Ñahendu Hesu. 6 agosto: Ñandejára mimbipa ára

Escucha el evangelio y la reflexión en: https://youtu.be/-KTKfMFi-BA

6 agosto: Ñandejára mimbipa ára.

Marcos 9, 2 – 10

Upéramo Jesús oho ojupi peteĩ sérro ru’ãme, ha ogueraha hendive Pedro, Santiágo ha Juan. Upépe henondépe kuéra, Jesús rete oñemoambue ohóvo. Ijao overa hendy ha morotĩ sakã.

Yvy ári ndaipóri mba’eve peichaite morotĩva. Upéi katu, ohecháma hikuái Elías ha Moiséspe, oñemongetáva hína Jesús ndive. Ha osẽ he’i Pedro, Jesúspe: — Mbo’ehára, ajépa iporãite ñaimembáre ko’ápe. Reipotárõ, na torojapo peẽme ráncho’imimi pene rendaguã.

Peteĩ ne mba’erã, peteĩ Moiséspe guarã ha Elíaspe guarã avei.

Oñemondyipa niko hikuái, ha Pedro katu ndoikuaái mba’épa he’íta. Upe jave ou peteĩ arai
ha ojaho’i chupekuéra. Ha pe araígui katu oñehendu peteĩ he’íva, “Kóva niko che Ra’y
ahayhúva. Pehendu chupe.” Ha oma’ẽ jeývo hikuái ijerére ohecha ndaipóri veimaha avave hendive kuéra. Jesús añoite.

Oguejykuévo hikuái pe sérrogui, Jesús he’i chupekuéra ani haguã omombe’u avavépe upe ohecha vaekue, ha’e oikove jey peve omanóva apytégui. Ha oñongatu hikuái ko’ã mba’e ipy’apýpe. Upe “jeikove jey” katu ndoikuaái hikuái mba’épa he’ise.

ÑAMBOGUEJY ÑANDE REKOVÉPE

“Che rayhu ko chéve Ñandejára”. Oime sapy’ánte ñande rapicha péicha ñahendúva he’i, osẽ porãramo hembiapo térã katu oguahẽramo ichupe mba’e porã oha’arõ’ỹete hágui.

Upéicha oñandu Ñandejára ombojerovia ha ohovasaha ichupe. Peteĩ túva térã peteĩ sy
omokunu’ũ ha ombojerovia háicha imemby térã ita’ýra.

Upéicha jahecha Hesu oraha Pedro, Santiago ha Juan pe sérro ru’ãme, ombojerovia ha ohechauka ichupe kuéra ñembo’e rupive pe Ñandejára mborayhu ojajái ha omimbipáva. Ha upépe ovy’águi hikuái Pedro ojogaposéma voi opyta haguãntema upépe.

Péicha ko ñande avei javy’a iterei jave, ndajaipotái ohasa pe ñanembovy’áva, upépentema japytase.

Hesu niko ñanembo’e va’ekue ñañembo’évo Ñandejárape ja’e haguã: “Ore Ru yvágape reiméva, toñembojeroviákena nde réra, taoreañuamba ne mborayhu”. Ha péicha, che reindy ha nde che irũ, ikatu ñande avei ñañandu Hesu ykére ñande ha’eha Ñandejár rajy ha ta’ýra ha’e ohayhu etereíva ha ñaneañuaha imborayhúpe. Péva nañandepe’ái ramo jepe jehasa asýgui, ñanemombarete jaropu’aka haguã opa mba’e hendive.

Pa’i Alberto Luna.