, 1-12

Upe ramo Ñandejára he´i opavavépe ha hemimbo’ekuérape:

Umi Moisés rembiapoukapy mbo’eha ha umi fariséokuéra ári oĩ oikuaaukávo Moisés rembiapoukapy. Upévare, pene ñe’ẽ rendu va’erã ichupe kuéra ha pejapo va’erã opa ha’e kuéra he’íva.

Upe ha’ekuéra ojapóva katu ani peẽ pejapo. Ha’ekuéra niko he’i peteĩ mba’e ha ndojapói pe he’íva. Ha’e kuéra niko omoĩ opavave apére mba’e pohýi ikatu’ỹva jaropu’aka. Oity avei opavave apére mba’e pohýi, ha peteĩ ikuãme jepe ndopokoséi hese.

Opa umi mba’e ojapóva, ojechauka haguãnte ojapo. Oñapytĩ isyva ha ijyvakuérare Tupä Ñandejára Ñe’ẽ ryru tuicha tuicháva, ha ombopukuve ijao fléko. Oĩ porãvetahápe oguapy karu guasuhápe ha judíokuéra tupaópe. Tape rupi katu oipota oñemomaitei ichupekuéra karai guasúicha ha opavave te’i ichupe kuéra “Mbo’ehára”.

Peẽ katu ani peheja avavépe pene renói mbo’ehára. Peĩ niko ojoryvy hína, ha peteĩnte pene Mbo’ehára. Ha ani avavépe peje ko yvy ári “Ore Túva”. Peteĩnte niko pende Túva, ha ha’e oĩ yvágape. Ani avei peheja avavépe he’i peẽme “Ore mbo’ehára”, peteĩnte niko pene mbo’ehára ha upéva pe Mesías. Pe mba’e guasuvéva pende apytépe, tembiguáicha ojejokuaiuka va’erã. Tupã oitýta yvýre pe oñemomba’e guasusévape, ha upe oñemomichĩvape katu omomba’e guasúta.

Ñandejára Jesucristo Ñe’ẽ