LECTURAS SANTOS PEDRO Y PABLO, APÓSTOLES

LECTURAS SANTOS PEDRO Y PABLO, APÓSTOLES

LECTURA PETEÎHA:

MISA DEL DÍA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha     12, 1-11

Mburuvicha guasu Herodes oñepyrũ oñemoĩ pe iglésia rehe. Ojukauka kyse pukúpe Juan ryke’y Santiágope. Ha ohechávo upéva oguerohoryha Israelgua, omonambika avei Pédrope. Kóva ojehu umi ára oñembyarete jave mbujape añembovu’ỹva. Herodes omoingeka Pédrope koty ypytũme, oñangarekohápe hese irundy ñorairõhára  aty, irundy ñorairõhára  reheve peteï teĩ atýpe. Omoĩse ichupe tetãgua pópe Páskua arete rire. Pedro oĩ aja koty ypytũme, pe iglésia oñembo’e hese ipy’aite  guive.

Upe Herodes omoĩtaha árape Pédrope tetãgua pópe, ha’e oke hína mokõi ñorairõhára  pa’ũme, ojepokua mokõi kadénape, ha okápe ñorairõhára  kuéra oñangareko pe okẽ rehe. Upeichahágui nte oguahẽ sapy’a peteĩ Ñandejára remimbou, ha pe koty ypytũ ojehesapepa.

Pe Ñandejára remimbou opoko Pédrore ijyképe ha omombáy ichupe he’ívo: “Epu’ã pya’e!” Upévo umi kadéna ho’a Pedro pógui, ha Tupã remimbou he’i ichupe: “Eñemonde ha emoĩ nde sapatupe”. Pedro ojapo upéicha ha pe Tupä remimbou he’i jevy: “Emoĩ nde ahoja ha che moirũ”.

Pedro osẽ pe Tupã remimbou rapykuéri, oikuaa’ỹ rehe añetépa pe Tupã remimbou rembiapo térã iképe guánte upe ohechava. Ohasa rire hikuái pe ñorairõhára  aty peteĩha ha upe mokõiha, oguahẽ upe oka pegua okẽ fiérrope, ha upéva ojepe’a ijehegui rei. Osẽ hikuái ha ohasa rire peteï tape, pe Tupã remimbou oheja ichupe.

Upéma ramo  Pedro ohechakuaa ha he’i: “Ko’ágã ae ahecha porã Ñandejára, hemimbou rupi, che pe’a hague Heródesgui ha umi Israelgua che rehe ojapose va’ekuégui”.

Tupä Ñandejára Ñe’ẽ

SALMO ÑEMBOHOVÁI    33, 2-9

Opavave: Ñandejára oipe’a che hegui che mongyhyjéva.

Amomba’e guasúta opa ára Ñandejárape,

ichupe aropurahéita tapiaite.

Ñandejára ombovy’a che rekove.

Imboriahúva tohendu ha tovy’a! O.

Oñondive ñamomba’e guasu Ñandejárape,

héra jaropurahéi oñondivepa.

Ñandejárape añembo’e, ha’e che rendu,

ha oipe’apa che hegui umi mba’e che mongyhyjéva. O.

Umi Ñandejára rehe ojeroviáva vy’águi ojajaipáne,

ha hova noñomi chéne ñemotĩgui.

Imboriahúva, Ñandejárape añembo’e.

Ha’e, ohendu ha che pe’a jejopy vaígui. O.

Ñandejára remimbou oñangareko

ha oguenohẽ jejopy vaígui opa umi hese ojeroviávape.

Peha’ã ha pehecha Ñandejára imba’e porãha.

Ovy’a rasa upe hese ojeroviáva. O.

LECTURA MOKOÎHA:

Ñahendúta Tupã Ñandejára Ñe’ẽ San Pablo ohai va’ekue ikuatia ñe’ẽ mokõiháme Timotéope   4, 6-8. 17-18

Che ra’y rohayhuetéva:

Che katu aiméma ame’ẽ haguãicha che rekove Tupãme ikuave’ẽmby ramo. Hi’aguĩma ára amano haguã. Heko itépe niko añorairõ, ipahaite peve añani, ha ndajeíri che jeroviágui. Ha ko’ágã aha’arõ hína pe jeguaka Ñandejára Jesucrísto , Mbojovakehára heko jojáva, omoĩtava che akã rehe pe árape, che reko potĩ hague rehe. Ha ndaha’e mo’ãi chéve añónte ome’ẽtava. Ome’ẽta avei opa umi ipy’a ite  guive oha’arõvape ha’e ou jevy.

Ñandejára mante che pytyvõ ha che mombarete. Upéva rehe, ikatu va’ekue amoherakuã pe marandu oipysyrõva opa umi Tupä rehe ojerovia’ỹvape. Ha upéicha Ñandejára Jesucrísto  che pe’a jaguare te jurúgui. Ha’e che mo’ãne opa mba’e vaígui, ha che rerahane yvágape ha’e oisãmbyhyhápe. To ñemomba’e  guasu ichupe opa ára! Amén.

Tupä Ñandejára Ñe’ẽ.

ALELUIA    Mt 16, 18

Aleluia.

Che ha’e ndéve Pedro, nde réra niko he’ise ita. Ko ita ári amopu’ãta che Iglésia, ha mano jepe ndaipu’aka mo’ãi hese.

Aleluia.

EVANGELIO

Ko’ágã ñahendúta Ñandejára Jesucrísto  rekove ha hemimbo’e San Mateo omombe’u háicha 16, 13-19

Jesús oho táva Cesarea Filípope, ha upépe oĩ aja oporandu hemimbo’e kuérape:

Che, yvypóraicha aju va’ekue rehépa, mavaha chépa oje’e?

Ha’ekuéra he’i ichupe: Oĩ he’íva ndeha Juan Bautista. Oĩ he’íva ndeha Elías, ha oime katu he’íva ndeha Jeremías térã ambue maranduhára.

Jesús oporandu ichupekuéra: Ha peẽ piko mba’e peje, mávapa che?

Ha Simón Pedro he’i ichupe:

Nde hína upe Mesías, Tupã rembiporavo ha Tupã oikovéva Ra’y.

Jesús he’i ichupe:

Revy’aitétapa nde Simón, Juan ra’y. Avave rupi ndereikuaái kóva, che Túva yvágape oĩva oikuaaukáva ndéve. Che ha’e ndéve Pedro, nde réra niko he’ise ita. Ko ita ári amopu’ãta che Iglésia, ha mano jepe ndaipu’aka mo’ãi hese.

Ame’ẽta ndéve ñesãmbyhy yvágagui oúva rokẽ pe’aha. Ha opa mba’e nderehejáiva ojehu ko yvy ári, ndojehu mo’ãi avei yvágape. Ha opa mba’e nde rehejáva ojehu ko yvy ári, ojehúta avei yvágape.

Ñandejára Jesucristo Ñe’ẽ.