MARTES XIX DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 31, 1-8

Moisés he’ive Israel ñemoñarépe: Arekóma 120 áño ha ndaikatu mo’ã véima aike térã asẽ. Ha upéi ave, Tupã Ñandejára he’i chéve ndahasa mo’ãi Jordán mboypýri. Tupã Ñandejára ohóta pene renonderã, ohundíta pene renondépe umi tetã, ha omosẽta ichupekuéra. Josuéhína pe ohasátava pene renonderã he’i haguéicha Tupã Ñandejára.

Ñandejára ojapóta hesekuéra ojapo haguéicha Amorréokuéra ruvicha guasu Sihón ha Og ha hetã nguérare, ha’e ohundi va’ekue. Tupã Ñandejára omoĩta ichupe kuéra pende pópe ha pejapóta hese kuéra ha’e hagueicha ite.

Pejepytaso ha pende py’a guasúke! Ani peñe mondýi térã pekyhyje ichugui kuéra, Tupã Ñandejára ohógui ne ndive: ndojei mo’ãi nde hegui ha na nde reja mo’ãi. Ani rekyhyje térã reñemondýi.

Upéi Moisés ohenói Josuépe, ha he’i ichupe opa Israel ñemoñare renondépe: ¡Ejepytaso ha nde py’a guasúke! Nde reikéta ko tetãgua ndive pe yvýpe Tupä Ñandejára he’i va’ekue itúva kuéra ypykuépe ome’ẽtaha, ha nde reme’ẽta ichupe kuéra imba’erã. Tupä Ñandejára ohóta ne renonderã, ha’e oĩta ne ndive; ndojei mo’ãi nde hegui ha na nde reja mo’ãi. Ani rekyhyje térã reñemondýi.

Tupã Ñandejára Ñe’ẽ.

SALMO ÑEMBOHOVÁI Deut 32, 3-4a. 7-9. 12

Opavave: Arosapukáita Tupä Ñandejára réra.

Arosapukáitagui Tupä Ñandejára réra,
pemomorã Tupã Ñandejárape!
Ñane mo’ãhára, hembiapokue ndaijojahái, hape heko joja.
Ha’e Tupã jeroviaha, naiñañái, ipo joja, na ipo karũi. O.

Ne mandu’áke umi ára yma guarére,
ema’ẽ umi áño rehe ojoapykuéri,
eporandu nde rúpe tomombe’u,
ha umi itujávape te’i ndéve. O.

Upe Yvatetegua omboja’o ramo guare tetãnguéra,
ha ome’ẽ peteĩ teĩ Adán ra’ýpe hetãrã,
ha omoĩ tetã rembe’y kuéra, oma’ẽvo
Tupã Ñandejára ra’y kuéra retakuére. O.

Tupã Ñandejára pehẽngue ha hetãgua hína Jacob,
ha’e oiporavo va’ekue imba’erã.
Tupã Ñandejára añoite henda guarãme ichupe ogueraha,
ndaipóri hendive tupã ambue. O.

ALELUIA Mt 11, 29ab

Aleluia.
Ñandejára Jesucristo he’i:
“Pe moï pende apére che mba’e pohyikue ha che pombo’éta, che aha’arökuaa ha ndajejapói”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

18, 1-5. 10. 12-14

Upe ramo Ñandejára remimbo’e kuéra oñemboja hendápe ha oporandu ichupe: Máva piko pe mba’e guasuvétava Tupã Ñandejára oporosãmbyhývo yvágape?

Upépe Jesús ohenói peteĩ mitãme ha omoĩ ijapytépe kuéra, ha he’i: Añetehápe ha’e peẽme, ndapeiko jevýi ramo mitãicha, ndapeike mo’ãi Tupã Ñandejára sãmbyhy yvágape. Pe oñemomirĩva ko mitãicha, upéva pe mba’e guasuvétava Tupã Ñandejára sãmbyhýpe yvágape. Ha oimeraẽva, che rérape oguerohorýva peteĩ mitã koichagua, chéve che rerohory.

Aníke pe apo’i pe mitãicha che rehe ojeroviávape. Ha’e peẽme, Tupã Ñandejára remimboukuéra hese oñangarekóva oĩ yvágape tapiaiteha che Túva renondépe.

Mba’épa peẽ peimo’ã ojapotaha peteï kuimba’e oguerekóva 100 ovecha, ha okañy ramo ichugui peteĩ?

Ohejáne ñúme umi 99, oho haguã oheka pe okañy va’ekue. Ha ojuhúvo, ovy’aiteve va’erã ko peteĩ ovecha reheve, umi 99 okañy’ỹ va’ekue reheve guágui. Péicha avei, pende Túva oĩva yvágape ndoipotái oñehundi peteĩnte jepe ko’ãvagui, mitãicha che rehe ojeroviáva.

Ñandejára Jesucristo Ñe’ẽ