Ñahendu Hesu. Domingo 26º Durante el Año

Escucha el evangelio y la reflexión en: https://youtu.be/a-jbPbvM_Wk

Domingo 26º Durante el Año Ciclo B

Marcos 9, 38-43.45.47-48

Upérõ Juan he’i Jesúspe: — Mbo’ehára, rohecha niko kuri peteĩ omosẽva demóño nde rérape. Roho chupe ha rojoko, ndaha’éigui ñande apytepegua.

Jesús he’i: — Ani pejoko. Milágro ojapóva che rérape niko ndikatúi oñe’ẽ vai che rehe.

Umi opu’ã’ỹva ñande rehe niko oĩ ñane ndive. Pe oñemoĩ’ỹva ñande rehe niko oĩ ñane ndive. Ha oimeraẽva ome’ẽva peẽme ymínte jepe, chendive peiko haguére, añete ha’e peẽme ndopyta mo’ãiha hekovia’ỹre chupe.

Oimeraẽ oitýva pekádope umi michĩvéva jepe che rehe ojeroviávape, iporãve va’erã upévape oñapytĩ ita ijajúrare ha ojeity ýpe. Ha peichahágui nde po nde reitýtarõ pekádope, eikytĩ. Iporãve niko reikove Ñandejára ndive nde po peteĩ reheve, ha ani nde po mokõive
reheve reho Aña retãme, tata ogue’ỹháme. Ha nde py nde reitýtarõ pekádope, eikytĩ.

Iporãve vaerã niko reikovérõ nde py peteĩ reheve, reho rangue Aña retãme nde py mokõive reheve. Ha nde resa nde reitýtarõ pekádope, emombu. Iporãve vaerã niko reike Ñandejára Rréinope nde resa peteĩ reheve, reho rangue Aña retãme nde resa mokõi reheve. Cháke
upépe umi yso nomanói ha tata araka’eve ndogue mo’ãi.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ñahendu he’i jepi lo mitã: ‘Orekueténte hína ápe. Ndaha’éiva orerehegua ndaijái.’ Ha péicha nunga niko ou apóstol Juan he’i Hesúpe ojuhu hague peteĩ ndaha’éiva heseguakuéra ha oikóva upérupi oipohano hapichápe Hesu rérape. Mitã Juan oho voi hi’ári ha
ojoko, ha oimo’ã Hesu he’itaha ichupe iporãha la ojapóva, umíva ha’ekuérante ikatuha ojapo. Hesu katu he’i chupe oheja haguã, anive haguã ojoko.

Umíva oĩha ñande favórpe ndaha’éiramo jepe ñande rehe guáva, ndaha’éiramo jepe ñande atypegua. Ñande avei che irũ ha che reindy sapy’ánte ñanefanátiko imi ha ñapensa ñandekueténte, ñande katólikonte la ikatúva Ñandejára rérape japorombo’e, ñañembo’e ha
ñamoguahẽ ñande rapichápe Ñandejára grásia.

Hesu oñemosã ramo guáicha ñande tupao korapy’ípente. Hesu katu ñanemoakãky’o imi ha ñanembo’e Ñandejára omba’apoha avei heta ñande rapicha ndaha’éiva katóliko rupive, hérape oñeha’ãva oipytyvõ hapicha mboriahúpe, oñembo’éva hasývare ha omboguatáva heta tembiapo porã. Ani ñambovai ha jajoko umíva, He’i Hesu, ani ñaimo’ã ñandénte ikatu ñamba’apo Ñandejára kokuépe.

ÑAÑEMBO’E OÑONDIVE

Ñandejára Hesukrísto ejúva ehechauka Ñandejára rape ha eipohãno opavavépe. Eipe’a ore korasõ ha ore akã roguerohory haguã, nde rejapo haguéicha, ore rapicha kuéra nde rehe ojeroviáva ha nde rérape oñeha’ãva oiko mborayhúpe, ndaha’éiramo jepe ore reheguáva.
Amén.

Pa’i Jasy.