LECTURAS VIERNES CENIZA RIRE

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha     58, 1-9a

Tupã Ñandejára he’i chéve: “Eñe’ẽ hatã kyhyje’ỹre, trompéta púicha esapukái: Ha ekaguai che retã guáre, hembiapo vaikuére

ha Jacob ñemoñarére, iñangaipáre. Ára ko’ẽ rehe che reka ha ovy’a joa hikuái.

Oikuaágui che rape, ha’e ramo guáicha tetã hembiapo porãva ha nomboykéiva che rembiapoukapy. Ojerure chéve tembiapoukapy heko jojáva ha ovy’a ite gua’u oñembojávo che rehe, ha he’i hikuái: ‘Ma’erã piko jahasáta karu’ỹre ndohecháirõ Tupã Ñandejára?

Ma’erã piko jahasa asýta, ha’e ndohecha kuaái ramo?’ Pekaru’ỹha árape, peheka pene mba’erãvante ha pejopy pene mba’apohára ndive.

Pekaru’ỹha árape peñoñe’ẽ api, petaky ojuehe, ha peñonupã mbarete.

Péichagua karu’ỹ ani pejapo peipota ramo yvágape oñehendu pene ñe’ẽ. Péichagua nga’u piko pe che aipotáva, yvypóra oñemomirĩ ramo?

Che piko aipota pembojayvy pene akã takuáraicha, peñemonde ao vosakuépe ha peñeno tanimbu ári?

Upévape piko pembohéra ‘karu’ỹha ára Tupã Ñandejárape ombovy’áva’?

Pejavy. Karu’ỹ che aipotáva hína kóva: pepoi umi yvyra kuápe oĩvagui hekope’ỹ,

pemondoho tukumbo oporoapytĩva, pepoi oñeñapytĩvagui ha pemondoho sã opaichagua.

Pemboja’o pene rembi’u iñembyahýivape hoga’ỹvape pende rógape pemoguahẽ ijopívova pemonde ha ani peñemboyke pene pehẽnguégui.

Upérõ che pohesapéta ko’ẽjúicha ha pya’e eterei pekueráta pende aígui, pende reko joja ohóta pene renonderã ha Tupä Ñandejára reko mimbipa pende rapykuéri.

Upérõ pesapukáita ha Tupã Ñandejára pene rendúta,

Tupã Ñandejára Ñe’ẽ.

SALMO ÑEMBOHOVÁI 50, 3-6a. 18-19

Opavave: Tupã, che poriahuvereko, nde niko ne mba’e porã.

Tupã Ñandejára, che poriahuvereko, nde niko ne mba’e porã.

Che poriahuvereko ha eipe’a che árigui che rembiapo vaikue.

Che johéi porã teko vaígui, che mopotĩ che angaipágui. O.

Ahecha kuaa niko ajavyha, ha mba’e vaígui ndaikatúi apoi.

Nde rehe añónte ajapo ivaíva, Nderehecha ramói mba’e kuave’ẽ. O.

Ndéve aikuave’ẽ ramo, naiporãi ndéve. Taikuave’ẽna ndéve

py’a rasy oñemomichĩva, upéva katu rehecha ramo Tupã Ñandejára. O.

VERSÍCULO ANTES DEL EVANGELIO   Cf. Am 5, 14

Peheka umi iporãva ha ani umi ivaíva, pereko haguã tekove, péicha Tupã Ñandejára oïta pene ndive.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 9, 14-15

Upe ramo Juan Bautista remimbo’ekuéra oñemboja Jesús rendápe, ha oporandu ichupe: Fariséokuéra ha ore ave, niko rohasa jepi ára ro’u’ỹre mba’eve. Mba’ére piko neremimbo’e kuéra ndaupéichai?

Jesús he’i ichupekuéra: Peẽ piko peimo’ã peteĩ omenda ramóva irũ nguéra oñembyasytaha ha’e oĩ aja hendivekuéra imendahápe? Nahániri. Ágãnte oguahẽne ára ipore’ỹvo ha’e, ha upépe katu ohasáne ho’u’ỹre mba’eve.

Ñandejára Jesucristo Ñe’ẽ.