LUNES DE LA OCTAVA DE PASCUA

LUNES DE LA OCTAVA DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha     2, 14. 22-33

Pentecostés árape Pedro oñembo’y umi 11 apóstol ndive ha oñe’ẽ hatã he’ívo: “Israelgua ha opa peikóva Jerusalénpe, peikuaáke kóva ha pehendu porã ko ha’étava peëme:

Pehendu aipo ramo Israelgua ko ha’éva peëme: Peikuaa porã háicha, Tupã Ñandejára ohechauka va’ekue pende apytépe Jesús Nazaretgua pokatu, ojapóvo ha’e rupi heta hechapyrãva, oporomondýiva ha techaukarãva. Ha’e omoĩ va’ekue ichupe, hese ija’e’ỹva pópe, Tupã Ñandejára oguereko haguéicha iñakãme ha ha’e oipota haguéicha, peẽ katu pejuka va’ekue ichupe pemosãingóvo kurusu rehe tekove aña po rupi. Tupã Ñandejára katu omoingove jevy ichupe, oipe’ávo ichupe mano poguýgui, mano ndaikatúigui ipu’akávo hese. Mburuvicha guasu David, oñe’ẽvo Jesús rehe he’i va’ekue :

Che ahecha mantéva Tupã Ñandejárape che renondépe.

Ha’e oĩgui che akatúape mba’eve nda che reitýi chéne.

Upéva rehe che py’a henyhẽ vy’águi ha apurahéi torypa itépe.

Aikóne kyhyje’ỹ rehe, nda che reja mo’ãigui che tyvy kuápe, térã oñembyai ne rembiguái marangatu rete.

Rehechauka va’ekue chéve jeikove rape, ha che moenyhẽta vy’águi ne renondépe”.

Che pehẽnguekuéra: Ta’e porãntena peẽme, ñande ru ypykue David omano ha oñeñotỹ hague ha ityvy oĩha gueteri ñande apytépe. David katu maranduhára va’ekue, ha oikuaa Tupã Ñandejára ome’ẽ hague ichupe iñe’ẽ, omoĩtaha mburuvicha guasu ramo peteĩ iñemoñarévape. Ha’e ohechama va’ekue oiko mboyve, oikove jevyha pe Mesías.

David oñe’ẽ va’ekue upéva rehe ha he’i pe Mesías ndopyta mo’ãiha ityvýpe ha hete noñembyai mo’ãiha. Ha péina Tupã Ñandejára omoingove jevy upe Jesúspe, ha ore, upéva rechahare. Tupã Ñandejára omopu’ã rire ichupe ha omoĩ ijakatúape, ha ohupity rire Tupägui Espíritu Santo, ha’e he’i va’ekue ome’ẽtaha oréve, ohykuavo pe Espíritu ore ári. Upéva hína upe peẽ pehecha ha pehendu va’ekue.

Tupã Ñandejára Ñe’ẽ.

SALMO ÑEMBOHOVÁI   15, 1-2a. 5. 7-11

Opavave: Tupã che jára che mo’áke che nde pópe añemoï.

Tupã Ñandejára, eñangareko kena che rehe,

ne rendápe niko aguahẽ. Ha’e ndéve: Ñandejára,

nde hína opa mba’e chéve guarã. Nde pópe oĩ che rekove. O.

Amomba’e guasúta Tupä Ñandejárape che resape’áva,

pyharekue jepe che py’a rugua guive che moarandu.

Opa árape Tupä Ñandejára rehe che mandu’a,

ha’e oĩ ramo che ypýpe nda’ái chéne. O.

Upéva rehe, che py’a rory,  ha py’aguapýpe aikóne.

Nda che rejái chéne amano.

Nde reheja mo’ãi ne irũme yvy kuápe ojeity. O.

Nde rehechaukáne chéve jeikove rape.

Ne rendápe aime ramo vy’águi che moenyhẽne.

Nde ypýpe vy’a ndopáiva. O.

SECUENCIA

Como el Domingo de Pascuas, Misa del día:

Ñandejára Jesucrísto  rayhupárakuéra ñamoï Tupã Ñandejára ra’y pópe

ñane remikuave’ë momba’e guasu rehegua

ojora va’ekue ñane angaipa Cristo imara’ÿva,

omoï porã jevy va’ekue hi’angaipávape ñande Ru ndive.

Mano ha tekove oñembojovake ñera’ã mbaretépe

pe mburuvicha guasu omano va’ekue ha Ko’ágã oikove jevy.

Ere oréve María Magdalena mba’épa rehecha tape rehe Ahecha Ñandejára Jesucrísto  tyvy

ha Ñandejára oikove jevýva rova ojajaipáva.

Ahecha angelkuérape, ohecha va’ekue pe mba’e hechapyrã ahecha Ñandejára Jesucrísto  oñeñuvã hague

ha ijao kuéra oikove jevy Cristo che jeroviaha, ha omotenondéta hemimbo’e kuérape Galiléape.

Jaikuaa Ñandejára Jesucrísto  oikove jevyha añetehápe nde, Mburuvicha guasu nde pu’akapáva, ore poriahuverekomi kena.

ALELUIA Sal 117, 24

Aleluia.

Kóva ko árape Ñandejára oñemongu’e, javy’a joáke hesehápe

Aleluia.

EVANGELIO

Ko’ágã ñahendúta Ñandejára Jesucrísto  rekove ha hemimbo’e San Mateo omombe’u háicha 28, 8-15

Upe ára rupi umi kuña oje’ói pe itakuágui, tuicha kyhyje  ha tuicháva vy’a reheve avei, pya’e oho omombe’u umi hemimbo’ekuérape. Upévo Jesús osẽ ohuguaitĩ ichupe kuéra, ha he’i: Maiteípa.

Ha ha’e kuéra oñemboja Jesús rendápe, oñesũ henondépe ha oñañuã ipy, ha amomba’e guasu ichupe. Jesús he’i ichupe kuéra:

Ani pekyhyje. Ta peho pemomarandu che irũ nguérape oho haguã Galiléape, upépe che recha haguã.

Umi kuña oho aja, umi ñorairõhára  apytégui oĩ ohóva távape omombe’u haguã pa’i ruvicha kuérape pe ojehu va’ekue. Umi pa’i ruvicha oho umi moakãhára  rendápe, ha oñemoĩ hikuái peteï ñe’ẽme heta viru ome’ẽ haguã umi ñorairõhára pe. Ha upéi he’i ichupe kuéra:

Peẽ pejéta peke aja pyhare, ou hague Jesús remimbo’e kuéra ha omonda hague pe hetekue. Ha Pilato, mburuvicha Romagua oikuaa ramo, ore romoĩ porãta upéva hendive, ha peëme ndojehúi mo’ãi mba’eve.

Umi ñorairõhára  ogueraha pe viru, ha ojapo oje’e haguéicha ichupekuéra. Ha péicha ojehu hague, judío kuéra omombe’u ko’agãite peve.

Ñandejára Jesucrísto  Ñe’ẽ.