MIÉRCOLES XI DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue mokõiha Corintos guápe 9, 6-11

Che pehẽnguekuéra:

Pene mandu’a kóvare: Pe oñemitỹ michĩva, michĩ omono’õta. Pe oñemitỹ hetáva, heta omono’õta. Peteĩ teĩ ome’ẽ va’erã ipy’apýpe oñandu háicha, ombyasy’ỹre, oipota porãgui. Tupã Ñandejára niko ohayhu pe ipy’a ite guive ome’ẽvape. Tupã Ñandejára ikatu ome’ẽ peẽme heta eterei mba’e iporãva, ikatu haguã opa ára pereko peikotevẽva, ha hemby ave, peipytyvõ haguã opaichagua tembiapo porãme. Ñandejára Ñe’ẽme he’i: “Heta iterei mba’e mboriahúpe ome’ẽ, ipojera opa árape.”

Tupã Ñandejára niko ome’ẽ pe mba’e ra’ỹi oñeñotỹva ha pe tembi’u oje’úva. Ha ome’ẽne peẽme opa peikotevẽva peñemitỹ haguã, omopu’ãne pende kóga ha ombohetavéne pene tupãmba’e mono’õ. Upéicha heta mba’e perekóta, ha ikatúta peme’ẽ heta. Ha pe tupãmba’ére, che rupi perahaukáva, ñane pehẽngue kuéra ome’ẽta ijaguyje Tupã Ñandejárape.

Tupã Ñandejára Ñe’ẽ.

SALMO ÑEMBOHOVÁI 111, 1-4. 9

Opavave: Ovy’a upe omomba’éva Tupä Ñandejárape.

Ovy’a upe omomba’éva Tupã Ñandejárape,
ha ipy’a rory ojapóvo hembiapoukapy.
Iñemoñare imbareténe ko yvy ári:
heko potĩva ra’y kuéra ojehovasáne. O.

Hógape opa mba’e oguerekóne,
ha ipojeráne opa árape.
Pytũmbýpe jepe oĩ ohesapéva heko potĩvape,
ha upéva ipy’a porã, oporoporiahuvereko ha heko joja. O.

Ha’e omboheta umi oikotevẽvape.
Imba’évagui ome’ẽ imboriahúvape,
ha ipo jera opa ára.
Tuicha ha herakuã porãne. O.

ALELUIA Jn 14, 23

Aleluia.
Ñandejára Jesucristo he’i:
“Pe che rayhúva nomboykemo’äi che ñe’ë,
che Ru ohayhúta ichupe rohóta hendápe”.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Mateo omombe’u háicha

6, 1- 6. 16-18

Upe ramo Jesús he’i hemimbo’ekuérape:

Pejapóvo oimeraẽ mba’e Tupã Ñandejárape pemomba’e guasu haguã ani pejapo opavave rovake pejechauka haguã. Upéicha pejapo ramo pende Ru oĩva yvágape nomoengoviái chéne peẽme mba’evépe.

Upévare, peipytyvõ ramo oikotevẽvape ani pemoherakuã opa rupi, ojapo háicha umi hova mokõiva umi tupaoha rupi, térã umi okaháre.

Ha’ekuéra péicha ojapo oñeñe’ẽ porã haguã hesekuéra. Añetehápe ha’e peẽme, ichupe kuéra niko oñemoengoviapáma oñemoengovia va’erã. Peẽ peipytyvõ ramo oikotevévape, ani peheja oikuaa pende rapicha pehayhuvéva. Kirirĩháme pejapo, ha péicha pende Ru ohecháva mba’épa pejapo kirirĩháme, omoengoviáta peẽme pene rembiapokue.

Peẽ peñembo’e jave, ani peñembo’e umi hova mokõi vaicha. Ha’ekuéra niko ñembo’yhápe oñembo’e umi judío kuéra tupao rupi, térã umi tape ojuasaha rupi ojehechauka haguã opavavépe. Añetehápe ha’e peẽme, ichupe kuéra niko oñemoengoviapáma oñemoengovia va’erã.

Peẽ peñembo’éta vove katu, peike pende kotýpe, pemboty pene rokẽ, ha peñembo’e pende Rúpe pene añoháme. Ha pende Ru ohecháva mba’épa pejapo pene añoháme, omoengoviáta peẽme pene rembiapokue.

Ndape’úi jave mba’eve Tupã Ñandejárape pemomba’e guasu haguã, ani peñembohovasy umi hova mokõi vaicha. Ha’e kuéra niko péicha ojapo ojechauka haguã ndo’úi jave hína mba’eve.
Añetehápe ha’e peẽme, ichupe kuéra niko oñemoengoviapáma oñemoengovia va’erã.

Peẽ ndape’úi jave mba’eve Tupã Ñandejárape pemomba’e guasu haguã, pejovahéi ha peñakãkarãi, ani haguã avave ohechakuaa ndere’uiha mba’eve Tupã Ñandejáarape remomba’e guasu haguã. Nde Ru añónte ohecháta pe ne añoháme rejapóva. Ha’e ohecha kuaáta ndéve ha omoengoviáta ndéve ne rembiapokue.

Ñandejára Jesucristo Ñe’ẽ