Ñahendu Hesu. 17 diciembre: Feria Adviento
16 diciembre, 2021Ñahendu Hesu. 21 de diciembre. Feria de Adviento
21 diciembre, 2021Escucha el evangelio y la reflexión en: https://youtu.be/OgAc8MQVcCs
Domingo 4º Adviento Ciclo C
Lucas 1, 39 – 45
Umíva umi árape, pya’ete María osẽ oho peteĩ puéblope opytáva sérro pa’ũme Judápe. Oikévo Zacarías rógape, omomaitei Isabélpe. Ha ohendúvo María maitei, Isabel oñandu mba’éichapa pe mitã omýi hyépe.
Upépe, Isabel henyhẽ Espíritu Sántogui. Ha osẽ he’i Maríape: — Ñandejára niko nde rovasave ndéve opa kuña apytégui. Ha ohovasa ne
memby ave. Máva piko che, nde Ñandejára sy, reju haguã che rendápe.
Ahendúvo nde che momaiteívo, che memby omýi vy’águi che ryépe. Ñandejára nde rovasa rerovia haguére oikotaha umi mba’e ha’e he’i vaekue ndéve.
Ñandejára Hesukrísto ñe’ẽ.
ÑAMBOGUEJY ÑANDE REKOVÉPE…
Javy’a, jasapukái, ñambovíva el Paraguay. Ñande ayvu niko javy’a vove.Jajepopete, japuka, jajeroky ha japurahéi. Ha upeichaite váicha avei oñandu Ña Isabel oguahẽvo hógape María, mombyrýgui oúva omoirũ haguã ichupe.
Ovy’a ojotopávo ko’ã mokõi kuña ha ojoguerohory ipy’aite guive. Mokõivéva niko hyeguasu. Tupãsy ogueru Hesúpe ipype ha Isabel katu tuicháma Juan Bautístagui. Ha’ete ku isykuéra oñomomaitei háicha, umi mitã oiméva hyépe avei oñomomaitei.
He’i Isabel Tupãsýme: Ahendúvo ne maitei che memby omýi vy’águi che ryépe. Ovy’a Juan Bautista ha opopo’ipa váicha isy ryépe oñandúvo Hesu ouha hendápe María ryépe.
Ajépa ningo jaheka umi mba’e ñanembovy’a va’erãva. Hi’ãite Ñandejára ñanderovasa ha jahasa porãite jajotopávo ñane héntekuéra ndive ko Navida ha áño pahápe. Ñahendu Isabel he’i Maríape Ñandejára ohovasaha ichupe ojerovia haguére hese, ohendu haguére iñe’ẽ. Ha upéva ogueruha vy’a hekovépe ha avei oguerúta vy’a heta rekovépe imemby Hesu rupive.
Hesu hína upe Ñandejára omboúva ñandéve ogueru haguã vy’a ha py’aguapy añete. Ha mba’éichapa che reindy ha nde che irũ nde reñandu pe vy’a oguerúva Hesu ikatu oguahẽ nde pype, nde rógape ha nde komunidápe ko Navidápe. Máva rendápe pa oime reho va’erã, térãpa máva remoguahẽ va’erã nde rógape.
Tupãsy oho haguéicha oñandu Isabelpe ha Isabel omoguahẽ haguéicha hógape Tupãsýme.
ÑAÑEMBO’E OÑONDIVE
Ñandejára ore Ru, ejúva ore apytépe nde Ra’y Hesu rupive. Oremokyre’ỹ kena ore avei roho haguã ore rapicha oikotevẽva rendápe romoguahẽvo vy’a nde rérape. Ojapo haguéicha Tupãsy María ohóvo Isabel rendápe. Amén.
Pa’i Jasy.