MIÉRCOLES XXIII DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Colosas guápe 3, 1-11

Che pehẽnguekuéra: Aipórõ, peẽme niko peñe moingove jevy Cristo rupi, peheka umi mba’e yvága reheguáva, pe Cristo oguapyhápe Tupã Ñandejára akatúape. Pejepy’a mongeta umi mba’e yvága peguáre, ani yvýpe guáre.

Peẽ niko pemano va’ekue ha Tupã Ñandejára oguereko iñongatupy peẽme guarã peikove haguã Cristo ndive. Cristo voi niko pe pende rekove. Ágã ha’e oúvo, peẽ pejúta avei hendive pene renyhẽ mimbipa reheve.

Pejuka, aipórõ, opa yvy rehegua oĩva pende pype: avave ani itie’ỹ kuña ndive, ha ani ojapo mba’eve iky’áva, ani oho imba’e andu rei ha hembipota vai rapykuéri, ha ani oñembotyryryka takate’ỹre (ha’énteva avei ta’ãnga rei ñemomba’e guasu).

Ko’ã mba’e rupi, ou Tupã Ñandejára ñenupã ipohýiva umi iñe’ẽ rendu’ỹva ári, ha pende rekove ymave guarépe pejapo va’ekue. Ko’ágã katu pehejapa ko’ã mba’e: pe pochy, pe mba’e andu rei, pe ñaña, jeja’o ha ñe’ẽ tie’ÿ.

Ani pende japu ojupe, peipe’áma niko pende jehegui pende reko yma guare ha umi mba’e yma pejapo va’ekue, ha peikóta jeikove pyahúpe, pe kuimba’e pyahu rekovépe, oñemoatyrõva ohóvo ojogua haguã Tupã, Ijapoharépe, peikuaa porã haguã ichupe. Nde’ise véima mba’eve ndépa Greciagua térãpa judío, ndépa rejeapi’o pyre térãpa rejeapi’o’ỹva, ndépa tetã mombyrygua, térã nde tavýpa, tembiguáipa térãpa nde rekosã’ỹ. Cristo ha’e opa mba’e ha oĩ opavavépe.

Tupã Ñandejára Ñe’ẽ.

SALMO ÑEMBOHOVÁI 144, 2-3. 10-13b

Opavave: Tupã Ñandejára ha’e ipy’a porã opa mba’épe

Ára ko’ẽre romomba’e guasúta,
ha nde réra amomba’éne opa ára.
Ñandejára niko tuicha hína, ituichakue ndaikatúi jaikuaapa.
Ichupe ñamomba’e guasu va’erã. O.

Opa ne rembiapokue ta ne momba’e guasu,
Ñandejára, opa nde rehe ojeroviáva ta ne momba’e guasu.
Ha’ekuéra to moerakuã tuichaha upe ne retã,
ha’ekuéra toikuaauka nde ne mbareteha. O.

Upéicha ramo maymáva oikuaáne
ne mbareteha, ha upe ne retã tuichaha.
Ne retã niko opa’ỹva, ha nde reporosãmbyhýta opa árape.
Ñandejára nopyrũiva iñe’ẽre, ha’e ipy’a porã opa mba’épe. O.

ALELUIA Lc 6, 23ab

Aleluia.
Ñandejára Jesucristo he’i: “¡Pende rorýke ha pene renyhẽ vy’águi
tuicha ojehepyme’ẽta peẽme yvágape!”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 6, 20-26

Upe ramo Jesús oma’ẽ hemimbo’e kuérare ha he’i: Pevy’a ite va’erãpa peẽ imboriahúva, pene mba’e niko pe Tupã Ñandejára sãmbyhy. Pevy’a ite va’erãpa peẽ ko’ágä pene ñembyahýiva, peẽ niko upéi pene ryvatãta.

Pevy’a ite va’erãpa peẽ ko’ágä pene rasẽva, upéi niko pepukáta. Pevy’a ite va’erãpa oimérõ pende rehe ndaija’éiva, pene mosẽva, pende ja’óva ha ojeguarúva pende hegui che, yvypóraicha aju va’ekue rehehápe. Ta pevy’a heta, ta pene renyhẽ torýgui ko árape, peẽme niko oñeme’ẽta peteĩ jopói nde tuicháva yvágape.

Péicha avei niko umíva túva ypy kuerakue ojapo va’ekue maranduhára kuérare. Peẽ imba’e retáva katu pejererekóke, perekóma pende vy’a. Pejererekóke peẽ ko’ágä pene ryvatãva, pene ñembyahýita hína. Pejererekóke peẽ ko’ágä pepukáva, pene rasẽta hína ñembyasýgui.
Pejererekóke opavave pende rerohory ramo, upéicha avei ojapo va’ekue pende túva ypy kuerakue umi maranduhára japúre.

Ñandejára Jesucristo Ñe’ẽ