MARTES 9º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Tobías arandukápe oĩ háicha                                           

      2, 9-14

Peteĩ pyharépe ajahu porã, asẽ ha añeno ake haguã korapy jere yvate ykére pe okápe. Che akã nda jaho’íri mbyry’áigui.

Ndaikuaái upe korapy yvate ári oĩha guyrakuéra. Ha’ekuéra okaka che resápe ha apyta ndahechavéi. Aha pohãnohárakuéra rendápe che monguera haguã, amo ipahápe katu pohã omoĩva guive chéve ojapo vaive che rehe ha upépema ndahechavéiete.

Péicha aiko irundy áño, ahecha’ỹre mba’eve. Opa che rogaygua oñembyasy che rechávo. Ajicar  oñangareko che rehe mokõi áño pukukue, oho peve Elimáidape.

Upe guive che rembireko Ana omba’apo, oipyaha mba’e porã ita ovecha raguekuégui. Ha oguerahauka hembiapokue ambue hendápe ha ojehepyme’ẽ ichupe upévare.

Peteĩ jevy ára 7, mes Distro, ojapopa hembiapo ha oguerahauka umi ojoguátavape. Ha’ekuéra ohepyme’ẽ ichupe hembiapo kuére, ha ome’ẽ ichupe peteĩ kavara ra’y. Oguahẽ vove ha’e ógape, ahendu upe kavara ra’y rasẽ.

Ahenói che rembirekópe ha aporandu ichupe: “Moõgui piko osẽ aipo kavara ra’y? Remonda mba’e piko? Eraha jevy ijárape. Ñande ndaikatúi ja’u mba’e oñemonda va’ekue.” Ha’e he’i chéve: “Kóva ndaha’éi amonda va’ekue. Oñeme’ẽnte chéve ojehepyme’ẽ rire chéve che rembiapokuére”.

Che ndaroviái ichupe. Jevy jevy ha’e ichupe ogueraha haguã ijarakuépe. Heta che pochy hendive. Upéma ramo ha’e he’i chéve: “Moõ piko opytapa umi mba’e porã ita rejapo va’ekue? Ko’ágã ojehecha porãiterei mba’éichaguápa nde.”

Tupã Ñandejára Ñe’ẽ.

SALMO ÑEMBOHOVÁI  111, 1-2. 7-9

Opavave: Tupã Ñandejára rehe ojerovia ikorãsõ porãva

Ovy’a upe omomba’éva Tupã Ñandejárape, ha ipy’a rory ojapóvo hembiapoukapy.

Iñemoñare imbareténe ko yvy ári, heko potĩva ra’ykuéra ojehovasáne. O.

Ha’e ndokyhyjéi oñehenduka ramo guarã ichupe ivaíva, ha’e ojerovia mbarete Tupä Ñandejára rehe.

Ndaipy’a mokõiri ha mba’evégui ndokyhyjéi,

ha oikuaa porã umi hese ija’e’ỹva oñehunditaha. O.

Ovy’aite umi omomba’éva Tupã Ñandejárape.

Imba’évagui ome’ỹ imboriahúvape, ha ipo jera opa ára.

Tuicha ha herakuã porãne. O.

ALELUIA Cf. Ef 1, 17-18

Aleluia.

Ñandejára Jesucristo Túva to hesape ñane korasö

ñamomba’e haguã ha’arömby upe ñañe henóiva ipype.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha.           12, 13-17

Upe ramo omondo hikuái Jesús rendápe mbovymi fariséo ha Herodes ndiveguáva, omoñuhã haguã Jesúspe, ha he’ívare omoĩ vai haguã ichupe.

Ko’ãva oho ha he’i ichupe: Mbo’ehára, roikuaa niko añetévante ereha, ndoguapyiha nde rehe mba’eve oje’éva nde rehe, ha neremañaiha avavére rehecha haguã mba’eichaguápa ha’e.

Roikuaa heko itépe rembo’eha Tupã Ñandejára rape. Iporã piko rome’ẽ viru mburuvicha guasu Romape guápe, térãpa nahániri?

Jesús katu ohecha kuaa hova mokõiha hikuái, ha he’i: Mba’ére piko pe che moñuhãse? Pehechauka chéve pe viru peme’ẽva jepi.

Ha ombohasa ichupe hikuái. Jesús oporandu ichupe kuéra: Máva ra’ãnga ha máva réra piko ko oĩva hese?

Ha’ekuéra he’i: Mburuvicha guasu Roma pegua.

Jesús he’i ichupekuéra: Néi, peme’ẽ mburuvicha guasúpe mburuvicha guasu mba’éva, ha Tupãme Tupã Ñandejára mba’éva. Ha ijurujái joa opytávo.

Ñandejára Jesucristo Ñe’ẽ