MIÉRCOLES SÉPTIMO DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 20, 28-38

Páblo he’i pa’ikuéra iglésia Éfeso guápe: Peñangareko pende jehe, ha peñangareko opa ovecha atýre Espíritu Santo pene moĩ haguépe herekuárõ Jesucristo iglésiape, ha’e ojogua va’ekue huguy teépe. Aikuaa, che aha rire outaha ambue, aguara guasu ñarõicha ohundisétava Jesús iglésia.

Pende apytépe voi opu’ã va’erã oporombo’éva japúre, ogueraha haguã hapykuéri umi Jesús reroviahápe. Peñe ñangarekóke: Pene mandu’a mbohapy áño pukukue, ára ha pyharépe, ndahejái hague poheko mbo’e’ỹme che resay che rováre peteĩ teĩme.

Ko’ágã, che pehẽngue kuéra, poheja Tupã Ñandejára ha imborayhu ha ñe’ẽ pópe. Ha’e ipokatu pene mongakuaa haguã pende espíritupe ha ome’ẽ haguã peẽme opa he’i va’ekue ome’ẽtaha Tupã Ñandejára mba’évape. Ndaipotái va’ekue che mba’erã avaveichaguáva viru térã ao. Upéva rangue, peikuaa porã amba’apo hague che po teépe, ahupity haguã che ha umi che ndive oĩva rekotevẽ.

Opa ára pombo’e va’ekue ñamba’apo ha ñaipytyvõ va’erãha oikotevẽvape, ñane mandu’ávo pe Ñandejára Jesús he’i va’ekuére: ‘Javy’ave ñame’ẽvo, ñandéve oñeme’ẽrõ guágui.” He’ipa rire ko’ã mba’e, Pablo oñesũ ha oñembo’e hendive kuéra. Opavave hasẽ ha ohetũ ha oñañuã Páblope. Ha ipy’a ñembyasy eterei he’i haguére ichupekuéra ndohecha mo’ã veimaha ichupe. Upéi omoirũ hikuái ichupe yga peve.

Tupã Ñandejára Ñe’ẽ.

SALMO ÑEMBOHOVÁI 67, 29-30. 33-36c

Opavave: Tetãnguéra yvy apére oĩva, to gueropurahéi hikuái Tupã Ñandejárape.

O bien:

Aleluia.

Tupã Ñandejára, ehechauka
nde pu’aka ore pytyvõ ramo guaréicha.
Nde tupao oĩgui Jerusalénpe,
mburuvicha kuéra omoguahẽ ndéve opa mba’e. O.

Tetã nguéra yvy apére oĩva, to gueropurahéi hikuái Tupãme.
Tupã Ñandejára, upe araíre oikóva, amo yvágare,
yma ite ojejapo va’ekuére,
ha’e hína upe oñehendukáva. O.

Na pehendúi piko mba’éichapa hatã oñe’ẽ?
Pehecha kuaáke Tupã Ñandejára imbareteha.
Opa Israel oĩ ipo guýpe, opa mba’e amo arai peve.
To ñemomba’e guasu Tupã Ñandejára. O.

ALELUIA Cf. Jn. 17, 17ba
Aleluia.
Ne ñe’ë Ñandejára Jesucristo hína pe Añetegua
ore momarantatu upe añeteguápe.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Juan omombe’u háicha 17, 1b. 11b-19

Upe ramo ohasa mboyvemi Tupã ykére, Ñandejára oma’ẽ yvága gotyo ha péicha oñembo’e: “Che Ru Marangatu, eñangareko hese kuéra nde réra pokatu, chéve reme’ẽ va’ekue rupi, peteĩcha oiko haguã ha’ekuéra, nde ha che peteĩ háicha. Hendivekuéra aime aja ko yvy ári, che añangareko hese kuéra nde réra pokatu, nde reme’ẽ va’ekue chéve rupi. Ha avave ijapytegui kuéra noñehundíri. Oñehundi upe oñehundi va’erãvante voi, oiko haguã heko itépe Ñandejára Ñe’ẽ he’i háicha.

Ko’ágã niko aha ne rendápe, ha ha’e ko’ã mba’e ko yvy ári aime aja gueteri. Péicharõ ha’ekuéra avei henyhẽta vy’águi, che avy’a háicha. Ahenduka va’ekue ichupekuéra ne Ñe’ẽ, ha upévare umi nde rehe ojerovia’ỹva ndaija’éi hesekuéra.

Che remimbo’ekuéra niko ndaha’éi umi nde rehe ojerovia’ỹ vaicha, ha che avei ndaha’éi. Ndajeruréi ndéve renohẽ haguã ichupe kuéra ko yvy árigui, ku ivaívaguinte eñangareko hesekuéra.

Che ndaha’éi háicha umi nde rehe ojerovia’ỹ vaicha, ha’ekuéra avei ndaha’éi. Emboyke ichupekuéra ne mba’erã, ne ñe’ẽ añeteguáva rupi. Chéve che mbou haguéicha yvypóra kuéra apytépe ko yvy ári, péicha avei che amondo ichupekuéra yvypóra kuéra apytépe. Hesekuerahápe niko che añemboyke ndéve guarã, ikatu haguã ha’ekuéra avei oñemboyke ndéve guarã ne ñe’ẽ añeteguáva rupi.

Ñandejára Jesucristo Ñe’ẽ.