LUNES XIII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽGénesis arandukápe oĩ háicha 18, 1-2a. 16-33

Tupã Ñandejára ojechauha Abrahampe oguapy jáve ikarpa rokẽme, ara hakuve jave. Ojesaupi Abraham ha ohecha mbohapy kuimba’épe oñembo’ýva ijykére. Opu’ã rire umi kuimba’e ha oho hikuái Sodoma gotyo, Abraham omoirũ ichupe kuéra tape ku’a peve.

Tupã Ñandejára he’i ijupe guarã: “Nañomi mo’ãi Abrahámgui ko ajapótava. Ichugui niko osẽta tetã guasu imbaretéva. Ha ha’e rupi ojehovasáta opa tetã yvy arigua. Aiporavo ichupe oheko mbo’e haguã ita’ýra ha iñemoñare kuérape oguatávo che rape rupi, ha ojapóvo upe teko joja ha opa mba’e hekópe guáva. Ajapóta opa mba’e ha’e va’ekue Abrahámpe.”

Upérõ Tupã Ñandejára he’i ichupe: Sodoma ha Gomorra pegua herakuã vai. Ivaieterei iñangaipa kuéra. Aha upépe aikuaa haguã upéichapa añete térãpa nahániri. Ndaha’éi ramo upéicha oikuaáta hína.

Umi kuimba’e omoirũva ichupe oho Sodoma gotyo. Tupä Ñandejára katu opyta Abraham ndive. Abraham he’i ichupe: Añete piko rehundíta peteĩcha imarangatúva ha iñañáva?

Oĩ ramo 50 imarangatúva upe táva guasúpe, rehundíta piko opavavépe, ha ndereheja rei mo’ãi upe táva guasúpe ani haguã oñehundi umi 50 imarangatúva? Aikuaa porã nderejapo mo’ãiha upéva. Nerembojoja mo’ãi imarangatu ha iñañáva. Térã piko nde, reha’ãva ore reko yvy ári, nderejapo mo’ãi hekojojáva?

Tupã Ñandejára he’i: Ajuhu ramo 50 imarangatúva upe táva guasúpe, nahundi mo’ãi umi 50 rehehápe. Abraham he’i jevy: Aikuaa niko ikatuha che rova’atã mba’e hína, añe’ẽ jevývo ndéve.

Nde niko Tupã. Che katu yvy tĩmbo ha tanimbúnte. Ha upeichahágui oñekotevẽ ramo 5 ohupity haguã 50, rehundíta piko upe táva guasu, ndaipóri haguére umi 5?

Tupã Ñandejára he’i: Nahundi mo’ãi oĩ ramo 45 kuimba’e imarangatúva. Abraham he’ive jevy: Ha oĩramo upépe 40?

Tupã Ñandejára he’i ichupe: Nahundi mo’ãi umi 40 rehehápe.

Abraham he’i jevýnte: Ani kena nde pochy che Jára ha’e jevy ramo; ha oĩ ramo 30 añónte?
Tupã Ñandejára he’i: Nahundi mo’ãi ajuhu ramo upépe 30 imarangatúva.

Abraham he’i jevy: Aikuaa niko che rova’atã rasamaha, añe’ẽ ramo upéicha che Járape; ha ojejuhu ramo upépe 20 añónte imarangatúva?

Tupã Ñandejára he’i: Nahundi mo’ãi umi 20 rehehápe.

Abraham he’i: Néi, ani kena nde pochy che Jára! Añe’ẽ jevýta mante, ko’ágä katu ipaha itéma! Ikatu mba’e niko ojejuhu upépe 10 pevénte.

Tupã Ñandejára he’i: Umi 10 rehehápe nahundi mo’ãi upe táva guasu.

Oñe’ẽmba rire Abraham ndive, Tupã Ñandejára oho. Abraham katu ou jevy hógape.

Tupã Ñandejára Ñe’ẽ.

SALMO ÑEMBOHOVÁI 102, 1-4. 8-11

Opavave: Tupã Ñandejára imba’e porã ha oporo poriahuvereko

Amomba’e guasu Tupã Ñandejárape che py’aite guive,
che py’a ite guive amomba’e guasu héra marangatu.
Amomba’e guasu Ñandejárape che py’a ite guive,
nda che resarái chéne heta mba’e porã ome’ẽ hague chéve. O.

Ha’e oheja rei chéve che rembiapovaikue ha che mongueráva opaichagua mba’asýgui.

Ha’e ndo hejái apa yvy kuápe ha mborayhúpe che añuã ha che mokunu’ũ. O.

Tupã Ñandejára imba’e porã ha oporo poriahuvereko,
ndaipochy reíri ha oporohayhu.
Ha’e ndo poro mongavajúi mante nda ipy’arói ha ndaipochy aréi. O.

Nomoengoviái ñandéve ñane angaipa,
ha ndojapói ñande rehe ojapo haguãicha.
Yvága oĩ mombyry háicha yvýgui,
upéicha ite tuicha imborayhu umi hese ojeroviávare. O.

ALELUIA Cf. Sal 94, 8a. 7d

Aleluia.
Ani pemohatä pene korasö,
pehendu uvei Tupä Ñandejára ñe’ë.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

8, 18-22

Upe ramo Jesús ohechávo ojerepaha hese opavave, he’i hemimbo’e kuérape ombohasa haguã ichupe yguasu mboypýri. Ha peteĩ Moisés rembiapoukapy mbo’eha oñemboja Jesús rendápe ha he’i ichupe: Mbo’ehára, che romoirũta mamo rehohápe.

Jesús he’i ichupe: Aguara’i niko oguereko ikeha, ha guyrakuéra hupa. Che, yvypóraicha aju va’ekue katu, ndarekói mamo ambojeko haguã che akã.

Peteĩ hemimbo’ekuérava katu he’i ichupe: Che Jára, che rejána taha raẽ tañotỹmi che ru.
Jesús katu he’i ichupe: Eju katu che moirũ. Eheja umi omanómava toñotỹ umi omanóvape.

Ñandejára Jesucristo Ñe’ẽ