LECTURAS VIERNES VIGÉSIMO

LECTURAS VIERNES VIGÉSIMO

LECTURA PETEÎHA:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha    37, 1-14

Tupã Ñandejára omboja che rehe ipo ha che moenyhẽ ipokatúgui, ha che moĩ peteĩ ñu hetahápe kãnguekue. Tupã Ñandejára che mboguata opáichavo; umi kãnguekue omoenyhẽ mba ite upe ñu, ha kãngue reipa itéma.

Upépe he’i chéve: Ndépa reroviáne ko’ã kãnguekue oikove jeýne haguã? Che ha’e ichupe: “Tupã che Jára, nde año mante reikuaa upéva”.

Aipórõ Tupã Ñandejára he’i chéve: “Eñe’ẽ che rérape ko’ã kãnguekuépe. Ere ichupe kuéra: ‘kãngue rei, pehendu ko’ã ñe’ẽ oúva Tupã Ñandejáragui’. Tupã Ñandejára he’i peẽme: ‘Amoingéta pende pype tekove pytu peikove jevy haguã. Amoĩta peẽme tajygue, pomboho’óta, pombopiréta ha ame’ẽta peẽme tekove pyahu peikove jevy haguã.

Upépe peẽ pehecha kuaáta cheha Tupã Ñandejára.’” Che añe’ẽ ichupekuéra ha’e he’i haguéicha chéve. Ha añe’ẽ aja ichupe kuéra aína, ahendu hyapúva: peteĩ yvy ryrýi nipo ra’e, ha umi kãnguekue oñepyrũ oñemboaty ojuehe. Ha ahecha umi kãnguekue ári osẽ tajygue ha to’o, ha ojejaho’i pirépe. Ha ndoguerekói jepe tekove pytu.

Upépe Tupã Ñandejára he’i chéve: “Eñe’ẽ che rérape pe tekove pytúpe, ha ere ichupe: Tekove pytu, eju opaguio ha emoingove ko’ã te’õngue.” Che añe’ẽ Tupã Ñandejára rérape ha’e he’i haguéicha chéve, ha pe tekove pytu ou oike ipypekuéra, ha ha’e kuéra oikove ha opu’ã oñembo’y. Hetaiterei niko ha oiko ichuguikuéra peteĩ aty ndaipapaháiva.

Upépe Tupã Ñandejára he’i chéve: “Israelgua maymáva niko, ko’ã kãngue kuéicha. Oiko he’i hikuái: ‘Ore kãnguekue kãngue reíntema; ndaikatu véima ñaha’arõvo mba’eve, japáma.’

Néi, eñe’ẽve ichupekuéra che rérape: Kóicha he’i Tupã Ñandejára: ‘Che retãgua maymáva, poguenohẽta pe yvykua peñeñotỹ haguégui ha pomondo jevýta  tetã Israélpe. Ha ágã poguenohẽ jevýma ramo pe yvykua peñeñotÿ haguégui, pehecha kuaáta, peẽ che retãgua, cheha Tupã Ñandejára.

Che amoĩta pende pype tekove pytu che heguíva, ha peẽ peikove jevýta, ha pomoĩ jevýta pende yvy teépe. Upépe peikuaáta che, Tupã Ñandejára, ha’e ha ajapo hague.’”Che, Tupã Ñandejára, ha’e upéichaha.

Tupã Ñandejára Ñe’ẽ.

SALMO ÑEMBOHOVÁI 106, 2-9

Opavave: Perohory Tupã Ñandejárape.

Te’i umi Tupã Ñandejára oguenohẽ va’ekue  jejopy vaígui, umi ha’e oipe’a va’ekue  hese ija’e’ỹva po guýgui,

umi ha’e omboaty va’ekue  opa tetãgui, yvate gotyo ha súrgui, kuarahy resẽ ha kuarahy reikégui. O.

Yvy ojeikoỹha rupi oiko va’ekue  opa rupi rei, ojuhu’ỹre tape ogueraháva ojeiko haguãme.

Ijyuhéi ha iñembyahýi, omanótama katuete. O.

Ojecha vai ramo oñembo’e Tupã Ñandejárape, ha oipe’a jeiko asýgui ichupekuéra.

Oguenohẽ tape porãme ha oguahẽ oiko haguãme. O.

Perohory Tupã Ñandejárape, oporoporiahuverekógui ha ojapógui

mba’e rechapyrã yvypóra rehehápe. Ijyuhéivape omboy’u, iñembyahýivape omohyvatã. O.

ALELUIA Cf. Sal 24, 4b.5a.

Aleluia.

Tupã Ñandejára ehechaukami chéve umi nde rape, che mboguata upe tape teko jeroviapývare.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha     22, 34-40

Upe ramo umi fariséo ohendúvo Jesús omokirirĩ hague umi Saduséope, oñemboaty hikuái ha oho Jesús rendápe. Peteĩva, Moisés rembiapoukapy mbo’eha, omoñuhã haguãicha oporandu ichupe:

“Mbo’ehára, mávapa umi Tupã Ñandejára rembiapoukapy apytépe mba’e guasuvéva”?

Jesús he’i ichupe: ‘Ehayhu Tupã nde Járape ne nde py’a ite guive, ne ánga rugua guive ha ne arandukue reheve.’

Kóva hína pe mba’e guasuvéva ha pe tenondeteguáva. Upéva rire oúva ojogua ichupe, ha he’i kóicha:

‘Ehayhu nde rapichápe rejehayhu háicha nde.’

Ko’ã mokõi tembiapoukapy ári oguapy hína Moisés rembiapoukapy ha opa mba’e maranduhára kuéra ombo’e va’ekue .

Ñandejára Jesucristo Ñe’ẽ