Ñahendu Hesu. Domingo 28º Durante el Año

Escucha el evangelio y la reflexión en: https://youtu.be/l4hYqi_10s4

Domingo 28 Durante el Año Ciclo B

Marcos 10, 17 – 27 (30)

Jesús oguata jave ohóvo hína, odipara ou hendápe peteĩ kuimba’e. Oñesũ henondépe ha oporandu chupe: — Mbo’ehára marangatu, mba’éiko ajapo vaerã ahupyty haguã jeikove opave’ỹva.

Jesús he’i chupe: — Mba’éreiko ere che rehe che marangatuha. Peteĩnte niko oĩ imarangatúva, ha upéva Ñandejára. Reikuaapa porã niko Ñandejára mandamiénto. “Ani reporojuka, ani reporomyakã ratĩ, ani remonda, ani eñe’ẽ rei nde rapicháre, ani nde japu, ha emomba’e nde ru ha nde sýpe.”

Pe kuimba’e he’i chupe: — Opa umíva niko ajapóva voínte che mitã guive.

Ha Jesús oma’ẽ porã hese. Ipy’aho hese. He’i chupe: — Peteĩ mba’énte rejapove va’erã. Tereho evendepa opa erekóva ha hepykue eme’ẽ mboriahúpe. Péicharõ nde rríkota yvágape. Upe rire, eju che moirũ.

Upéva ohendúvo, tuicha oguapy pe karia’ýre. Ñembyasýpe osẽ oho, kuimba’e nde rríkova niko ha’e. Jesús ojere he’i idisípulo kuérape:
— Ajépa hasy umi irríkovape oike haguã Ñandejára Rréinope.

Upéva ohendúvo hikuái, idisípulo kuéra oñemondyipa. Jesús katu he’i jey voi chupekuéra: — Hasýko hína jaike haguã Ñandejára Rréinope. Péicha-péichante niko ndajaikéi.

Ndahasyive vaerã ñambohasa ju resa rupi kavaju, irríkova oike rangue Ñandejára Rréinope.

Upéva ohendúvo hikuái katu, ko’yteve opondera joa, ha he’i ojupe:— Péicharõ piko máva ojesalváta.

Jesús oma’ẽ hesekuéra, ha he’i:— Yvypórape ijeheguínte, ndaikatúi. Ñandejárape guarã katu ndaipóri mba’eve ikatu’ỹva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

Mba’etekópa che irũ ha che reindy, nde gua’u eho Hesu renondépe ha eporandu ichupe: Mba’épa ajapo va’erã che rovasa haguã Ñandejára. Mba’épa aikotevẽ yvágape aike haguã. Ha mba’épa nde rekarkula he’íne haguã ndéve Hesu.

Mba’épa nde reñandu ha’e ojeruréne haguã ndéve. Ha, ja’énte ningo, mba’épa ikatúne oime neapytĩ ha nderepoiséiva ejapo haguã pe Ñandejára he’íva ndéve. Aníkena ãga oiko nde rehe ko kuimba’e ou va’ekuéicha Hesu rendápe, hakate’ỹgui ojavýva pe Hesu ome’ẽse va’ekue ichupe.

ÑAÑEMBO’E OÑONDIVE

Ñandejára Hesukrísto ore renóiva roñomoirũ haguã nendive, aníkena reheja mba’e pota tarova, taryrýi ha chenteségui rojei nde ykégui ha okañy ore hegui yvága rape. Amén.

Pa’i Jasy.