Ñahendu Hesu. Domingo 12ª Tiempo Durante el Año

Escucha el evangelio y la reflexión en: https://youtu.be/ddtD97c3LKc

Domingo 12º TDA Ciclo B

Marcos 4, 35 – 41

Ka’arúma ramo upe árape, Jesús he’i idisípulokuérape: Jahasa mar mboypýri. Ha omondo rire opavavépe, hemimbo’ekuéra ogueraha Jesúspe upe kanóa oĩháme.

Oĩ ave ambue kanóakuéra omoirũva chupekuéra. Ha peichaháguinte oñepyrũ oipeju yvytu ne ratãva, ha pe y pochy opu’ã pe kanóa ári ha omyenyhẽ ýgui. Jesús katu okehína upe kanóa ruguápe, peteĩ akãngyta ári. Omombáy ha he’i chupe hikuái: Mbo’ehára, nderehecha kuaái piko ñañapymítamaha?

Jesús opu’ã, oja’o pe yvytúpe ha he’i pe márpe: Ekirirĩ! Epyta upépe! Ha opi pe yvytu ha oguapy pe y. Upéi Jesús he’i hemimbo’ekuérape: Mba’ére piko peñemondýi? Ne’ĩra gueteri piko pejerovia?

Idisípulokuéra katu okyhyje eterei ha oporandu joa ojupe: Máva piko kóva, yvytu ha mar jepe iñe’ẽ rendúva chupe?

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Mba’éicha piko Ñandejára oheja péicha oiko ñande rehe. Oime piko hesarái mba’e ñande hegui ha ñande reja rei ãichagua degrásia oheja haguã ho’a ñande ári. Heta ko oime oñandúva péicha Ñandejára noimeiha ñanendive Koróna víru mba’asy puku apytépe.

Hesu he’ívo idisípulo kuérape oike haguã hendive márpe ka’aru pytũma ramo jepe, ha’ete ku
omombareteséva ichupe kuéra ijeroviápe. Ha pe pyharépe ou peteĩ torménta pochy ombeti pe kanóare.

Vaípe ko ojecha hikuái pe y oñepyrũvo oike. Oñapymi ha noñapymíripe oime. Oñeha’ã mbaiteko ikatumiháicha ani haguã ojahoga. Hesu katu péa aja oke hína pe kanóa ruguápe.

Ha’ete ku Ñandejára he’íva ñandéve: Aiméko hína penendive. Aiméko hína nde ykére pe torménta apytépe eñeha’ã jave ha romoirũ hína opa mba’épe, nereñandúiramo jepe. Naneñói ko hína nde varko’ípe.

Ipahápe katu umi disípulokuéra ndoikuaavéiguima mba’épa ojapóta oho apúrope osapukái ha omombáy Hesúpe. Ha opu’ã je Hesu oja’o rire pe yvytu pochýpe, oja’o avei umi disípulope,
ndojeroviái haguére Ñandejárare.

Pe ñande jerovia niko nañande pe’ái problema ha jehasa asýgui. Ñanemombarete uvei ñande
pu’aka haguã hesekuéra, jaikuaávo Ñandejára oimeha ñande ykére ha nañanderejaiha. Ha jaikuaágui ipahápe umi ivaivéva pa’ũgui jepe ñasẽta ñanembareteve, ha Ñandejára onohéta hína iporãvéva ichugui, ñande ndajahechái ha ndajaikuaáiva gueteri.

ÑAÑEMBO’E OÑONDIVE

Ñandejára Hesukrísto opa araite ore moirũva ha ndaorerejáiva araka’eve, emongakuaa ore jerovia, nendive rogueropu’aka haguã jehasa asy py’aguapýpe ha romoirũ haguã ore rapicha ojejopývape.

Pa’i Alberto Luna.