LECTURAS VIGILIA PASCUAL EN LA NOCHE SANTA

LECTURAS VIGILIA PASCUAL EN LA NOCHE SANTA

MAITEI OÚVAPE – Saludo

“Esperanza nahavẽi”, he’i ningo ñe’ẽ. Heta jehasa asy pa’ũ rupi jahasa ramo jepe, ñaha’ãro Ñandejára ñanemopu’ã jevy. Upéicha avei Jesucristo, heta ohasa asy rire Ñandejára omopu’ã jevy ichupe omanóva apytégui. Ha’e opuntea hína ñande rape.

Upéva ñanemokyre’ỹ ñamboguata haguã umi mba’e hérape jajapóva. Jaikuaa pype Ñandejára amo ipahápe omohu’ã porãtaha ñandéve opaite mba’e.

ÑAHENDU ÑANDEJÁRAPE – Motivación a lecturas

Ñandejára ñe’ẽ omombe’u mba’éichapa raka’e Tupã omoñepyrũ ñande rekove ha ojapo opa mba’e ñandéve guarã. Yvypóra katu iñepyrũmby guive ndojapói pe Ñandejára he’íva.

Upéva rapykuéri oike heta mba’e vai yvy ári. Ñandejára katu ndopoíri ñande hegui. Ha’e ñanemoirũ ymaite guivéma ha oñeha’ã ñande rehe, ñande pe’a haguã Aña poguygui. Ipahápe ombou ñande apytépe ita’ýra Jesucristo pe, oúva ome’ẽ hekove, ohechauka haguã mba’eichaite pevépa Ñandejára ñande rayhu.

Nota: Para la Vigilia Pascual se proponen nueve lecturas, siete del antiguo testamento y dos del nuevo. Puede disminuirse el número de lecturas. Se debe hacer por lo menos tres lecturas del Antiguo Testamento, y en los casos más urgentes dos, antes de la Carta de San Pablo y el Evangelio. Nunca se debe omitir la 3ª lectura del Éxodo 14, sobre el paso del Mar Rojo.

LECTURA PETEÎHA:
Ko’ágã ñahendúta Tupã Ñandejára ñe’ẽ Génesis arandukápe oĩ háicha 1, 26-31a

Ñandejára he’i: “Jajapo ko’ágã yvypóra ñandéicha, ta ñande jogua ha to guereko ipoguýpe pira ypegua, guyra ára rehe ovevéva ha opaichagua tymba: mymbáva, hyére otyryrýva ha hesaitéva, michĩva ha tuicháva opaichagua”. Ha oiko ha’e he’i haguéicha.

Ha Ñandejára ojapo yvypóra, ha’éicha, ojoguáva ichupe ojapo, kuimba’e ha kuñáva ojapo.

Ha Ñandejára ohovasa ichupekuéra ha he’i: “Ta pende ra’y heta kena, ta isarambi yvy tuichakue ha to guereko ipoguýpe pira, guyra, tymbakuéra ha opaichagua yvy rehe otyryrýva”.

Upéi he’i ichupekuéra: “Yvy ári amoĩ opaichagua mba’e ra’ỹi ha yva pe’u haguã. Opa tymba, guyra ha hyére otyryrývape ame’ẽ hembi’urã ka’avo rovyũ”. Ha oiko ha’e he’i haguéicha. Ñandejára oma’ẽ opa mba’e ojapo va’ekue rehe ha ojuhu iporã
etereiha.

Tupã Ñandejára Ñe’ẽ.

SALMO ÑEMBOHOVÁI 103 , 1-2a. 5-6. 10. 12-14ab. 24. 35
Opavave: Ñandejára, embou nde Espíritu ha embopyahu opa mba’e yvy ári.

Amomba’e guasu Ñandejárape che py’aite guive.
Nde tuichaite niko Tupã che Jára,
remimbi ha rejajaipa, ha mba’e rendýpe reñeñuvã. O.

Yvy rembohopyta mbarete ani haguã oku’e araka’eve
Yguasu yvy oñuvã va’ekue ahojáicha yvyty ojaho’ipa va’ekue. O.

Yvúgui y rembopupu, oiko haguã ichugui ysyry isarakíva.
Ysyry rembe’y rehe guyrakuéra ojaitypo
ñahendu opurahéi oirãite ramo. O.

Yvatégui yvyty remohe’õ ne rembiapokuégui pe yvy hyvatã
Mymbakuéra reñongatu, kógakuéra remoheñói yvypóra rembi’urã. O.

Ñandejára hetaite mba’e niko rejapo.
Nde katupyrýgui umíva heñói.
Amomorã Ñandejárape che py’aite guive.
Ñandejárape amomba’eguasu. O.

LECTURA MOKOÎHA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha 22, 1-2. 9a. 10-13. 15-18

Ñandejára oikuaa porãseve mba’éicha guápa Abraham ha ohenói ichupe: Abraham, Abraham!

Ha’e he’i: Ápe aime!

Ñandejára he’i ichupe: eraha nde ra’y peteĩmi rehayhuetéva Isaac peteĩ hendápe hérava Mória. Upépe, peteĩ yvyty ru’ãme che ahechaukátava ndéve, eikuave’ẽ chéve nde ra’y rejukávo ichupe ha rehapývo chéve guarã altar ári.

Oguahẽvo he’i haguépe ichupe Ñandejára, Abraham omopu’ã peteĩ altar ha omoĩ jepe’a hi’ári. Upéi oipyso ipo ojuka haguã ichupe ikysépe.

Ñandejára remimbou katu ohenói ichupe yvága guive ha he’i: Abraham, Abraham!

Ha’e he’i: Ápe aime!

Ñandejára remimbou he’i ichupe: Ani reikutu nde ra’ýpe térã rejapo hese mba’eve. Aikuaáma rehayhuha Tupãme ha rejeroviaha hese. Nde ra’y peteĩmi rehe jepe na ne rakate’ỹi.

Abraham ohecha ovecha mácho hatĩgui opa’ãva javorái rehe. Oho ipiári ha ogueru oikuave’ẽ Ñandejárape mymbahapy ramo ita’ýra rekovia.

Ñandejára remimbou ohenói jevy Abrahampe yvágagui, ha he’i ichupe: Che jehe voi añe’ẽ me’ẽ, he’i Ñandejára: Rejapo hague rehe ha’e va’ekue ndéve, ha na ne rakate’ỹigui reme’ẽ haguã chéve nde ra’y, amboheta etereíta ndéve ne ñemoñare, mbyjakuéra yvága pegua ha yvyku’i ra’ỹi yguasu rembe’ýpe guáicha. Ne ñemoñarekuéra ipu’akáta umi hesekuéra ija’e’ỹvare. Ha opa tetã ko yvy arigua ojehovasáta ne ñemoñare rupi, rejapo hague rehe ha’éva ndéve.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 15, 5. 8-11

Opavave: Tupã che jára che mo’áke che nde pópe añemoĩ.

Ñandejára, nde pópe oĩ che rekove.
Nde hína opa mba’e chéve guarã.
Opa árape nde rehe che mandu’a reíme ramo che ypýpe nda’a mo’ãi. O.

Upéva rehe, che py’a rory, ha py’a guapýpe aikóne.
Nda che rejái chéne amano.
Ndereheja mo’ãi ne irũme yvykuápe ojeity. O.

Ñandejára che aguata hína ne renda gotyo.
Vy’águi che moenyhẽne ne rendápe aime ramo
Nde rehechaukáne chéve jeikove rape.
Nde ypýpe vy’a ndopáiva araka’eve. O.

LECTURA MBOHAPYHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 14, 15 – 15, 1a

Ñandejára he’i Moiséspe: Maerãpa resapukái rei chéve? Ere Israel guápe toho hápe rehe. Nde katu ehupi yvyra jekoha, eipyso nde po Mar Rojo ári ha emboja’o hi’ykuéra ojuehegui ikatu haguã Israelgua ohasa yvy rupi. Che ahejáta Egiptogua oñembopy’a hatã ha ojepoi
Israelgua rapykuéri, ajechaukáta che mimbipa pe Faraón, ikárro ha ñorairõhára kárro arigua, kavaju arigua ha yvy rupigua renondépe.

Oikuaáta umi Egiptogua cheha opa mba’e Jára, ajechauka ramo che mimbipápe che yvytúvo Faraón, ikárrokuéra ha umi ñorairõha kárro arigua, kavaju arigua ha yvy rupi guare Ñandejára remimbou ha upe arai ohóva Israelgua renondépe ohasa hapykue gotyo, ha oñemoĩ Egiptogua ha Israelgua pa’ũme.

Upe arai ñembo’y omopytũ Egiptogua gotyo ha ohesape Israelgua gotyo. Umi Egiptogua, ndohecháigui mba’eve, ndaikatúi ohupity Israel guápe upe pyharépe.

Moisés oipyso ipo Mar Rojo ári ha Ñandejára ombopejuka pyhare pukukue kuarahy resẽ guio yvytu ratã omboja’óva ykuéra ojuehegui. Israelgua ohasa pe Mar Rojo yvy rupi, ha umi y aty oñembo’y ijyke rehekuéra mokõive henda guio.

Umi Egiptogua omuña ichupekuéra ha ojepoi hapykuéri umi y mbytépe opaite Faraón kavaju ha ikárrokuéra reheve. Oguahẽvo ko’ẽju, Ñandejára oma’ẽ arai ha tata ñembo’y guive Egiptogua gotyo ha ojapo tuicha sarambi ijapytépekuéra.

Ohekyipa ikárrokuéra rruéda ha ndaikatuvéi oku’e. Upéma ramo Egiptogua osapukái: Jaguevíke Israel guágui. Cháke opa mba’e Jára oñorairõ hesehápekuéra ha oñemoĩñande rehe!

Ñandejára he’i Moiséspe: Eipyso nde po umi y ári, ha to’a Egiptogua, ikárro ha ikavaju arigua ári.

Moisés oipyso ipo yguasu ári ha umi y ho’a jevy hendaguépe. Egiptogua katu ojerévo oguevi haguã ojetopa y renondépe. Upéicha Ñandejára ojaho’ipa ýpe ichupekuéra.

Umi y oguevívo hendaguépe ojaho’i Faraón ñorairõhára pe oike va’ekue Israelgua rapykuéri ikárrokuéra reheve. Nahembýi peteïnte jepe. Israelgua katu ohasa yvy rupi yguasu mbyte rupi, ha hi’y kuéra oñembo’y ijyke rehekuéra mokõive hendaguio.

Upe árape Ñandejára oipe’a Israel guápe Egiptogua poguýgui; ha Israelgua ohecha umi Egiptogua re’õngue y rembe’ýpe. Ohechávo Israelgua Ñandejára pyapy oinupã mbarete etereíva Egipto guápe, omomba’e ichupe ha oguerovia Ñandejára ha hembiguái Moiséspe.
Upéma ramo Moisés ha Israelgua opurahéi joa Ñandejárape he’ívo:

SALMO ÑEMBOHOVÁI Ex 15, 1b-6. 17-18
Opavave: Ta ropurahéi Ñandejárape, ojajaipáva imbaretetégui.

Ta ropurahéi Ñandejárape, ojajaipáva imbaretetégui.
Oity upe y guasúpe kavaju ha hi’ári guápe.
Tupã, nde che mombarete ha che mbovy’a, nde, ivaívagui che pe’a!
Nde che Tupä, rogueropurahéi, che ru kuéra Tupã, romomorã! O.

Che Jára, nde hína ñorairõhára ,
Che Jára, nde réra tee!
Faraón kárrokuéra ha iñorairõhára yguasu ruguápe remombopaite.
Ñorairõha kuéra poravo pyrépe, Mar Rojo omokõmbaite. O.

Yeta apytépe ho’yguy joa, ha ita pohýicha upe y ruguaitépe ojejakutu.
Ñandejára, nde po akatúa imbaretetéva, omimbipa ite!
Ñandejára, nde akatúape remoangu’ipa nde rehe opu’ãvape! O.

Nde remboguata ichupe ha remohenda yvyty marangatúpe, reiporavo va’ekue
reiko haguã, Nde Rekoha, Ñandejára, nde po teépe remopu’ã va’ekue !
Ñandejára oguapy mburuvicha pavẽ ramo tapia guarã! O.

LECTURA IRUNDYHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 54, 5-14

Omendáta nde rehe nde Apohare, hérava opa mba’e Jára ipu’akapáva, ivaívagui nde pe’áva, Tupã Israelgua marangatúva, ko yvy tuichakue Jára.

Ndeva’ekue peteĩ tembireko pyahúicha, rejeheja rei ha revy’a’ỹva. Ñandejára katu ne renói jevy ha he’i ndéve: “Sapy’a mínte roheja kuri ha che py’a ite guive roguereko jevýta che mba’e ramo. Che pochy rendýpe nde hegui akañy va’ekue sapy’a ite, ha upéicha ramo jepe, yma ite guive rohayhu che py’a ite guive”. Péicha he’i nde Jára ivaívagui nde pe’áva.

“Añe’ẽ me’ẽ haguéicha Noépe, y ojaho’ipa ramo guare yvy, nambojaho’i mo’ã veimaha ýpe yvy, upéicha añe’ẽ me’ẽ ko’ágã ne ndive nda che pochy mo’ãvéima ha ndajahéi mo’ãveimaha nde rehe. Hendágui ojei ramo jepe, ha ovava yvytykuéra, ndojei chéne nde hegui che mborayhu, ha che ñe’ẽ me’ẽ py’a guapy rehegua ndovavái chéne”. He’i nde Jára nde rayhúva: “Rejejopy vaíva, rejepy’apýva, revy’a’ỹva!

Che voi amboguapýta nde itakuéra ita jegua hũ ári. Ne pyenda ramo amoĩta ita jegua hovy. Nde róga yvate kuéra ajapóta ita jegua pytãgui, ne rokẽnguéra, ita jegua rovyũgui, ha nde tápia kuéra ita jeguágui.

Che aheko mbo’éta ne membykuérape. Opavave oiko porãitereíta. Tekojoja ne mombaretéta, rejeíta jejopy ha kyhyjégui, ñemondýi guasu na nde py’apy mo’ãvéi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 29, 2. 4-6. 11-12a. 13b
Opavave: Ñandejára, romomba’e guasu che pe’águi jejopy vaígui.

Ñandejára, romomba’e guasu che pe’águi jejopy vaígui,
nde rehejáigui umi che rayhu’ỹva oñembohory che rehe.
Ñandejára, amanomahágui che moingove jevy,
che renohẽ omanóva ohohágui. O.

Peropurahéi héra marangatu Ñandejára rehe pejeroviáva,
Tupã niko ndaipochy aréi, imba’e porãkatu opa árape guarã.
Pyharekue ñane rasẽ ramo, vy’a ñaroko’ẽ. O.

Che pytyvõke, che poriahuvereko ha cherendúke Ñandejára
Eju che pytyvõ che ru.
Pe vy’a’ỹ nde remombia ha chemonde ao jeguápe,
Tupã che Jára, ndéve apurahéita tapiaite. O.

LECTURA 5:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 55, 1-11

Ñandejára he’i: “Opa pende yuhéiva peju pey’u. Pende viru’ỹva peju, reínte toñeme’ẽ pe ẽ me trígo. To ñeme’ẽ avei kamby ha kaguy, pehepy me’ẽ’ỹrehe. Maerã piko peme’ ẽ ta viru nda ha’éi ramo tembi’u rehe, ha pene rembiapokue repy, na pene mohyvatã mo’ãiva rehe?

Pejapo ha’éva ha pekaru porãta, pe’úta umi mba’e hevéva. Peju che rendápe ha pejapysaka, pe che rendu ha peikovéta. Ajapóta pene ndive ñe’ẽ me’ẽ opa árape guarãva, amboajévo péicha umi mborayhu ñe’ẽ ame’ẽva’ekue Davídpe.

Che amoĩ ichupe mba’e rechaha ha mba’e renduharamo tetãnguéra peguarã. Huvicha ha heko mbo’eha ramo. Nde remboatýta tetãgua reikuaa’ỹvape ha pya’e oúta ne rendápe, che, Tupã nde Jára, Israelgua marangatúva, rombojerovia hague rehe.

Peheka Ñandejárape ikatu aja pejuhu ichupe, pehenói ichupe hi’ag̃ui jave. Iñañáva toheja hápe vai, mba’e vai apoha anive oguereko iñakãme ivaíva.

Pejere Ñandejára gotyo, ha’e pende poriahuverekóta, pejere Tupã gotyo, ha’e niko ipojera oheja rei haguã ñandéve ñane angaipa.
Che remiandu nda ha’éi pene remiandúicha ha pende rape nda ha’éi che rapéicha, he’i Ñandejára. Yvága oĩháicha yvate yvýgui, péicha che rape ijyvateve pende rapégui ha che remiandu pene remiandúgui.

Ama ha y rypy’a oguejy háicha yvágagui ha ndojevýi, omohe’õ mboyve yvy, heñói haguã mba’e ra’ỹi oñemitỹvape ha oĩ haguã tembi’u okarúvape guarã. Péichata pe ñe’ẽ osẽva che jurúgui, ndojevy mo’ãi che rendápe, ojapo’ỹ rehe che rembipota, ha oikopa pe che ha’e va’ekue.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI Is 12, 2-6
Opavave: Ykua satĩ tesãirãgui y penohẽta ha pey’úta.

Ha’e hína Ñandejára, jejopy vaígui che pe’áva,
hese ajerovia ha ndakyhyjéi.
Che Jára che mo’ã ha che mombarete,
opa mba’e vaígui che pe’a. O.

Ykua satĩ tesãirãgui y penohẽta ha pey’úta.
Pemomba’eguasu Ñandejárape.
Peikuaauka tetã nguérape imba’e mombe’upyrã,
perosapukái héra jojaha’ỹ. O.

Ñandejárape pepurahéi, opa rupi pemoherakuã.
Ojapo hague rehe mba’e ndaijojaháiva.
Vy’águi pesapukái, tuichatégui Israelgua imarangatúva pende apytépe. O.

LECTURA 6:
Ko’ágã ñahendúta Tupã Ñandejára ñe’ẽ Baruc arandukápe oĩ háicha 3, 9-15. 32 – 4, 4

Israel, ehendu ñe’ẽ ñane moingovéva, ejapysaka ha eikuaa arandu. Mba’e rehe piko Israel reime nde rayhu’ỹva retãme? Mba’e rehe piko nde tuja tetã ambuépe?

Mba’e rehe piko reñemongy’a umi omanóva ndive, ha reime umi ohótava ndive omanóva ohohápe?

Péicha ojehu ndéve reheja hague rehe arandu yvu. Reiko rire Ñandejára rape rehe, py’a guapýpe reiko va’erã mo’ã opa ára.

Eikuaána mamópa oime arandu, mamópa jajuhu pokatu, ha mamópa mba’e kuaa.

Péicha ramo reikuaáne mba’éichapa reikove pukúta, mamópa rejuhúta nde rape rehesape haguã, ha mamópa rejuhúta py’a guapy. Máva voi piko oikuaa henda? Máva piko Oguahẽ oñeñongatuhápe?

Ñandejára opa oikuaáva, ha’e ñoite oikuaa henda. Ha’e omoĩ hendaguãme ko yvy ha omoenyhẽopaichagua tymbágui. Ára ha’e ohenói, ha iñapysẽ ko’ẽ, ha’e oipota vove, ryrýi pópe ojapo hembipota.

Mbyjakuéra vy’águi omimbi joa ha’e omohenda haguépe. Ohenóirõ ichupekuéra, he’i hikuái: “Ápe roime” ha vy’águi ohesape Ijapoharépe guarã. Upéva hína Ñandejára ha ndaipóri ha’eichagua.

Ha’e oikuaapa ite arandu rape, ha ome’ẽ hembiguái Israélpe, tetã Ñandejára ohayhúva.

Upéicha arandu ou ypy va’ekue yvy ári, ha oiko yvypórakuéra apytépe. Arandu oĩ Ñandejára rembiapoukapýpe, ha upéva oĩ opa árape guarã. Mayma hese ojekóva, oikovéne ha umi omboykéva, omanóne.

Israel, eheka arandu ha eñemomba’e hese, ha’e ta nde resape reguahẽ meve hendápe.

Ani reheja avavépe umi mba’e ne mbotuicháva, ha umi tetã ambuépe upe ndénte rehupytýva. Javy’a, ñande Israelgua, jaikuaágui Ñandejára rembipota!

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 19, 8-11
Opavave: Ñandejára rembiapoukapy hesakã ha ñande resape’a.

Ñandejára rembiapoukapy ndaijojahai,
ñane mbopy’a rory.
Ñandejára rembiapoukapy ijeroviaha,
omoarandu oikuaa’ỹvape. O.

Ñandejára rembiapoukapy oĩ hekoitépe, ñane mbovy’a.
Ñandejára rembiapoukapy hesakã, ñande resape’a. O.

Ñandejára ñe’ẽningo hesakã ha ndahekoviái.
Ñandejára rembiapoukapy ijeroviaha,
opavave oĩ hekoitépe. O.

Ojepotaite ningo órogui óro ojajaipávagui,
he’ẽve eirete ñúgui ha osyrýva káva raitýgui. O.

LECTURA 7:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha 36, 17a. 18-28

Ñandejára ojere che renda gotyo ha he’i chéve: “Israelguakuéra oiko ramo guare ijyvýpe, omongy’a va’ekue hikuái upe ijyvy hembiapo vaípe. Pe oikove háicha, chéve guarã va’ekue peteï mba’e nde ky’áva ha che mbojeguarúva.

Upéma ramo aity hese kuéra che pochy, umi jejuka ita ojapo va’ekue rehe, tetã tuichakue ha omongy’a hague rehe upe hetã, Ñandejára gua’u ta’ãnga rei ñemomorãpe, ha umi hembiapo vaikue rehe, amosarambipa va’ekue ichupekuéra ambue tetã rupi. Ha opa tetã oguahẽha rupi, omongy’ámi hikuái che réra marangatu, ha opa umi rupigua he’ími: ‘Ko’ãva Ñandejára retãgua hína, ha osẽ mantéva ’ekue hetãgui!’ Ha upépe hasy chéve ahecha mba’éichapa, Israel rupi che réra marangatu oñemongy’ámi mamo tetã oguahẽháme ha’ekuéra.

Upéva rehe ere Israelguakuérape: “Kóicha he’i Ñandejára: ‘Ko ajapo táva ndaha’éi pende reko ky’a rupi, Israelguakuéra, che réra marangatu rehénte, peẽ peikova’ekue pemongy’a umi tetã peho hague rupi. Che ahechaukáta tetãnguéra apytépe che réra guasu ete imarangatuha, peẽ peikova’ekue pemongy’a ipa’ũmekuéra. Ágã péicha ajapóvo, maymáva ohecha kuaáta cheha Ñandejára.” Che, Tupã, ha’e upeichaha.

“Che poguenohẽta opa umi tetã peimehágui. Pomboatýta ha pombojevýta pende yvýpe. Pojohéita y iky’a’ỹvape, pomopotĩta opaichagua mba’e ky’águi, poiky’a’óta umi peja haguégui Ñandejára gua’u ra’ãnga rei rehe; Amoĩta pende pype peteĩ py’a ipyahúva ha peteĩ ánga ipyahúva. Aipe’áta pende hegui pe py’a hatãva itáicha ha amoĩta peẽme peteĩ heko ñarõ’ỹva. Amoĩta pende pype che ánga ha ahejáta pejapo opa che rembiapoukapy; peikóta tetã ame’ẽva’ekuépe pende rúpe, ha peĩta che retãgua ha che pende Járata.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 41, 3. 5bcd; 42, 3-4
Opavave: Che ánga ijy’uhéi nde hegui, Ñandejára reikovéva.

Che ánga ndehegui henyhẽse Ñandejára reikovéva.
Araka’épa ijáne chéve ne rendápe
aguahẽ ha romomba’eguasu. O.

Aha rupi aina tapicha ita apytépe
Ore reraha Ñandejára gotyo
Che mandu’aharamo maymáva renondépe,
Ha roguahẽ Tupaópe purahéi ha vy’apópe. O.

Ehesape ha emoesakã chéve che raperã
Ikatu haguã aguahẽ nde yvyty marangatúpe,
upe nde reikohápe. O.

Aguahẽne Ñandejára oñemomba’e guasu hápe,
ko Ñandejára ombovy’áva ñande rekove
Arpa púpe aropurahéine Tupã, che Járape. O.

EPÍSTOLA
Ñahendúta Tupã Ñandejára Ñe’ẽ San Pablo ohai va’ekue Roma guápe 6, 3-11

Che pehenguekuéra: Ndapeikuaái piko peẽ, jajoajúvo Jesucrísto rehe ñemongarai rupi, jajoajuha imano rehe? Ñemongaraípe niko Jesucrísto ndive ñañeñotỹ, ha ñamano ñañe moingove jevy haguã, ha jarohasa peteĩ jeikove ipyahúva, Jesucrístope omoingove jevy haguéicha Tupã ñande Ru pu’aka mimbipa.

Jajoaju rire ramo Jesucrísto ndive, manóme, pe imanóicha guápe, jajoaju avei hendive ijeikove jevýpe. Jaikuaa pe ñande reko yma, ojehupi hague kurusu rehe Jesucrísto ndive, pe ñande reko vaikue oñehundi haguã ha ndajaikovéima haguã angaipa apo poguýpe.

Peteĩ omano ramo niko ojei pe angaipa apógui. Ñande ñamano ramo Jesucrísto ndive, jajerovia hendive avei jaikovetaha. Jaikuaa, oikove jevývo Jesucrísto nomano mo’ã veimaha. Pe mano ndaipu’aka mo’ãvéima hese. Jesucrísto, omanóvo, omano angaipápe guarã, ha oikovévo, oikove Ñandejárape guarã.

Upéicha avei peẽ, pejerereko omanóva ramo angaipápe guarã, ha oikovéva ramo Ñandejárape guarã, Jesucrísto ndive pejoaju rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 118, 1-2. 16-17. 22-23
Opavave: Aleluia, Aleluia, Aleluia, Aleluia.

Pemomba’e guasu Ñandejárape,
ha’e niko ipy’a porã ha imborayhu ndopái araka’eve.
Mayma Israelgua te’i:
“Ñandejára mborayhu ndopái araka’eve”. O.

Ñandejára ipyapýgui tuicha mba’e ojapo,
Ñandejára ipyapy mbarete,
che namanói chéne.
Aikovéta amoherakuã haguã upe Ñandejára ojapóva. O.

Upe ita omboykéva óga mopu’ãhára,
upéva ári ko’ágã oñemopu’ã.
Ñandejára upéicha ojapo ha ore jurujái ore rohechávo. O.

EVANGELIO

Ñahendúta Ñandejára Jesucrísto rekove ha hemimbo’e San Lucas omombe’u háicha 24, 1-12

Pe semána ñepyrũha ára ko’ẽme umi kuña oho va’ekue Jerusalénpe Jesús ndive, oho upe itakuápe. Ogueraha hikuái umi mba’e ryakuã porã ombosako’i va’ekue.

Oguãhẽvo katu, ojuhu pe ita ombotýva pe itakua juru noĩ veimaha hendápe. Ha oikévo hikuái, ndojuhúi Ñandejára Jesús retekue. Oñemondýi hikuái ha ndoikuaái mba’épa ojapóta. Ha peichahágui, hesaho sapy’a hikuái mokõi kuimba’ére oñembo’ýva hína pe ijypýpe.

Umi ijao morotĩ sakã ha omimbipa. Ha okyhyjégui opyta itĩndy hikuái. Umi kuimba’e katu he’i chupekuéra: — Mba’éreiko peheka oikovévape omanóva apytépe. Ndaipóri véima ápe.

Oikove jeýma. Na pene mandu’ái piko he’i hague peẽme oĩ ramo gueteri Galiléape: “Tekotevẽ niko chéve che me’ẽ hikuái heko vaíva pópe, upéi añemosãingo kurusúre, ha mbohapy ára haguépe aikove jey.”

Upépe imandu’a hikuái upe Jesús he’i vaekuére. Ha ojevývo upe itakuágui, oho hikuái omombe’u ko’ã mba’e umi 11 apóstol kuérape ha opavavépe.

Umi kuña apytépe oĩ va’ekue upérõ María Magdaléna, Juana, ha María Santiago sy. Umi apóstolkuéra katu oimo’ã vyresaha umi mba’e umi kuña he’íva. Ha ndogueroviái hikuái.

Opáichavo, Pedro osẽ odipara oho pe itakuápe. Ha oma’ẽvo hyepýpe, savanántema ohecha. Ha pya’e ojevy hógape ha opondera pe ohecha va’ekuére.

Ñandejára Jesucrísto Ñe’ẽ.

Opavave: Romomba’e guasu ndéve Jesucrísto.

OFRENDA ÑEMBO’E
Tupã ore Jára, ehendu míkena nde ra’ykuéra ñembo’e ko’ã mba’e roguerúva ndéve ndive, ha pe sakraménto rupive remoguahẽva hína ko Páskua pe ta ore pohano, rohupity haguã tekove opave’yva.

Ñandejára Hesukrísto rupive.

PREFACIO DE PASCUA I

EL MISTERIO PASCUAL PÁSKUA RECHAPYRÃ

P. Ñandejára toĩ penendive.
O. Ha nendive avei.
P. Topu’ãkena ñane ánga.
O. Romopu’ãma voi Ñandejára gotyo.
P. Jaaguyjeveme’ẽ Tupã Ñandejárape.
O. Iporã ha tekotevẽ.

Añeteku iporã ha tekotevẽ, ha’e ore rembiaporã ha ore pysyrõ romomba’e guasu opa áraite, ndeve Ñandejára, (ko pyharépe) (ko árape) (ko’ã árape) katu Hesukristo, ore Paskua, oñekuave’ẽ haguére.

Ha’e ningo añetehápe Ovecha Ra’y Marangatu oipe’ava’ekue angaipa arapýgui: omanóvo Ha’e oipe’a ore mano, ha oikove jevývo omyatyrõ ore rekove.

Upévare, ko vy’apavẽ Pascua oguerúva, opavave arapýpe oikóva oguerohory va’erã ha ánhel ha arkángelkuéra ndive, opurahéi joa nde ñemomba’e guasu, he’ívo kyre’ỹme: Imarangatu, Imarangatu, Imaranatu Ñandejára,
Tupã Opa Mba’e Jára.
Henyhẽ yvy ha yvága nde rekove mimbipágui.

Osánna yvágape.
Jehovasapyre pe oúva Tupã Ñandejára rérape.
Osánna yvágape

COMUNIÓN ÑEMBO’E

Tupã ore Jára, ehykuavo nde ra’ykuéra korasõme, pe mborayhu Espíritugui oúva; ore py’a renyhẽvo Páskua rehegua sacraméntogui, to roiko oñondive peteĩ jeroviápe.

JAHAKUÉVO – Despedida

Ñandejára mborayhu ipu’aka opa mba’ére, ñande pe’a haguã manógui jepe. Ha Jesucristo oikove jevy haguéicha, ñande avei jaikove jevýta.

Upévare jareko esperanza, jaikuaágui ipahápe Ñandejára ñanemoguahẽtaha ijykére ha ome’ẽtaha ñandéve vy’a ijapyra’ỹva. Ndaipóri ikatúva ñande pe’a Ñandejára mborayhúgui. Jagueraha ko vy’a ñande py’ápe ha ñamoguahẽ ñande rapichápe ko Páskua aretépe.